اباي – دانالىقتىڭ دارا شىڭى. قازاققا عانا ەمەس, ءبۇتىن تۇركى جۇرتىنا ورتاق جارقىن تۇلعا. قازاق ەلىنىڭ تاۋەلسىزدىك جولىنداعى باعىت-باعدارىن ايقىنداپ, بۇگىنگە دەيىن جول كورسەتىپ كەلەدى. قازاق حالقىنىڭ ۇكىلەگەن ءۇمىتى مەن اق ادال تىلەگى, ماقساتى مەن مۇراتى, مۇڭى مەن زارى ءدال وسى اباي شىعارمالارىنىڭ ءون بويىندا تۇنىپ تۇر. حاكىمنىڭ جەكەلەگەن شىعارمالارى ازەربايجان تىلىنە اۋدارىلىپ, وقىرمان ولجاسىنا اينالدى. ازەربايجان مەن قازاق ادەبي-مادەني بايلانىستارى كونەدەن بەلگىلى. تاريحقا ۇڭىلەر بولساق, وعىز-قىپشاق فولكلورلىق مادەنيەتىمەن, داستۇرىمەن ۇندەسكەن مول ساباقتاستىقتى كورەمىز. تۇركى حالىقتارىنىڭ ەپيكالىق مادەنيەتىندە ايرىقشا مانگە يە قورقىت جىرلارىنىڭ قازاق دالاسىنداعى سارىنىن دا ايتۋعا بولادى. ءتىپتى قوس باۋىرلاس ەلدىڭ ادەبي ءتۇپ-تامىرىنىڭ ورتاق نەگىزدە ەكەنىن اعارتۋشى عالىم, ويشىل اباي قۇنانباي ۇلىنىڭ فيزۋلي, ءشامسي, ءسايحالي, ناۋاي, ساعدي, فيرداۋسي دەپ جىرعا قوسقانىنان اڭعارۋعا بولادى. بۇل رەتتە تۇركى الەمىنىڭ الىبىنا دەگەن ازەربايجان ەلىنىڭ قۇرمەتى ايرىقشا, شەكسىز جاقسى كورەدى دەسەم, ارتىق ايتقاندىق ەمەس. باكۋ ۇلتتىق ۋنيۆەرسيتەتىندە ونشاقتى جىلدان بەرى جۇمىس ىستەپ كەلە جاتقان «اباي ورتالىعى» ۇلىسارالىق قوعامدىق-ساياسي جانە مادەني-رۋحاني ورتادا شەشۋشى ءرول اتقاراتىندىعىن اتاپ وتكەن ءجون. ۇلى ويشىلدى تۋعانىمىزداي قاستەرلەپ, ونىڭ ماڭگى ولمەس مۇرالارىن قاستەر تۇتىپ كەلەمىز. ال بيىلعى اباي جىلىندا اتقارىلۋى ءتيىس شارۋاعا جان-جاقتى قولداۋ كورسەتۋگە, بەلسەنە ارالاسۋعا ءازىرمىز ءارى ناتيجەلى بولاتىنىنا سەنىمىم كامىل.
يسا گابيببەيلي,
اكادەميك, ازەربايجان عىلىم اكادەمياسىنىڭ ۆيتسە-پرەزيدەنتى
