سونىڭ ءبىر ايعاعىنداي حالىقارالىق تۇركى اكادەمياسى عىلىمي كەڭەسىنىڭ كەزەكتى III وتىرىسىندا تۇركى الەمىن جاقىنداتا تۇسەتىن عىلىمي جانە مادەني ينتەگراتسيانى ىلگەرىلەتۋ بويىنشا ناقتى قادامدار جاسالىپ, كەلەشەك جوسپارىن ايقىندادى. سونىڭ ىشىندە تۇركى الەمىندەگى اباي جىلىنىڭ جاريالانۋى بارشامىزدى قۋانتقان جاڭالىق بولدى. دۇنيەجۇزىلىك داڭققا يە بولعان ايگىلى ءال-فارابي مەن اباي ەسىمدەرى مەنىڭ وتانىمدا جاقسى تانىس. جارىق جۇلدىز ابايدىڭ قۇدىرەتتى پوەزياسى ماڭگىلىك ومىرشەڭدىگىمەن تۇركى عانا ەمەس, الەم تاريحىندا وشپەس ءىز قالدىردى. باۋىرلاس حالىقتاردىڭ بىرلىگى ءۇشىن ادەبي بايلانىستاردى ارتتىرۋ جانە اقىن-جازۋشىلاردىڭ ارالاس-قۇرالاستىعىن نىعايتۋدىڭ ماڭىزى زور. قازاق حالقىنىڭ قوس ماقتانىشى وزگە دە تۇركى ەلدەرىندە كەڭ ناسيحاتتالۋى كەرەك. اسىرەسە ولاردىڭ پوەتيكالىق قۋاتتى جىرلارى مەن عىلىمي فيلوسوفيالىق ەڭبەكتەرى اۋدارىلۋى كەرەك دەپ ەسەپتەيمىن. فيلوسوفيالىق تەرەڭ ويلى, ادامزاتتىق كەمەلدىككە ۇندەيتىن حاكىم شىعارمالارى ءوزى ءومىر سۇرگەن تۇتاس ءداۋىردى عانا ەمەس, بۇگىنگى زامانا شىندىعىن تانىپ-بىلۋگە سەپتىگىن تيگىزىپ وتىر. ادەبيەتتەگى ابايتانۋ عىلىمى ايتارلىقتاي تابىستى دامىپ كەلەدى. بۇگىندە اباي قالىپتاستىرعان ءداستۇر جاڭا تولقىن شىعارماشىلىعىندا جالعاسىن تاۋىپ كەلە جاتقانىنا كۋا بولىپ وتىرمىز.
انار رزاەۆ,
ازەربايجان جازۋشىلار وداعىنىڭ توراعاسى
