بوس ورىندار جارمەڭكەسى – ەلشىلىك جىل سايىن ۇيىمداستىراتىن ءىس-شارا. وندا ۇلىبريتانياداعى قازاقستاندىق ستۋدەنتتەر جەتەكشى قازاقستاندىق جانە حالىقارالىق جۇمىس بەرۋشى كومپانيالاردىڭ وكىلدەرىمەن تىكەلەي قارىم-قاتىناس جاساۋعا مۇمكىندىك الادى.
جارمەڭكەگە ۇلىبريتانيانىڭ تۇكپىر-تۇكپىرىنەن لوندونعا كەلگەن 130-دان استام قازاقستاندىق ستۋدەنت قاتىستى. ولاردىڭ كوبىسى ماگيسترلىك باعدارلاما بويىنشا وقيتىن «بولاشاق» حالىقارالىق ستيپەندياسىنىڭ يەگەرلەرى بولدى. جۇمىس بەرۋشىلەر رەتىندە بوس ورىندار جارمەڭكەسىنە «سامۇرىق-قازىنا» ۇاق» اق, «استانا» حالىقارالىق قارجى ورتالىعىنىڭ ۇزدىكسىز كاسىبي دامۋ بيۋروسى (احقو بيۋروسى), «BI Group» حولدينگى, سونداي-اق «Shell Kazakhstan» ەنەرگەتيكالىق كومپانياسى قاتىستى.
ءوز سوزىندە قازاقستاننىڭ ۇلىبريتانياداعى ەلشىسى ەرلان ىدىرىسوۆ مەملەكەت جاستاردى قولداۋ مەن ىلگەرىلەتۋگە ەرەكشە كوڭىل بولەتىنىن اتاپ ءوتتى. بۇل تۋرالى جاقىندا قۇرىلعان پرەزيدەنتتىك جاستار كادر رەزەرۆى, تۇڭعىش پرەزيدەنت – ەلباسى قورىنىڭ «ەل ءۇمىتى» جانە «قامقورلىق» باستامالارى جانە باسقا دا باعدارلامالار كۋالاندىرادى. ە.ىدىرىسوۆ سونداي-اق ەلشىلىك قازاقستاندىق ستۋدەنتتەر ءۇشىن ۇيىمداستىراتىن نەگىزگى ءىس-شارالار, ونىڭ ىشىندە تۇراقتى دامۋ مەن يننوۆاتسيالار بويىنشا ءۇشىنشى ورتالىق ازيا عىلىمي فورۋمى, زاڭگەرلەرگە ارنالعان ارنايى بوس جۇمىس ورىندار جارمەڭكەسى جانە ت.ب. ءىس-شارالار تۋرالى ايتىپ بەردى.
«Shell Kazakhstan» كومپانياسىنىڭ وكىلدەرى – ءوندىرىستى جەتىلدىرۋ جونىندەگى مەنەدجەر مەتيۋ مولينە جانە ۇكىمەتپەن جانە جۇرتشىلىقپەن بايلانىس جونىندەگى كەڭەسشى اسەل يبراەۆا – «Shell Graduate Programme» اتتى جاس ماماندارعا ارنالعان باعدارلامانىڭ ەگجەي-تەگجەيى تۋرالى اڭگىمەلەدى.
احقو بيۋروسى باس ديرەكتورىنىڭ ورىنباسارى اسەل كارىباي احقو قۇرىلىمى جانە وسى ۇيىمنىڭ ەكوجۇيەسىندەگى بيۋرونىڭ ءرولى, ستۋدەنتتەر ءۇشىن وقۋ جانە تاعىلىمدامادان ءوتۋ جۇيەسى تۋرالى اقپارات بەردى.
«سامۇرىق-قازىنا» ۇاق» اق وكىلدەرى قوردىڭ قىزمەتى, جۇمىسقا قابىلداۋ تالاپتارى مەن كەزەڭدەرى, «Samruk Qyzmetس بوس جۇمىس ورىندار ونلاين-پلاتفورماسى, سونداي-اق «جاس وركەن» جاس مامانداردى دامىتۋ باعدارلاماسى تۋرالى ايتىپ بەردى.
«BI Group» حولدينگى ديرەكتورىنىڭ ورىنباسارى باحتيار ءپىرماحانوۆ قازاقستاننىڭ ءىرى قۇرىلىس حولدينگتەرىنىڭ بىرىندەگى جۇمىس ينسايتتارىمەن ءبولىسىپ, ترەنينگتەر جۇيەسى تۋرالى ايتىپ, قىزمەتكەرلەردىڭ تاعىلىمگەردەن اكتسيونەرگە دەيىنگى ءوسۋدىڭ كورنەكى مىسالدارىن كەلتىردى.
رەسمي پرەزەنتاتسيالاردان كەيىن ءىس-شاراعا قاتىسۋشىلار جۇمىس بەرۋشى كومپانيالاردىڭ وكىلدەرىمەن جەكە تانىسىپ, سۇراقتار قويىپ, كەيستەر شەشۋگە قاتىسىپ, بوس جۇمىس ورىندارعا ورنالاسۋ ءۇشىن الدىن الا اڭگىمەلەسۋدەن ءوتۋ مۇمكىندىگىنە يە بولدى.
2021 جىلى قر ۇلىبريتانياداعى ەلشىلىگى قازاقستاندىق نارىقتا جۇمىس ىستەيتىن ءىرى بريتاندىق كومپانيالاردىڭ قاتىسۋىمەن كەزەكتى بوس ورىندار جارمەڭكەسىن وتكىزۋدى جوسپارلاپ وتىر. بۇل باستاما قازاقستاندىق وفيستەردە جەرگىلىكتى قىزمەتكەرلەردىڭ بولىگىن ارتتىرۋ بويىنشا مىندەتتەمەلەرىن ورىنداۋعا باعىتتالعان.
