سپورت • 10 اقپان، 2020

ارداق نازاروۆ: ءبىزدىڭ بۋىن جاستارعا جول اشتى

114 رەتكورسەتىلدى

ەلىمىزدە جاۋىنگەرلىك ونەردىڭ وركەندەۋىنە الاشتىڭ ماقتان تۇتار ۇلى ارداق نازاروۆتىڭ ايرىقشا ۇلەس قوسقانى انىق. ول – ەرەجەسىز جەكپە-جەكتەن الەمنىڭ ءۇش دۇركىن چەمپيونى، پانكراتيون مەن بۋشيدودان الەم كۋبوگىنىڭ يەگەرى، ەۋرازيا مەن ازيا بىرىنشىلىكتەرىنىڭ جەڭىمپازى. دجيۋ-دجيتسۋ مەن قويان-قولتىق ايقاستان دا بىرقاتار بيىك بەلەستەردى باعىندىردى. سونىمەن قاتار ايتۋلى ازامات وسكەلەڭ ۇرپاقتىڭ سىرتقى ساۋىتىنىڭ مىقتى بولۋىنا ءمان بەرىپ قانا قويماي، ولاردى ۇنەمى تانىم مەن تاعلىمعا باۋلىپ، وتانسۇيگىشتىك پەن يماندىلىققا تاربيەلەۋدە. جۋىردا الماتى شاھارىندا ارداق باۋىرىمىزبەن جۇزدەسۋدىڭ رەتى كەلدى.

– ارداق، ءسىز ۇلكەن سپورتپەن قوش ايتىسقانىڭىز جايىندا رەسمي تۇردە جاريا ەتكەن جوقسىز. الايدا، ايقاس الاڭىنان كورىنبەگەنىڭىزگە ءبىراز جىل­دىڭ ءجۇزى بولدى. قاتەلەسپەسەم، سوڭ­عى جەكپە-جەگىڭىزدى وسىدان سەگىز جىل بۇرىن وتكىزدىڭىز ەمەس پە؟...

– ءيا، ءداپ سولاي. 2011 جىلى لاس-ۆەگاستا اقش پەن قازاقستان قۇرا­مالارى اراسىندا ماتچتىق كەزدەسۋ ءوتتى. سول جارىستا مەن دەيۆ كۋرچەيندى ءبىرىنشى راۋندتا ۇرىپ جىقتىم. سودان بەرى ايقاس الاڭىنا شىققان جوقپىن.

– اقش پەن قازاقستان قۇراما­لارى اراسىنداعى سول باسەكە قالاي اياق­تالعان ەدى؟

– ءبىزدىڭ جىگىتتەر 4:1 ەسەبىمەن جە­ڭىسكە جەتتى. سول كوماندا ساپىندا مەنەن بولەك، بەكنار امانباەۆ، قازىبەك ءاشىموۆ، بەيبىت نازاروۆ جانە ناريمان مۇساەۆ ونەر كورسەتتى.

– ول كەزدە 31 جاستا ەدىڭىز. بۇل – كاسىپقوي سپورتشىلار ءۇشىن نا­عىز كەمەلدەنگەن شاق. ال ءسىز سۇيىك­تى ىسىڭىزدەن قول ءۇزىپ قالدىڭىز. وسىن­داي قادامعا سانالى تۇردە باردىڭىز با، الدە ءبىز بىلمەيتىن باسقا دا سەبەپتەر بولدى ما؟

– ءاۋ باستاعى ارمانىم اسقاق ەدى. كەمىندە الەمنىڭ بەس دۇركىن چەمپيو­نى اتانۋدى كوزدەدىم. الايدا، ءبارى ءبىز ويلاعانداي بولا بەرمەيدى ەكەن. ونىڭ ۇستىنە، شامامەن سول ۋاقىتتا الماتىدا قازاقتىڭ ءبىراز دارىندى جىگىتتەرىنىڭ باسىن قوسىپ، سپورت كلۋبىن اشتىق. وعان «الەم فايتەرس» دەگەن اتاۋ بەردىك. ونداعى ماقسات – جاس جەتكىنشەكتەر مەن جالىنداپ تۇرعان جاستاردىڭ ەش الاڭسىز جاتتىعۋىنا بارىنشا جاعداي جاساپ، ارتىمىزدان ەرگەن ىنىلەرىمىزگە ۇلكەن ارەنالارعا جول اشۋ. سەبەبى كەزىندە ءبىز قيىندىقتى كوپ كوردىك. توقسانىنشى جىلدارى ەلىمىزدە ەرەجەسىز جەكپە-جەككە دە­گەن قازىرگىدەي قىزىعۋشىلىقتىڭ بول­ماعانى بارشاعا ايان. قامقورلىق تا كەمشىن ەدى. باپكەرىم ساعاتبەك مۇ­ساحانوۆ ەكەۋىمىز جاتتىعۋ جاساۋ ءۇشىن ءجونى ءتۇزۋ جەر تاپپاي، الماتىنىڭ ءار قيى­رىن شارلاعانبىز. قارا كۇز بەن قاقاعان قىستا اشىق اسپان استىندا دايارلاندىق. ەسىك-تەرەزەلەرى سى­نىق، قابىرعالارى قيسايعان، تو­زىعى جەتكەن اسكەري بولىمشەدە جات­تىقتىق. ورتا مەكتەپ پەن كوللەدج­دەر، ءتۇرلى مەكەمەلەر، ينستيتۋتتار مەن ۋنيۆەرسيتەتتەردىڭ قۋىقتاي زالدا­رىن دا سان مارتە جالعا الدىق. بىز­دەن كەيىنگى جاستار وسىنداي ازاپتى كورمەسىن دەپ، كاسىبي سپورت كلۋبىن اشتىق. «الەم فايتەرستىڭ» تۇساۋى كەسىلگەننەن كەيىن كلۋب باسشىسى رە­تىندە بۇكىل اۋىرتپالىق ماعان ءتۇس­تى. دايارلىق پروتسەسى مەن وقۋ-جات­تىعۋ جيىندارىن وتكىزۋ، ءدۇبىرلى دودالاردى ۇيىمداستىرۋدان باستاپ، سپورتشىلاردىڭ شەت مەملەكەتتەرگە شى­عۋعا قاجەتتى قۇجاتتارىن دايىنداۋ، ولاردى قوناقۇيگە ورنالاستىرۋ جانە تاعى باسقا كوپتەگەن شارۋامەن تىكەلەي ءوزىمنىڭ شۇعىلدانۋىما تۋرا كەلدى. وسىلايشا سپورتتىق مانسابىمدى جالعاستىرۋعا مۇمكىندىك بولماي، ناعىز كەمەلدەنگەن شاعىمدا سۇيىكتى ىسىمنەن قول ءۇزىپ قالدىم.

– جالپى، ەرەجەسىز جەكپە-جەكتەن وتكەن جارىستاردا قانشا كەزدەسۋ وت­كىزىپ، سونىڭ نەشەۋىن ءوز پاي­دا­ڭىزعا شەشتىڭىز؟

– بارلىعى 25 رەت ايقاس الاڭىنا شى­عىپ، 22 مارتە جەڭىسكە جەتتىم. 20 باسەكەنى مەرزىمىنەن بۇرىن اياقتادىم. ەكى رەت ۇتىلىپ، تاعى ءبىر كەزدەسۋدە تەڭ ەسەپ تىركەلدى.

– ءوزىڭىزدى ەسىڭىزدە ەرەكشە ساق­تال­عان كەزدەسۋ؟

– بارلىق باسەكەلەر كۇنى بۇگىنگىدەي كوز الدىمدا. قازىر دە كىممەن قالاي ايقاسىپ، قانداي ءتاسىل قولدانعانىمدى سىزدەرگە ەش جاڭىلماي ايتىپ بەرە الا­مىن. ال مەنىڭ جادىمدا ەرەكشە ساقتالعانى – 2004 جىلى رەسەيدىڭ حابا­روۆسك قالاسىندا وتكەن الەم كۋ­بو­گى جولىنداعى جارىس. اقتىق سىن­دا مەن ارتۋر ۋماحانوۆقا قارسى شىق­تىم. «كيللەر» دەگەن لاقاپ اتپەن تا­نىلعان سپورتشى سوڭعى ەكى-ءۇش جىل اياسىندا ەشكىمگە ەسە جىبەرمەگەن ەكەن. ونىڭ ۇستىنە سپورت كەشەنىندە قاپتاعان كاۆكازدىقتار. ال ءبىز ەكەۋمىز عانا: باپ­كەرىم جانە مەن. ايقاس الاڭىنا شىق­قانىم سول ەدى، ءار بۇرىشتان شوۆينيستىك سيپاتتاعى اۋىر سوزدەر ەستىلدى. «قازاقتى ءولتىر!»، «يت تەرىسىن باسىنا قاپتا!»، «تۇگىن قالدىرما!» دەگەن داۋىستار زالدى جاڭعىرتىپ بارادى. قانىم باسىما شاپتى. سەگىز بۇرىشقا جۇلقىنىپ شىقتىم. ءبىراز ۋاقىت ءبىر-ءبىرىمىزدى الا المادىق. ءبىرىن­شى راۋند بەل ورتادان اسقان تۇستا قار­سىلاسىمدى جىعىپ الدىم دا، اۋىر-اۋى­ر سوققىلاردىڭ استىنا الدىم. ارتۋر­ ەسىنەن تانىپ قالدى. تورەشى جەك­پە-جەكتى دەرەۋ توقتاتتى. نوكاۋت! ساعات­بەك اعانىڭ سول كەزدە قۋانعانىن كورسەڭىز. باپكەرىم مەنى تىك كوتەرىپ الىپ، رينگتى شىر اينالا جۇگىردى. ال سونىڭ الدىندا عانا جەر تەپكىلەپ، ايباتتانىپ، نەبىر بالاعات سوزدەر ايتىپ وتىرعان كورەرمەندەردىڭ داۋىستارى سول مەزەتتە ساپ تيىلعان ەدى.

– كەي سپورتشىلاردىڭ اۋزىنان ءتۇرلى جارىستاردا وزدەرىنەن الدە­قايدا ەڭسەلى، ءىرى، سالماعى اۋىر قار­سى­لاستارمەن ايقاسۋعا تۋرا كەلگەنى جا­يىندا ارا-تۇرا ەستىپ ءجۇرمىز. سون­داي جاعداي ءسىزدىڭ دە باسىڭىزدان وتتە مە؟

– بەلگىلى ءبىر سپورتشىعا ارزان، ارامزا جولمەن اتاق الىپ بەرۋ ءۇشىن تورەشىلەردىڭ ءتۇرلى قيتۇرقى ارەكەت­تەرگە بارعانىن سان مارتە كورگەنبىز. ءبىر عانا مىسال، 2003 جىلى بىشكەكتە اسا ءىرى حالىقارالىق دودا ءوتتى. باس جۇلدەنى قالاي دا ءوز قانداستارىنا الىپ بەرۋدى ماقسات تۇتقان ۇيىمداستىرۋشىلار ما­عان قارسى قانجاربەك قىدىراليەۆتى شىعاردى. ونىڭ سالماعى – 93 كيلو. مەن – 70 كيلو شاماسىندامىن. وسىنداي كەلەڭسىزدىكتى كورەگەن باپكەرىم قا­زى­لار القاسىنا شاعىمداندى. ولار تۇك ەستىمەگەندەي، تاس كەرەڭ بولدى دا قالدى. ءبىز ءبىراز داۋلاسقان ەدىك، قىر­عىزدار «كەلىسپەسەڭدەر، ەل­دە­رىڭە قايتىڭدار!» دەپ اڭگىمەنى شورت كەستى. ەندى شەگىنۋگە جول جوق. «جا­­نىم ارىمنىڭ ساداعاسى» دەدىم دە، تا­­ۋەكەلگە بەل بۋدىم. العاشقى مي­نۋت­­تاردا اسىقپاي، قارسىلاسىمنىڭ شا­ما-شارقىن بايقاپ كوردىم. سالدەن كەيىن قارقىندى كۇرت كۇشەيتكەنىم سول ەدى، قانجاربەك قالجىراي باستادى. اقىرىندا ونى ۇرىپ جىعىپ، اۋىر نوكاۋتقا جىبەردىم.

– ءسىز قازاقتىڭ تاعى ءبىر قاي­سار ۇلى دانەش دۇڭگەنباەۆپەن ءبىر مەزگىلدە ونەر كورسەتتىڭىز. نە­سىنە جاسىرايىق، سول كەزدەرى قوس ساڭ­لاق­تىڭ ءبىر-بىرىمەن كۇش سىناسقان ءساتىن كورگىسى كەلگەن كورەرمەندەر كوپ ەدى...

– ءيا، ونداي اڭگىمەلەردىڭ ايتىلعانى راس. ەكەۋىمىزدى جەكپە-جەككە شىعارۋعا قۇلشىنعان ادامدار دا بولدى. بىراق مەن دانەشپەن ايقاسپايتىنىمدى بىردەن ايتتىم. ويتكەنى ءبىز بۇل ونەر­دىڭ قىر-سىرىنا ەندى قانىعا باس­تاعان تۇستا دۇڭگەنباەۆتىڭ داڭ­قى دۇر­كىرەپ تۇردى. ول قارسى كەلگەن­دەردىڭ بارلىعىن سىپىرا ۇتىپ ءجۇر­دى. ءوزى باق سىناعان باسەكەلەردىڭ بىر­دە-بىرىندە جەڭىلگەن ەمەس. وسى جايتتاردىڭ بارلىعىنا قانىق بولعان ءبىز «دانەشتەي بولساق قوي!» دەپ ارمان­دايتىنبىز. ونىڭ ۇستىنە، ول مەنەن باقانداي بەس جاس ۇلكەن. ال ءبىز ۇلكەندى سىيلايتىن، قادىرلەي بىلەتىن قازاق دەگەن تەكتى حالىقپىز! الاشتىڭ ءاربىر ازاماتى ءۇشىن «اعا!»، «باۋىر!»، «قۇرمەت!»، «ىزەت!»، «سىيلاستىق» دەگەن سوزدەر بوس ۇعىم ەمەس. ءبىز اركەز ءوز ءجونىمىزدى، ءوز جولىمىزدى بىلگەنبىز. الدىڭعى بۋىن اعالارىمىزدى قادىر­لەيمىز، قاستەرلەيمىز، الاقانعا سالىپ ايا­لايمىز. مەنى دە اتا-انام وسىلاي تاربيەلەدى. وسى قاسيەتتەردىڭ بار­لىعىن بالا كەزىمنەن بويىما ءسىڭىرىپ ءوستىم. سوندىقتان دا، باسكە ات باسىنداي التىن تىگىلسە دە، مەن ەشۋا­قىتتا دانەشتىڭ جاعاسىنا جارماس­پايتىن ەدىم. ال ەگەر دە الدەبىر جارىستا ەكەۋىمىزدىڭ جولىمىز تۇيىسكەن جاعدايدا مەن ەش ويلانباستان جەڭىستى اعاما بەرەتىن ەدىم.

– وسى اڭگىمەڭىزدى ەستي وتىرىپ، وسىدان بىرەر جىل بۇرىن قىتايدا بول­عان وقيعا ەسىمە ءتۇستى. اسپاناستى ەلىندە وتكەن جارىستا قازاقتىڭ قوس ورەنى ءبىر-بىرىمەن توبەلەسۋدەن باس تارتقان ەدى عوي. ول جايتتان ءسىز دە قۇلاعدار شىعارسىز؟

– ارينە! 2016 جىلدىڭ كوكتەمىندە شانحايدىڭ ماڭىنداعى شاھارلاردىڭ بىرىندە جالاۋى جەلبىرەگەن جارىستا قىتايدا تۇرىپ جاتقان قانداسىمىز عابيت تۇرحانبەك پەن ءبىزدىڭ ەلدەن بارعان ايبەك نۇرسەيىت باس جۇلدەنى ءوزارا ساراپقا سالۋعا ءتيىس ەدى. ەكەۋى وكتاگونعا شىقتى. الايدا، ولار ءبىر-بىرىنە سوققى جۇمساماي، ەش ءادىس-ءتاسىل قولدانباي، ۋاقىت سوزىپ ءجۇرىپ الدى. سونى بايقاعان قازىلار قاتاڭ ۇكىمى شىعارىپ، ولاردى جارىستان شەتتەتتى. دەسەك تە قوس قازاقتىڭ بۇل «تىرلىگىنە» بارشا جانكۇيەرلەر قاتتى ريزا بولدى. وسى ورايدا، مىنا ءبىر جايتتى ايتسام، ەش ايىبى جوق دەپ ويلايمىن. نەگىزى بۇل وقيعانىڭ ءدال وسىلاي اياق­تالۋىنا مەنىڭ تۋعان باۋىرىم بەي­بىتتىڭ دە تىكەلەي قاتىسى بار. عابيت پەن ايبەك شەشۋشى باسەكەگە شىعار الدىندا بەيبىت ولارعا «جات جەردىڭ جانكۇيەرلەرىن قۋانتۋ ءۇشىن قازاقتىڭ ورىمدەي قوس ازاماتى ءبىر-ءبىرىن قان جوسا ەتىپ ساباپ جاتقانى – ۇيات تىرلىك. اينالىپ كەلگەندە، بارلىعىمىز ءبى­رىمىز-بىرىمىزگە باۋىرمىز. قانداي جاع­داي بولسا دا، ءار قازاق ءبىر-ءبىرىن قۇر­مەتتەۋى كەرەك. ەگەر اقىلىمدى تىڭ­داساڭدار، ايقاسپاي-اق قويىڭدار!» دەپ ءتىل قاتتى. ەكەۋى دە ازامات ەكەن. بەيبىتتىڭ اقىلىنا قۇلاق اسقان عابيت پەن ايبەك الىسىپ-ج ۇلىسپاي-اق، ماسەلەنى «بەيبىت تۇردە» شەشتى.

– وسىدان بىرەر اي بۇ­رىن امە­ري­كالىق «تيتان» جانە قازاق­­ستان­دىق «الەم فايتەرس» كلۋب­تارىنىڭ ۇيىمداستىرۋىمەن الما­تىدا ءدۇبىر­لى دودا وتكەنى ءمالىم. ەگەر سول جارىس­تا ءبىزدىڭ جىگىتتەر جە­ڭىسكە جەتكەندە، ولار­عا UFC-گە جول اشىلار ما ەدى؟

– UFC مەن «تيتان» توننىڭ ىشكى باۋىنداي ارالاسىپ، بىرەر جىلدان بەرى قويان-قولتىق جۇمىس ىستەپ كە­لەدى. «تيتاننان» شىققان 80-نەن اسا سپورتشىنىڭ الەمدەگى ەڭ بەلدى ۇيىم­نىڭ قاتارىنا قابىلدانۋى وسى ءسوزى­م­نىڭ ايقىن دالەلى! سول سەبەپتى دە قازاق جىگىتتەرىنىڭ قارىم-قابىلەتىن باي­قاپ كورسىن دەگەن نيەتپەن ءبىز ولاردى قازاقستانعا ارنايى شاقىرىپ، كەرەمەت كەشتىڭ وتۋىنە مۇرىندىق بولدىق. «تيتان» باسشىلارىنىڭ باستى نازارى بەيبىتكە اۋدى. سونىمەن قاتار قازىبەك ءاشىموۆ پەن نۇرجان تۇتقانىڭ دا UFC-مەن كەلسىمشارت جاساسۋعا مۇمكىندىكتەرى بولدى. سول ماق­ساتقا قول جەتكىزۋ ءۇشىن قانداس­تارىمىز الماتىدا وزدەرىنىڭ مىق­تىلىعىن مويىنداتۋعا ءتيىس ەدى. بىراق بۇل مۇمكىندىكتى ۇتىمدى پايدالانا ال­مادىق.

– وسى ءۇش قانداسىمىزدىڭ ارا­سىنان كوپتەن بەرى كوزگە ءتۇسىپ جۇرگەن بەيبىت نازاروۆ ەكەنىنە ەش­كىمنىڭ داۋى جوق. باۋىرىڭىزدىڭ الما­تى­داعى جارىستىڭ باستى جەكپە-جە­گىندە اتوي سالۋىنا نە كەدەرگى بولدى دەپ ويلايسىز؟

– قىرسىق دەگەن اياق استىنان ەمەس پە. سالماق ولشەۋ ءراسىمى قارسا­ڭىندا بەيبىت قاپيادا جاراقات الىپ قالدى. اياعى كۇپ بولىپ ءىسىپ، سىنىقشىنىڭ كومەگىنە جۇگىندىك. الايدا، جارىستىڭ باستالۋىنا نەبارى ءبىر كۇن عانا قالعاندا شىققان توبىق پەن شىتىناعان اياقتى قالپىنا كەل­تىرۋ مۇمكىن بولمادى. سول كەزدە جەك­پە-جەكتەن باس تارتۋعا دا بولار ەدى. بىراق ءبىز ءدۇيىم جۇرتتان ۇيالدىق. الماتىداعى جارىستى ۇيىمداستىرۋ ءۇشىن كوپ ۋاقىتىمىز بەن كۇش-جىگەر كەتتى، مول قارجى جۇمسادىق. ونىڭ ۇس­تىنە كەشتىڭ باستى جەكپە-جەگىندە بەي­بىت نازاروۆتىڭ شىعاتىنىن الدىن-الا جارنامالاپ تا قويدىق. باسەكەگە تۇسۋدەن باس تارتساق، جانكۇيەرلەر ءبىز­دى دۇرىس تۇسىنبەي قالۋى دا مۇمكىن عوي. سودان جۇرەكسىندىك. امالدىڭ جوق­تىعىنان تاۋەكەلگە بارۋعا تۋرا كەلدى. بىراق كوزدەگەن ماقساتىمىزعا قول جەت­كىزە المادىق. دەسەك تە ءبىز ەشتەڭەگە وكىنبەيمىز. مويىمايمىز دا. ءبارى دە ءبىر عانا اللانىڭ قالاۋىمەن جۇزەگە اسادى. بۇگىن بولماسا دا، ەرتەڭگى كۇنى ول جوسپار جۇزەگە اسادى. تەك بىزگە ءالى كوپ ەڭبەكتەنۋ كەرەك. نيەت پەن پيعىل، تالاپ پەن قۇلشىنىس جانە ۇستانعان باعىتىمىز دۇرىس بولسا، باعىنبايتىن بەلەس جوق. ءبىز وعان كامىل سەنەمىز.

– «الەم فايتەرس» كلۋبىنىڭ قا­زىرگى تىنىس-تىرشىلىگى قالاي؟ ول جەر­دە قانشا سپورتشى جاتتى­عۋدا؟ وزدە­رىڭىزدىڭ جەكە سپورت عيما­رات­تارىڭىز بار ما؟

– «الەم فايتەرستە» 100-دەن اسا جاس ورەندەر جاتتىعۋدا. ولاردىڭ الدى الەم چەمپيونى اتانىپ تا ۇلگەردى. ءتۇر­لى جارىستاردا جۇلدە الىپ، مايتالمان مامانداردىڭ نازارىنا ىلىك­كەن جەتكىنشەكتەر دە جەتەرلىك. رەس­پۋبليكا اۋماعىندا بىرنەشە تۋرنير ۇيىمداستىردىق. ءبىزدىڭ جىگىتتەر جەك­پە-جەكتىڭ سان ءتۇرى بويىنشا شەت مەم­لەكەتەرگە دە شىعىپ ءجۇر. ازىرگە جەكە عيماراتىمىز جوق. جالعا العان زالدا جاتتىعامىز. الايدا، كەزىندە قالا اكىمدىگى تاراپىنان «الماتى ارە­نانىڭ» ماڭىنان بىزگە ءبىراز جەر تەلىمى بەرىلگەن ەدى. سول جەردە امبەباپ سپورت كەشەنىن سالۋدى كوزدەپ وتىرمىز. قۇ­رىلىس جۇمىستارىن باستاپ، ءبىرىنشى قاباتىن تۇرعىزىپ تا ۇلگەردىك.

– ەرەجەسىز جەكپە-جەك ونەرىن سەرىك ەتىپ جۇرگەن قازىرگى قازاق جىگىت­تەرى اراسىنان كىمدەردىڭ ونەرى سىزگە ۇنايدى؟

– اللاعا شۇكىر، جاقسى جىگىتتەر بار. ءبىزدىڭ بۋىن وكىلدەرى باستاعان جول كەيىنگى جاستارعا جۇعىستى بولدى. قىتايدان جۇمابەك تۇرسىن جانە رەسەيدەن دامير يسماعۇلوۆ شىقتى. ولاردىڭ ءىزىن باسىپ قازاقستاندىق شاۆقات راحمونوۆ UFC-گە جول تارتتى. ارينە، بۇل جاعداي بارشا قازاق جان­كۇيەرلەرىن قۋانتۋدا. الداعى ۋا­قىتتا ارمان وسپانوۆ، قايرات اح­مە­توۆ، جالعاس جۇماعۇلوۆ، قۋات حاميتوۆ، اسۋ الماباەۆ باستاعان قارا­كوزدە­رىمىزدىڭ قالىڭ لەگى الىستاعى امە­ريكادا وزدەرىن مويىنداتىپ جاتسا، بۇكىل الاش جۇرتىنىڭ ابىرويى اسقاق­تايتىن ەدى...

– اڭگىمەڭىزگە راحمەت.

اڭگىمەلەسكەن

عالىم سۇلەيمەن،

«Egemen Qazaqstan»

 

الماتى

 

سوڭعى جاڭالىقتار

ەرلىكتى دارىپتەيتىن قوماقتى قور

رۋحانيات • 05 ماۋسىم، 2020

ۇقساس جاڭالىقتار