قۇرمەتتى قازاقستاندىقتار!
بۇگىن تۇندە جامبىل وبلىسى قورداي اۋدانىندا جەرگىلىكتى تۇرعىندار اراسىندا جاپپاي توبەلەس, جانجال بولدى.
بۇل احۋالدى ارانداتۋشىلار ءوز ماقساتىنا پايدالاندى. وكىنىشكە قاراي, بۇل وقيعا كەزىندە ادام شىعىنى بولدى.
مەن قازا بولعان ازاماتتاردىڭ وتباسىلارىنا كوڭىل ايتامىن. زارداپ شەككەندەردىڭ تەزىرەك ساۋىعىپ كەتۋىنە تىلەكتەسپىن.
قازىر پوليتسيا مەن ۇلتتىق ۇلان بۇل جاعدايدى باقىلاۋعا الدى.
وسىعان وراي, مەن ۇكىمەت كوميسسياسىن قۇرۋدى تاپسىردىم.
وعان پرەمەر-ءمينيستردىڭ ورىنباسارى بەردىبەك ماشبەك ۇلى ساپارباەۆ توراعالىق ەتەدى.
ۇكىمەت كوميسسياسى بولعان وقيعانىڭ سەبەبىن انىقتايدى.
جامبىل وبلىسى اكىمىمەن بىرلەسىپ, قازا بولعانداردى جەرلەۋ, زارداپ شەككەندەرگە كومەكتەسۋ جۇمىستارىن ۇيىمداستىرادى.
سونداي-اق جاعدايدى تۇراقتاندىرۋمەن اينالىسادى.
قوعامدىق ءتارتىپتى بۇزعاندار انىقتالىپ, قاتاڭ جاۋاپقا تارتىلاتىن بولادى.
باس پروكۋراتۋراعا, ۇلتتىق قاۋىپسىزدىك كوميتەتىنە ءتيىستى تاپسىرما بەردىم.
مەملەكەتىمىزدىڭ مۇددەسىنە زيان كەلتىرەتىن, بەرەكە-بىرلىگىمىزدى بۇزاتىن جانە جالعان اقپارات تاراتقان ازاماتتار زاڭ الدىندا جاۋاپ بەرەدى.
مەملەكەتتىك ورگاندارعا وسى اۋىر كيكىلجىڭنىڭ سالدارىن جويۋ بويىنشا شۇعىل شارالار قابىلداۋ قاجەت.
وسىعان بايلانىستى مىنالاردى تاپسىرامىن:
ءبىرىنشى, پرەمەر-ءمينيستردىڭ ورىنباسارى بەردىبەك ماشبەك ۇلى ساپارباەۆتىڭ توراعالىعىمەن قورداي اۋدانىنداعى وقيعالاردىڭ سالدارىن جويۋ بويىنشا ۇكىمەتتىك كوميسسيا قۇرۋ.
الدىمەن جانجالدىڭ نەگىزگى سەبەپتەرىن انىقتاۋ كەرەك.
الەۋمەتتىك-ەكونوميكالىق جانە گۋمانيتارلىق سيپاتتاعى ماسەلەلەردى جەدەل شەشۋدى قامتاماسىز ەتۋ قاجەت.
ۇكىمەتتىك كوميسسيا جامبىل وبلىسىنىڭ اكىمىمەن بىرلەسىپ قازا تاپقانداردى جەرلەۋدى ۇيىمداستىرۋى, شىعىننىڭ كولەمىن انىقتاپ, زارداپ شەككەندەردىڭ مەنشىگىن قالپىنا كەلتىرۋ جوسپارىن قابىلداۋى ءتيىس.
بارلىق قازا تاپقاندار مەن جارالانعانداردىڭ وتباسىنا قاجەتتى كومەك كورسەتۋ كەرەك.
قازىر تۇرعىنداردى تىنىشتاندىرۋ ماڭىزدى. بۇل جۇمىسقا بەدەلدى ادامدار, سونداي-اق قازاقستان حالقى اسسامبلەياسى تارتىلسىن.
ەكىنشى. باس پروكۋرورعا قورداي اۋدانىنداعى وقيعالاردى تەكسەرۋدى ەرەكشە باقىلاۋعا الۋ جانە بۇل ءۇشىن ۆەدومستۆوارالىق جەدەل-تەرگەۋ توبىن قۇرۋ قاجەت.
كىنالىلەر قاتاڭ جازالانۋى ءتيىس.
ءۇشىنشى. ۇلتتىق قاۋىپسىزدىك كوميتەتى, باس پروكۋراتۋرا قاجەتتى تەرگەۋ ءىس-شارالارىن جۇرگىزىپ, ۇلتارالىق ارازدىققا شاقىرعانداردى, ارانداتۋشىلىق قاۋەسەتتەر مەن جالعان اقپاراتتار تاراتقانداردى جاۋاپكەرشىلىككە تارتۋلارى ءتيىس.
قادىرلى وتانداستار!
بەيبىتشىلىك پەن قوعامدىق كەلىسىم – ءبىزدىڭ مەملەكەتىمىزدىڭ بەرىك نەگىزى.
حالقىمىز قيىن-قىستاۋ زامانداردا ءوزىنىڭ بىرتۇتاستىعىن ساقتاپ قالعان.
سوندىقتان ءبىز كەيبىر ازاماتتارعا, سونىڭ ىشىندە ارانداتۋشىلارعا ەلىمىزدىڭ باستى قۇندىلىعىن – ىنتىماق-بىرلىگىمىزدى بۇزۋعا جول بەرمەيمىز.
بۇل ەلىمىزدەگى بارشا ازاماتقا ورتاق تىلەك دەپ سانايمىن.
ازاماتتاردى جالعان قاۋەسەتتەرگە بوي الدىرماۋعا, قوعامدىق قاۋىپسىزدىكتى قامتاماسىز ەتۋ جۇمىسىندا قۇقىق قورعاۋ ورگاندارىنا كومەك بەرۋگە شاقىرامىن.
مەملەكەتتىك ورگاندار تۋىنداعان ماسەلەلەردى شەشۋ ءۇشىن بارلىق قاجەتتى شارانى قابىلدايدى.
