ءىس-شارا جۇمىسىنا دەپۋتاتتارمەن قاتار مەملەكەتتىك ورگانداردىڭ, پارلامەنتتىك ەمەس ساياسي پارتيالاردىڭ, قاۋىمداستىقتار مەن قوعامدىق بىرلەستىكتەردىڭ, «اتامەكەن» ۇلتتىق كاسىپكەرلەر پالاتاسىنىڭ وكىلدەرى جانە ساراپشىلار قاتىستى.
تاقىرىپ بويىنشا ساۋدا جانە ينتەگراتسيا ۆيتسە-ءمينيسترى قايرات تورەباەۆ باياندادى. زاڭ جوباسىنا ۇسىنىلىپ وتىرعان زاڭنامالىق تۇزەتۋلەر پاكەتى ۇكىمەتتىك ەمەس ۇيىمداردىڭ, ءوزىن-ءوزى رەتتەۋ جانە قوعامدىق باقىلاۋ ينستيتۋتتارىنىڭ ءرولىن كۇشەيتە وتىرىپ, تۇتىنۋشىلار قۇقىعىن قورعاۋدىڭ تۇتاس جانە ءتيىمدى جۇيەسىن قالىپتاستىرۋعا باعىتتالعان.
تۇجىرىمدامالىق نەگىز رەتىندە تۇتىنۋشىلاردىڭ قۇقىقتارىن قورعاۋدىڭ ارالاس مودەلى الىنعان, وندا مەملەكەت «اقىلدى» اكىمشىلەندىرۋمەن شەكتەلەدى, ال بۇزىلعان قۇقىقتاردى قالپىنا كەلتىرۋمەن سوتقا دەيىنگى رەتتەۋ ينستيتۋتتارى اينالىسادى. ۆيتسە-ءمينيستردىڭ ايتۋىنشا, بۇگىنگى تاڭدا تۇتىنۋشىلاردىڭ قۇقىقتارىن قورعاۋدىڭ ۇلتتىق جۇيەسى بارلىق مەملەكەتتىك ورگاندار مەن 208 ۇكىمەتتىك ەمەس ۇيىمداردىڭ جۇمىسىن قامتيدى. الايدا, ءوزارا ءىس-قيمىلدىڭ ناقتى رەتتەلمەۋى, جۇيەنىڭ ءاربىر قاتىسۋشىسىنىڭ ءرولى مەن مارتەبەسىن بەكىتۋ مەملەكەتتىك ساياساتتىڭ تۇتاس قالىپتاسۋىن, تيىسىنشە, ءبىزدىڭ حالقىمىزدىڭ قۇقىقتارىن قورعاۋدىڭ ساپالى دەڭگەيىن قامتاماسىز ەتپەيدى.
نەگىزگى پروبلەمالىق ماسەلەلەرگە توقتالا كەلە, ق.تورەباەۆ قولدانىستاعى جۇيە كوبىنە اكىمشىلىك شارالارعا باعىتتالىپ, بۇزىلعان قۇقىقتاردى قالپىنا كەلتىرۋگە نەمقۇرايلى قارايتىنىن ايتتى.
بۇل تۇتىنۋشىلاردىڭ قۇقىقتارىن قورعاۋدىڭ قاراپايىم جانە تۇسىنىكتى الگوريتمىنىڭ جوقتىعىمەن جانە تۇتىنۋشىلاردىڭ قاراپايىم قۇقىقتارىن بۇزعانى ءۇشىن كاسىپكەرلەردىڭ جازالانباۋىمەن بايلانىستى. زاڭ جوباسىندا وسى ماسەلەلەردى شەشۋ ءۇشىن تۇتىنۋشىلاردىڭ قۇقىقتارىن قورعاۋدىڭ ينستيتۋتسيونالدى جۇيەسىن بەكىتۋ قاراستىرىلعان.
سونداي-اق زاڭ جوباسىمەن شاعىمداردى قاراۋدىڭ ءۇش ساتىلى جۇيەسىن ەنگىزۋ كوزدەلگەن. I-دەڭگەيدە ساتۋشىنىڭ شاعىمدى مىندەتتى تۇردە 10 كۇندىك قاراۋ مەرزىمدە قاراۋىن ەنگىزۋدى ۇسىنامىز. بۇل رەتتە ۋاكىلەتتى ورگاننىڭ جانە سوتقا دەيىنگى رەتتەۋ ينستيتۋتتارىنىڭ بايلانىستارى تاۋارلاردى, جۇمىستار جانە قىزمەتتەردى ۇسىناتىن جەرلەردە ورنالاستىرىلۋى كەرەك. II-دەڭگەيدە - شاعىم داۋلاردى سوتقا دەيىنگى قاراۋ ينستيتۋتتارىنا نە ۋاكىلەتتى ورگانعا كەلىپ تۇسەدى. سوتقا دەيىنگى رەتتەۋ ينستيتۋتتارىن ىنتالاندىرۋ ماقساتىندا زاڭ جوباسىندا داۋ سوتقا دەيىنگى تارتىپپەن شەشىلگەن جاعدايدا, كاسىپكەرلەردى اكىمشىلىك جاۋاپكەرشىلىكتەن بوساتۋ مۇمكىندىگى قاراستىرىلعان. III-دەڭگەيدە شاعىم سوتتا قارالادى. وسىلايشا, داۋ-دامايلاردىڭ باسىم بولىگى ءبىرىنشى دەڭگەيدە, ياعني, ساتۋشىمەن تالقىلاۋ ساتىسىندا شەشىلىپ, ونىڭ قوعام الدىنداعى الەۋمەتتىك جاۋاپكەرشىلىگىن جانە ساتىپ الۋشىنىڭ الدىنداعى ماتەريالدىق جاۋاپكەرشىلىگىن ارتتىرادى, - دەدى ق.تورەباەۆ.
زاڭ جوباسىنداعى ۇسىنىلىپ وتىرعان تاعى ءبىر جاڭالىق - ء«بىر تەرەزە» قاعيداتى بويىنشا شاعىمداردى قابىلداۋدىڭ بىرىڭعاي اقپاراتتىق جۇيەسىن قۇرۋ بولىپ تابىلادى. مۇنداي جۇيەنى قۇرۋ شاعىمدى دايىنداۋ جانە ونى قۇزىرلى ورگاندارعا جولداۋ راسىمدەرىن جەڭىلدەتۋگە جانە ارزانداتۋعا, سونداي-اق, بارلىق وتىنىشتەر مەن ولاردى قاراۋ ناتيجەلەرىن تسيفرلاندىرۋعا مۇمكىندىك بەرەدى.
ودان باسقا ۇكىمەتتىك ەمەس ۇيىمداردى قولداۋ ماقساتىندا قولدانىستاعى قۇزىرەت اياسىندا تۇتىنۋشىلاردىڭ قوعامدىق بىرلەستىكتەرى مەن زاڭ كەڭەسشىلەرى پالاتالارىنا تارالاتىن مەملەكەتتىك الەۋمەتتىك تاپسىرىس تاقىرىبى كەڭەيتىلدى.
اقىسىز قورعاۋ قىزمەتتەرى قيىن جاعدايعا تاپ بولعان تۇتىنۋشىلارعا, مۇگەدەكتەرگە, زەينەتكەرلەرگە, ۇوس قاتىسۋشىلارىنا جانە ت.ب كورسەتىلەدى. تانىستىرىلىم بارىسىندا ايتىلعان ۇسىنىستار مەن ەسكەرتۋلەر ودان ءارى ءماجىلىس دەپۋتاتى, ەكونوميكالىق رەفورما جانە وڭىرلىك دامۋ كوميتەتىنىڭ حاتشىسى مەرۋەرت قازبەكوۆا جەتەكشىلىك ەتەتىن جۇمىس توبىنىڭ وتىرىستارىندا قارالاتىن بولادى.
