ورداباسى اۋدانىنداعى توقسانساي ەلدى مەكەنىندە 130 گەكتار ءتالىم جەرگە يزرايلدىك سۋعارۋسىز تەحنولوگيا ارقىلى «سitrullus Lanatus» قاربىز كوشەتى وتىرعىزىلىپ, 23 توننا ءونىم الىندى. بۇل ءونىم تۇگەلدەي اقش-قا ەكسپورتتالعان. وسىنداي جاڭاشىلدىقتاردى ۇيرەنۋگە بولادى.
تۇركىستان وبلىسىنىڭ اكىمى ومىرزاق شوكەەۆ ورداباسى اۋدانىنىڭ اكىمى الىپبەك وسەرباەۆتىڭ حالىققا ەسەپ بەرۋ كەزدەسۋىندە وسىلاي دەدى. وبلىس اكىمى ايتقان جوبانىڭ تيىمدىلىگى ءىس جۇزىندە دالەلىن تاپقاندىقتان, بيىل قاجىمۇقان اۋىل وكرۋگىندە 387 گەكتارعا قاربىزدىڭ اتالمىش سۇرپىن ەگۋ جوسپارلانىپ وتىر. اۋداننىڭ وتكەن جىلعى شىعىسى مەن كىرىسىن جىكتەپ, ەسەپ بەرگەن اۋدان اكىمى الداعى ۋاقىتتا ەكونوميكاعا سەرپىن بەرەتىن ماڭىزدى جوسپارلارمەن دە ءبولىستى. مىسالى, 2020 جىلى جالپى ينۆەستيتسيالىق قۇنى 97 ملرد تەڭگەدەن استام, 600-گە جۋىق ادامدى جۇمىسپەن قامتيتىن پلاستماسسا جانە مۇناي-حيميا ونىمدەرىن وندىرۋگە باعىتتالعان 4 جوبانى ىسكە اسىرۋ كوزدەلىپ وتىر. ال اۋداننىڭ ءونىم كولەمى بىلتىر 79, 2 ملرد تەڭگەنى قۇراعان. كىرىستىڭ باسىم بولىگى ونەركاسىپ پەن اۋىلشارۋاشىلىعى سالاسىنا تيەسىلى. ءا. وسەرباەۆ اۋداندا بۇگىندە تاماق ونەركاسىبى, فارماتسەۆتيكا, مەتاللۋرگيا, ماشينا جاساۋ, قۇرىلىس سالاسى مەن كەن ءوندىرۋ ونەركاسىبى سىندى كاسىپتەرمەن اينالىساتىن 35 كاسىپورىن جۇمىس ىستەيتىنىن اتاپ ءوتتى. كاسىپورىندار بىلتىر 19 ملرد 251 ملن تەڭگەنiڭ ءونىمىن وندىرگەن. ايتا كەتەرلىگى, وڭدەۋ ونەركاسىبىنىڭ ۇلەسى باسىم. ونەركاسىپ سالاسىنداعى ءونىمنىڭ 89,9 پايىزى شيكىزات ەمەس, دايىن تاۋار رەتىندە شىعارىلعان.
«اۋىل شارۋاشىلىعى سالاسىنا توقتالساق, ەگىس كولەمى الدەقايدا ارتىپ 65 374 گەكتارعا جەتكىزىلگەن. كوبىنەسە سۋدى از قاجەت ەتەتىن داقىلدارعا كوڭىل ءبولىنىپ وتىر. سوڭعى جىلدارى اۋدان اۋماعىندا جىلىجاي سالۋعا نيەت بىلدىرۋشىلەردىڭ دە قاتارى ارتقان. بىلتىر جالپى كولەمى 72 گەكتار بولاتىن جىلىجايلاردان 8 580,3 توننا ءونىم جينالدى», - دەدى اۋدان اكىمى ءا.وسەرباەۆ.
ەسەپتىك جيىندى قورىتىندىلاعان وبلىس اكىمى ءو.شوكەەۆ باسشىنىڭ جۇمىسىنا باعانى حالىق بەرەتىنىن, ءاربىر اكىم بيزنەسپەن ءبىر تىلدە سويلەسە ءبىلۋى كەرەكتىگىن ايتتى.
