دەپارتامەنت باسشىسى ءوز ءسوزىن وتكەن جىلداعى جەدەل ءىس-شارالاردى قورىتىندىلاۋدان باستادى. «2018 جىلمەن سالىستىرعاندا قىلمىستار سانى 5720-عا ازايدى. ادام ءولتىرۋ, اۋىر دەنە جاراقاتىن جاساۋ, توناۋ, بۇزاقىلىق, ۇرلىق سەكىلدى قىلمىس تۇرلەرى از تىركەلدى. قوعامدىق ورىندارداعى قىلمىستار سانى 38,6%-عا, كامەلەتكە تولماعاندار اراسىنداعى قۇقىق بۇزۋشىلىقتار 10,7%-عا كەمىدى. قىلمىستىڭ بارلىق ساناتتارى بويىنشا ءىستى انىقتاۋ جۇمىسى جاقساردى», - دەدى ەرجان سادەنوۆ.
تۇرعىندارمەن كەزدەسۋ بارىسىندا دەپارتامەنت باسشىسى قوعاممەن ءوزارا بايلانىس ورناتۋ, پوليتسيا قىزمەتىنىڭ اشىقتىعىن قامتاماسىز ەتۋ جونىندە ءسوز قوزعادى.
«قازىر اۋداندىق پوليتسيا بولىمدەرىنە حالىققا قىزمەت كورسەتۋ ورتالىقتارى سەكىلدى كەز كەلگەن ازامات بارىپ, قاجەتتى كەڭەستەر الاتىن «فرونت-وفيستەر» قۇرىلدى. «حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرۋ اياسىندا الەۋمەتتىك جەلىلەردە بەلسەندى جۇمىس جاسالىپ, تۇرعىندارعا قاتىستى اقپاراتتى ورنالاستىراتىن ۆەدومستۆولىق سايتتار مەن اككاۋنتتار اشىلدى. سونىمەن قاتار پوليتسيا دەپارتامەنتىنىڭ باسشىلىعى اپتا سايىن ازاماتتاردى قابىلدايدى, وندا انىقتالعان پروبلەمالاردى شەشۋ بويىنشا ناقتى شارالار قابىلدانادى» دەدى ول.
ەرجان سادەنوۆتىڭ ايتۋىنشا, پوليتسيا قۇقىق قورعاۋ فۋنكتسيالارىن جۇزەگە اسىرۋمەن قاتار, حالىققا ءتۇرلى مەملەكەتتىك قىزمەت تۇرلەرىن دە ۇسىنادى.
«وتكەن جىلى 1 ميلليون 300 مىڭ قىزمەت كورسەتىلدى. ولاردىڭ قاتارىندا تۇرعىلىقتى جەرى بويىنشا تىركەۋ, قارۋدى تىركەۋ, جەكە كۋالىكتەر مەن تولقۇجاتتاردى راسىمدەۋ, مەكەنجاي انىقتامالارى جانە تاعى باسقا قىزمەتتەر بار», - دەدى ول.
پوليتسيا دەپارتامەنتىنىڭ باسشىسى قىلمىستىڭ الدىن الۋ شارالارىنا توقتالىپ ءوتتى. بۇل رەتتە كونسەرجدەر, جەدەل ارەكەت ەتەتىن جاستار بولىمشەلەرى, قاۋىپسىزدىك ورگاندارى, قوعامدىق كەڭەستەر, ۆولونتەرلەر ايتارلىقتاي كومەك كورسەتتى. ولاردىڭ كومەگىمەن 8 قىلمىس اشىلىپ, 1600 اكىمشىلىك قۇقىقبۇزۋشىلىق انىقتالدى. جىل قورىتىندىسى بويىنشا قۇقىق قورعاۋ ورگاندارىنا بەلسەندى قاتىسقانى ءۇشىن 400-دەن استام كومەكشى ماراپاتتالدى.
ەرجان سادەنوۆ ۇرلىق, ەسىرتكى قىلمىسى, ماس كۇيىندە كولىك جۇرگىزۋ ءۇشىن جاۋاپكەرشىلىكتىڭ كۇشەيتىلگەنىن ەسكە سالدى. ونىڭ ايتۋىنشا, بەلسەندى ازاماتتاردىڭ ارقاسىندا ەسىرتكى جارناماسى تۋرالى 131 حابارلاما ءتۇستى. پيك جانە ۇەۇ وكىلدەرىمەن بىرگە ەسىرتكى سايتتارىنىڭ مەكەنجايى جازىلعان 400 گراففيتي-جازبا الىنىپ تاستالدى, 20-دان استام ادام جاۋاپقا تارتىلدى. ەسەپتى اياقتاعاننان كەيىن دەپارتامەنت باسشىسى ازاماتتاردىڭ بارلىق سۇراقتارىنا, سونىڭ ىشىندە الەۋمەتتىك جەلىلەر ارقىلى قويىلعان سۇراقتارعا جاۋاپ بەردى. تۇرعىنداردى ۋاقىتشا تىركەۋ, جول قاۋىپسىزدىگى, قالا ماڭىندا قوسىمشا باعدارشامداردى ورناتۋعا بايلانىستى ماسەلەلەر قىزىقتىردى. اڭشىلىقپەن اينالىساتىن ادامدار قارۋدى ساتىپ الۋعا, ساقتاۋعا جانە جەتكىزۋگە قىزىعۋشىلىق تانىتتى.
سونىمەن قاتار استانالىقتاردى تۇرعىن الاپتارىنداعى جانە قالا ماڭىنداعى اۋداندارعا بەينەكامەرالار ورناتۋ ماسەلەلەرى تولعاندىردى. الاياقتىق تۋرالى شاعىمدار قابىلداندى. كەزدەسۋ سوڭىندا ەرجان سادەنوۆ بارلىق ازاماتتارعا بەلسەندى قاتىسقاندارى ءۇشىن العىس ءبىلدىرىپ, پوليتسيا جۇمىسىنىڭ باستى ماقساتى قىلمىسپەن كۇرەس پەن قوعامدىق ءتارتىپتى ساقتاۋ ەكەندىگىن اتاپ ءوتتى.
