پالاتانىڭ كاسىپكەرلىكتى قارجىلىق ەمەس قولداۋ ءبولىمىنىڭ ساراپشىسى زارينا شايمەردەنوۆانىڭ ايتۋىنشا, بىلتىر «Altyn Design» جشس, «فەنيكس» جيھاز فابريكاسى», SP GLOBAL GAS جەتەكشىلەرى Aلتىن اتەەۆا, ساپار قۇداباەۆ, سۆەتلانا پاۆلوۆالار «ىسكەرلىك بايلانىستار» جوباسى بويىنشا وقىپ, تاجىريبەدەن ءوتتى. الدىمەن جوباعا قاتىسۋشىلار وبلىس ورتالىعىندا وتەتىن ءۇش اپتالىق كۋرسقا قاتىسادى. ولارعا وتاندىق جانە شەتەلدىك بيزنەس-ترەنەرلەر تاۋاردى ساتۋ, كەلىسسوزدەر جۇرگىزۋ باعىتتارىندا ءدارىس وقيدى. سونىمەن قاتار WhatsApp الەۋمەتتىك جەلىسىندەگى توپتا ۆەبينار جۇرگىزىلەدى. وقۋ كۋرسىنىڭ سوڭىندا قاتىسۋشىلارعا سەرتيفيكاتتار تابىستالادى. وقۋدان وتكەن كاسىپكەرلەر ەكىنشى كەزەڭگە, ياعني گەرمانياداعى تاعىلىمداماعا قاتىسۋ ءۇشىن ءتيىستى قۇجاتتاردى تاپسىرىپ, بيزنەس-جوسپار ازىرلەيدى. سونىمەن قاتار كاسىپكەرلەرگە قولداۋ كورسەتۋ ورتالىعى 3963 كاسىپكەرگە كومەك كورسەتسە, 10 358 ادامعا كەڭەس بەرگەن.
– كاسىپكەرلەر پالاتاسى «بيزنەستىڭ جول كارتاسى-2020» مەملەكەتتىك باعدارلاماسىنىڭ ءتورتىنشى باعىتىن جۇزەگە اسىرۋ شەڭبەرىندە بىرنەشە باعىت بويىنشا قارجىلىق ەمەس قولداۋ كورسەتەدى, – دەيدى زارينا شايمەردەنوۆا. – بۇل كاسىپكەرلىكتى جۇرگىزۋگە سەرۆيستىك قولداۋ كورسەتۋ, كاسىپكەرلىكتى اقپاراتتىق-ساراپتامالىق قامتاماسىز ەتۋ, بيزنەس-مەكتەپ, ىسكەرلىك بايلانىستار جانە اعا سەنورلار كومپونەنتى باعىتتارى. جالپى, شاعىن جانە ورتا بيزنەس نىساندارى اراسىندا ىسكەرلىك بايلانىستار جانە اعا سەنورلار جوبالارى سۇرانىسقا يە.
اتى ايتىپ تۇرعانداي, «ىسكەرلىك بايلانىستار» باعىتى شەتەلدىك سەرىكتەستەرمەن ىسكەرلىك بايلانىستار ورناتۋعا باعىتتالسا, «اعا سەنورلار» جوباسى اياسىندا كاسىپكەر جوعارى بىلىكتى ماماندى شەتەلدەن الدىرتىپ, تەحنولوگيالاردى يگەرە الادى. مىسالى, «اعا سەنورلاردىڭ» ءۇش ساراپشىلىق جوباسى «پاۆلودار جىلىجاي كومبيناتى» جشس, «اقسۋ جىلىجاي كومبيناتى» جشس, «Jet Logistics» جشس كاسىپورىندارىنا جاسالدى. جىلىجايلاردىڭ تەحنيكالىق جابدىقتالۋىنا ساراپشىلىق جوبانى كانادادان كەلگەن عىلىم دوكتورى پرەم كارباندا جۇرگىزدى. ال «Jet Logistics» جشس كاسىپورنىنا كەلگەن پەر گلوت اتتى ساراپشى باسشىلىق قۇرامىنا ءوندىرىستى باسقارۋدىڭ جاڭا ادىستەرىن ەنگىزۋ, لوگيستيكا, ستراتەگيالىق جوسپارلاۋدى وڭتايلاندىرۋدى ۇيرەتىپ, قىزمەتكەرلەر وقۋ كۋرستارىنان ءوتتى.
شەتەلدىك ماماندار «ستانوكتار الەمى» جشس, «RWS Binding» جشس, «چەرنوياركا مارجانى» جشس, «تەحنولوگيالار جەلىسى» جشس-ءنىڭ وندىرىستىك ستراتەگياسىن وزگەرتۋگە قاتىستى, بولات قۇيۋدان شەبەرلىك ساباقتارىن بەردى. سونداي-اق بولات قۇيۋ فورمالارىن وزگەرتىپ, كاسىپورىنداردىڭ دامۋى ءۇشىن بىرقاتار ۇسىنىمدار جاسادى. مىسالى, گەرمانيادان كەلگەن ساراپشى ناتاليا مايەر ەگدە تارتقان ادامدارعا ارنالعان وڭالتۋ جۇمىستارىمەن اينالىساتىن «چەرنوياركا مارجانى» جشس-نا قولداۋ كورسەتتى. قازىر بۇل جوبا مەملەكەت-جەكەمەنشىك ارىپتەستىگى جوباسى اياسىندا جۇزەگە اسۋدا. سونىمەن بىرگە «ىسكەرلىك بايلانىستار» جوباسى اياسىندا ءوز ەلىمىزدە وقۋ ترەنينگتەرىنەن ءوتىپ, گەرمانيادا تاعىلىمدامادا بولعان كاسىپكەرلەر بار. مىسالى, جىبەك ماتاعا قولمەن جازىلعان ورنەك جاساۋشى «Altyn Design» جشس باسشىسى, قولونەرشى Aلتىن اتەەۆا اتالعان جوبانىڭ يگىلىگىن كورىپ وتىر.
– 2018 جىلى كاسىپكەرلىك پالاتاسى «ىسكەرلىك بايلانىستار» باعدارلاماسىنا قاتىسۋدى ۇسىندى, – دەيدى التىن اتەەۆا. – مەن ءوز جوبامدى ۇسىنىپ, وقۋدان ءوتتىم. كەيىن شاقىرتۋ الىپ, جوبانى ۇيىمداستىرۋشىلارمەن كەزدەستىم. وعان گەرمانيادان كەلگەن وكىلدەر دە قاتىستى. ولار بىزبەن اڭگىمەلەسىپ, جەكە كاسىبىمىز تۋرالى سۇرادى.
جالپى, قاتىسۋشىلار «اتامەكەن» ۇلتتىق كاسىپكەرلەر پالاتاسىنىڭ نۇر-سۇلتان قالاسىنداعى ورتالىق اپپاراتىندا اڭگىمەلەسۋدەن وتەدى. ناتيجەسىندە ەلىمىز بويىنشا ونداعان كاسىپكەر ىرىكتەلىپ, شەتەلدىك ارىپتەستەرىمەن تاجىريبە الماسۋ مۇمكىندىگىنە يە بولادى. بۇل ماقساتتا «اتامەكەن» ۇلتتىق كاسىپكەرلەر پالاتاسى مەن گەرمانيالىق ورتالىق اراسىندا ءوزارا كەلىسىمشارت جاسالعان. قاتىسۋشىلاردىڭ بارىپ-قايتۋى, وقۋى, تاعىلىمدامادان ءوتۋى, بارلىعى تەگىن. كاسىپكەرلەردىڭ گەرمانيادا 4 اپتا بويى كاسىپورىندارعا بارىپ, ترەنينگتەرگە قاتىسۋىنا قاجەتتى قاراجاتتى مەملەكەت وتەيدى. گەرمانيالىق مامانداردىڭ شەبەرلىك ساعاتتارى ورىس جانە اعىلشىن تىلدەرىندە وتەدى. كاسىپكەردىڭ ايتۋىنشا, گەرمانيادا تاعىلىمدامادان ءوتۋ ءىرى كومپانيالاردىڭ جۇمىسىن كورۋگە, بيزنەس-جوبالاردى قۇرۋعا, بيزنەس-كەلىسسوزدەردى ساۋاتتى جۇرگىزۋگە جانە شەتەلدىك بيزنەس-سەرىكتەستەردى تابۋعا مۇمكىندىك بەردى.
– ءبىز شەتەل كومپانيالارمەن كەلىسىمشارت جاساستىق, – دەيدى التىن اتەەۆا. – ءبىر اي ىشىندە وننان استام فابريكا مەن زاۋىتقا بارىپ كەزدەسۋلەر وتكىزدىم.
بيىل جەرگىلىكتى «تريكوتا-ج» جشس باسشىسى دا گەرمانياعا بارىپ تاجىريبەدەن وتپەك.
– كاسىپكەر ءۇشىن تاعىلىمدامادان ءوتۋ – دامۋعا قاراي بەت بۇرۋ دەگەن ءسوز. گەرمانيانىڭ بيزنەس-موتيۆاتورلارى ءبىزدى ءونىم ءوندىرۋدى جەتىلدىرۋگە ىنتالاندىرادى, – دەيدى كاسىپكەرلەر.
ال «ىسكەرلىك بايلانىستار» جوباسى قولعا الىنعان 2016 جىلدان باستاپ وڭىردەن 80-گە جۋىق كاسىپكەر تاجىريبە الماسىپ, بىلىكتىلىگىن جەتىلدىردى. بىلتىر جوبانىڭ العاشقى كەزەڭىندە 37 كاسىپكەر وقىپ كەلگەن. گەرمانيادا تاعىلىمدامادان وتكەن كاسىپكەرلەرمەن ارنايى كەلىسىمشارت جاسالادى. ولار باسشىلىق ەتەتىن كاسىپورىنداردىڭ ءبىر جىلعى جۇمىسىنا مونيتورينگ جۇرگىزىلەدى. جارتى جىلدا ءبىر رەت نارىق اۋقىمىنىڭ كەڭەيۋى, قۋاتتىڭ ارتۋى, بايلانىستار ورناتۋ, كەلىسسوزدەر جۇرگىزۋ جانە تاعى باسقا باعىتتار بويىنشا ەسەپ بەرەدى. بۇگىندە كاسىپورىننىڭ تابىستى بولۋى يننوۆاتسيالاردى دامىتۋ, جاڭا تەحنولوگيالاردى ەنگىزۋ, باسقارۋ ادىستەرىن قولدانۋ مەن بيزنەستى وڭتايلاندىرۋدا ەكەنىن كەز كەلگەن كاسىپكەر جەتە تۇسىنەدى.
پاۆلودار وبلىسى
