وسى ىزگى مۇراتتار باعىتىندا ۇلى حاكىم ابايدىڭ تۋعانىنا 175 جىل تولۋ قارساڭىندا پرەزيدەنت قاسىم-جومارت توقاەۆتىڭ «اباي جانە XXI عاسىرداعى قازاقستان» اتتى ماقالاسى جاريالانىپ, قازاقستاندىقتاردىڭ قىزۋ قولداۋىنا يە بولدى. بۇل ورايدا مەملەكەت باسشىسى ق.توقاەۆتىڭ اباي مۇرالارىنىڭ ءمانى جونىندەگى باعدارلامالىق سوزدەرى وركەندى دامۋىمىزدا باعدارشامداي باعدار كورسەتەدى. «اقىن ەل-جۇرتىن ءتۇرلى ونەردى يگەرۋگە ۇگىتتەدى. سونىڭ ءبارى ۋاقىتتىڭ تالابى ەكەنىن ول انىق اڭعارىپ, ۇلتىنا ەرتەرەك ءۇن قاتتى. ءتىپتى قازىر ايتىپ جۇرگەن ينتەللەكتۋالدى ۇلت قالىپتاستىرۋ يدەياسى ابايدان باستاۋ الدى دەۋگە بولادى. ۇلى ويشىل ءار سوزىمەن ۇلتتىڭ ورەسىن ءوسىرۋدى كوزدەدى».
مىنە, وسى ماقساتقا قىزمەت ەتەتىن ەلىمىزدەگى كوپتەگەن عىلىمي ۇيىمداردىڭ ءبىرى – بعم عك قاراستى اقپاراتتىق جانە ەسەپتەۋىش تەحنولوگيالار ينستيتۋتى دا «اباي جانە XXI عاسىرداعى قازاقستان» اتتى ماقالا يدەيالارىن باسشىلىققا الىپ, ۇلى ابايدىڭ 175 جىلدىعىنا تانىمدىق-تالىمدىك ءىس-شارالار بەلگىلەپ اتقارۋدا.
قوعامىمىزدى اقپاراتتاندىرۋدى مودەلدەۋ, ونى باسقارۋ سالالارىندا ىرگەلى زەرتتەۋلەر مەن قولدانبالى ازىرلەمەلەر جاساۋ ماقساتىندا جۇمىس ىستەيتىن عىلىمي-زەرتتەۋ ينستيتۋتى دا تۇپتەپ كەلگەندە, ەلىمىزدە ينتەللەكتۋالدى ۇلت قالىپتاستىرۋعا سەپتىك ەتەدى.
ۇلى اباي دا ۇنەمى ەلدىڭ العا جىلجۋىنا, ءوسىپ-وركەندەۋىنە تىلەۋلەس بولىپ, ءوز شىعارمالارىندا وسى يدەيانى بارىنشا ناسيحات ەتتى. ىلگەرىلەۋدىڭ نەگىزى ءبىلىم مەن عىلىم ەكەنىن ايتتى. اباي قازاقتىڭ دامىلسىز وقىپ-ۇيرەنگەنىن بار جان-تانىمەن قالادى. عۇلامانىڭ بۇل ويلارى بۇگىن دە وزەكتى ەكەنىن مەملەكەت باسشىسى ق.توقاەۆ: «XXI عاسىرداعى عىلىمنىڭ ماقساتى بيىككە ۇمتىلۋ, الىسقا قۇلاش سەرمەۋ ەكەنىن كورىپ وتىرمىز», دەپ جازدى.
بۇل جولدا عىلىمي الەۋەتتىلىكپەن بىرگە ونىڭ يەلەرى – عالىمداردىڭ دا جەكە باسىنىڭ ەرىك-جىگەرى, رۋحاني مىقتىلىعى ماڭىزدى.
اەتي قىزمەتكەرلەرىنىڭ, اسىرەسە, جاس عالىمدارىمىزدىڭ, دوكتورانتتار مەن ماگيسترانتتارىمىزدىڭ قاتىسۋىمەن «ابايدى تانۋ – ءوزىڭدى تانۋ, ەلدى تانۋ» ايدارىندا ادەبيەت زەرتتەۋشىلەرىمەن كەزدەسۋلەر, ءوزارا دەباتتار, وقىرماندار كونفەرەنتسيالارىن, دوڭگەلەك ۇستەلدەر ۇيىمداستىرۋدى جوسپارلاپ وتىر.
يدەيالار – قوعامدى, سونداي-اق ونىڭ مۇشەلەرىن دە قوزعايتىن كۇش. اباي يدەيالارىن دا ينتەللەكتۋالدى ۇلت قالىپتاستىرۋدا العا ۇمتىلدىرۋشى كۇش دەپ تانيمىز. جاس عالىمدارىمىزدى عىلىم شىڭدارىنا تالپىندىرىپ, ابايمەن اقىلداسۋعا تالاپتاندىرىپ وتىرامىز. بۇل ىزگى نيەتتەرىمىز اباي جىلىمەن شەكتەلمەي, عىلىمي ءومىر سالتىنا اينالۋىنا قول جەتكىزۋ – اسىل مۇراتىمىز دەپ بىلەمىز. «نۇرلى اقىل, ىستىق قايرات, جىلى جۇرەك» ءاربىر عالىمنىڭ ادامي-ازاماتتىق سيپاتى بولۋىنا ۇمتىلىپ كەلەمىز.
قورىتا ايتقاندا, اباي: «تەگىندە ادام بالاسى ادام بالاسىنان اقىل, عىلىم, ار, مىنەز دەگەن نارسەلەرمەن وزباق» دەپ, عىلىمدى ادامدىقتىڭ باسىم سيپاتتارىنىڭ ءبىرى ەتىپ كورسەتەدى, ونى الدىڭعى ورىنعا شىعارادى. وتىز ءبىرىنشى قارا سوزىندە «اقىل مەن عىلىمدى توزدىراتىن» ۋايىمسىزدىق, سالعىرتتىق, ويىنشىل-كۇلكىشىلدىك, يا ءبىر قايعىعا سالىنۋ, يا ءبىر نارسەگە قۇمارلىقتىڭ پايدا بولۋى سياقتى وي كەسەلدەرىنەن ساقتاندىرادى. ول ءۇشىن: «ادام كوڭىلى شىن مەيىرلەنسە, ءبىلىم, عىلىمنىڭ ءوزى دە تەزىرەك قولعا تۇسەدى» دەپ, عىلىمعا ىنتالى, تالاپتى, تاباندى بولۋعا شاقىرادى. ال ءبىلىم مەن عىلىم – ينتەللەكتۋالدى ۇلت قالىپتاستىرۋدىڭ باستى قۇرامى ەكەنى ايان.
ماقسات قاليمولداەۆ,
قر بعم عك اقپاراتتىق جانە ەسەپتەۋىش تەحنولوگيالار ينستيتۋتىنىڭ باس ديرەكتورى
