بىلتىر ەمدىك سۋدان شيپا ىزدەپ كەلگەن تۋريستەر 123 مىڭنان اسسا, بيىل ولاردىڭ سانى 15%-عا ارتادى دەپ كۇتىلۋدە. بۇل ماقساتتا ناقتى جوسپارلار بەكىتىلگەن.
بۇگىندە اۋداندا 40-قا جۋىق ساۋىقتىرۋ شيپاجايى, بالالار شيپاجايلارى, گولف كلۋبتار مەن 20-دان استام قوناقۇي قىزمەت كورسەتەدى. سونداي-اق اۋداندا اۋىل شارۋاشىلىعى سالاسى دا قارقىندى دامىپ كەلەدى. اۋدان اكىمى مۇحيت وتارشيەۆتىڭ مالىمدەۋىنشە, بىلتىر جالپى ءونىم كولەمى 77 ملرد. تەڭگەدەن اسقان.
الداعى ۋاقىتتا ەگىستىك القابى 65 مىڭ گەكتارعا ۇلعايتىلىپ, جىلىجاي شارۋاشىلىعى مەن تامشىلاتىپ سۋارۋ ءادىسىن قوسىمشا 400 گەكتار جەرگە جاڭادان ەندىرۋ جۇمىستارى جۇرگىزىلمەك. اسىرەسە, جەمىس-جيدەك ونىمدەرىن ءوسىرۋدى كەڭەيتۋ كوزدەلۋدە. بۇل دەرەكتەر سارىاعاش اۋدانى اكىمىنىڭ جىلدىق جۇمىس قورىتىندىسى بويىنشا تۇرعىندارعا بەرگەن ەسەبىندە كەلتىرىلدى.
ەسەپتىك جيىننان سوڭ وبلىس باسشىسى ومىرزاق شوكەەۆ سارىاعاش اۋدانىنىڭ تۇرعىندارىن قابىلداپ, وتىنىشتەرىن تىڭدادى. اۋدان اقساقالدارى اۋىزسۋ جانە سۋارمالى سۋمەن قامتاماسىز ەتۋ, حالىق سانىنىڭ وسۋىنە بايلانىستى مەكتەپ سالۋ سەكىلدى ماسەلەلەردى كوتەردى. وبلىس اكىمى ول ماسەلەلەر بويىنشا جاۋاپتى سالا جەتەكشىلەرىنە ناقتى تاپسىرمالار بەردى.
تۇركىستان وبلىسى
