م. تىلەۋبەردى ءوز سوزىندە ورتالىق ازيا مەملەكەتتەرىنىڭ وڭىرلىك ءوزارا ءىس-قيمىلىنىڭ نىعايۋىنا باسا نازار اۋدارىپ, نۇر-سۇلتان مەن تاشكەنتتە وتكىزىلگەن ايماق ەلدەرى كوشباسشىلارىنىڭ كونسۋلتاتيۆتىك كەزدەسۋلەرىنىڭ جوعارى ناتيجەلىلىگىن ەرەكشە اتاپ ءوتتى. كەزدەسۋگە قاتىسۋشىلار ەكونوميكا, ەنەرگەتيكا, قورشاعان ورتانى قورعاۋ جانە قاۋىپسىزدىك سالاسىنداعى وڭىرلىك ىنتىماقتاستىقتى تەرەڭدەتۋدىڭ ماڭىزدىلىعىن اتاپ ءوتتى.
«اقش حالىقارالىق دامۋىن قارجىلاندىرۋ كورپوراتسياسى ورتالىق ازياعا امەريكالىق ينۆەستيتسيالاردىڭ اعىنىن جانداندىرۋعا كومەك كورسەتە الادى. قازاقستانداعى امەريكا اگەنتتىگىنىڭ سەرىكتەسى رەتىندە «استانا» حالىقارالىق قارجى ورتالىعىنىڭ الاڭىن ۇسىنامىز», - دەدى م. تىلەۋبەردى.
مينيستر ءوڭىردىڭ ترانزيتتىك-كولىكتىك مۇمكىندىكتەرىن دامىتۋ قاجەتتىلىگىنە, سونداي-اق, قۇرىلاتىن ورتالىق ازيا وڭىرلىك ەنەرگەتيكالىق نارىعىنىڭ الەۋەتىنە نازار اۋداردى. بۇل سالاداعى باستامالاردى ىسكە اسىرۋ ءۇشىن پلاتفورما رەتىندە قازاقستان ءسىم باسشىسى حالىقارالىق جاسىل تەحنولوگيالار مەن ينۆەستيتسيالىق جوبالار ورتالىعىن پايدالانۋدى ۇسىندى.
مينيسترلىك كەزدەسۋدىڭ قورىتىندىسى بويىنشا «C5+1» ايماقتىق كۇن تارتىبىندەگى باسىم ماسەلەلەر كورسەتىلگەن بىرلەسكەن مالىمدەمە قابىلداندى.
«س5+1» فورماتى ورتالىق ازيا مەن اقش ەلدەرى اراسىنداعى ءوزارا ءىس-قيمىلدىڭ وڭىرلىك تەتىگى بولىپ تابىلادى. 2015 جىلعى 26 قىركۇيەكتە نيۋ-يوركتەگى بۇۇ باس اسسامبلەياسىنىڭ الاڭىندا التى ەلدىڭ سىرتقى ساياسي ۆەدومستۆولارى باسشىلارىنىڭ كەزدەسۋى ءوتتى. سىرتقى ىستەر مينيسترلەرى دەڭگەيىندە جەتى وتىرىس ءوتتى.
