وليمپياداعا بارلىق ءوڭىر مەن رەسپۋبليكالىق ءبىلىم بەرۋ ۇيىمدارى بويىنشا جالپى سانى 122 وقۋشى قاتىستى. ۇلى اقىننىڭ باي مۇراسىن جاس ۇرپاق ساناسىنا تەرەڭ ءارى جان-جاقتى ءسىڭىرىپ, ونەگە مەن تاربيەنىڭ التىن قازىعىنا اينالدىرۋدى كوزدەگەن وليمپيادانىڭ نەگىزگى ماقساتى م.اۋەزوۆتىڭ «اباي جولى» رومان-ەپوپەياسىن تولىق مەڭگەرۋ ارقىلى كەمەڭگەردىڭ اقىندىق بولمىسىنا ۇڭىلۋگە, ابايدىڭ شىعارماشىلىق ومىرىنەن عيبرات الىپ, ومىردە قولدانا الۋعا جول سىلتەۋ زياتكەرلىك جانە شىعارماشىلىق قابىلەتتەرىن دامىتۋعا باعىتتالعان.
وليمپيادانىڭ نەگىزگى مىندەتى – اباي ولەڭدەرىنىڭ ءمان-ماڭىزى مەن قادىر-قاسيەتىن تۇسىنۋگە بەيىمدەۋ, حاكىم قارا سوزدەرىنىڭ تاربيەلىك-تاعىلىمدىق ماڭىزىن مەڭگەرۋ, ابايشا ويلاۋعا ۇمتىلۋ, سويلەۋ مادەنيەتىن ۇيرەنۋگە, ءتىل تازالىعىن ساقتاۋعا داعدىلانۋ جانە كۇندەلىكتى ومىردە قولدانۋ.
وليمپيادا ەكى اينالىمدا ءوتتى. ءبىرىنشى اينالىمدا قاتىسۋشى اباي قارا سوزدەرى مەن پوەزياسى نەگىزىندە دايىندالعان تاقىرىپتاردىڭ بىرىنە ەسسە جازسا, ەكىنشى اينالىمدا قاتىسۋشى م.اۋەزوۆتىڭ «اباي جولى» رومانىنان بەرىلگەن ءۇزىندىنىڭ قاي تاراۋ, بولىمنەن الىنعانىن ايتىپ, مازمۇنىن جالعاستىردى جانە رومان مازمۇنىنان «سوكراتتىق» سۇراقتار بەرىلىپ, لوگيكالىق دەڭگەيى تەكسەرىلدى. سونداي-اق اباي شىعارماشىلىعى بويىنشا دايىندالعان تاپسىرمالارعا جاۋاپ بەردى. ونىڭ ىشىندە ولەڭنىڭ ادام ومىرىندەگى ورنىن, اقىننىڭ شىعارماشىلىقتاعى ماقساتىن اباي ولەڭدەرىمەن دالەلدەدى. ال اباي پوەزياسىن قالاي مەڭگەرگەنىن بايقاۋ بارىسىندا اقىن ولەڭدەرىنىڭ قۇرىلىسىنداعى ەرەكشەلىكتەردى انىقتاپ, قازاق پوەزياسىنا قوسقان جاڭالىعىن دالەلدەدى. سونىمەن بىرگە اباي ىلىمىنە وقۋشى ءوز كوزقاراسىن ءبىلدىردى. مىسالى, اباي ايتقان «بەس اسىل ءىستىڭ» بۇگىنگى وزەكتىلىگى تۋرالى, حاكىمنىڭ حالقىنا قانداي جول ۇسىنعانى تۋرالى ءوز وي-پىكىرلەرىن ايتتى. جانە ابايتانۋشىلار جايلى جالپى ءبىلىمىن كورسەتىپ, «اباي جولى» رومانىنان الىنعان سويلەمگە كەشەندى تالداۋ جاساۋ ارقىلى گرامماتيكالىق ساۋاتتىلىعىن كورسەتتى.
ءىس-شارانىڭ اشىلۋ سالتاناتىندا اباي اتىنداعى رەسپۋبليكالىق مەكتەپ-ينتەرنات ديرەكتورى ر.سەكسەنوۆا ءىى رەسپۋبليكالىق ابايتانۋ وليمپياداسىنىڭ باستالۋىمەن قاتىسۋشىلاردى قۇتتىقتاپ, ولارعا اق جول تىلەدى. بايقاۋعا «دارىن» رەسپۋبليكالىق عىلىمي پراكتيكالىق ورتالىعىنان كەلگەن گاجدەمبەك تۇرسىنوۆ توراعالىق ەتتى. وقۋشىلار ءبىلىم سايىسىنا قاتىسىپ جاتقاندا مەكتەپ ۇستازدارى, «ۇزدىك پەداگوگ-2019» رەسپۋبليكالىق بايقاۋىنىڭ جەڭىمپازدارى جانار ابيتوۆا جانە دينارا ورىنباەۆا قاتىسۋشىلاردىڭ جەتەكشىلەرىنە «اباي شىعارمالارى ارقىلى وقۋشىلاردىڭ فۋنكتسيونالدىق ساۋاتتىلىعىن قالىپتاستىرۋ» اتتى كوۋچينگ-سەمينار وتكىزىپ, ارنايى سەرتيفيكات بەرىلدى. سونىمەن قاتار نازارباەۆ زياتكەرلىك مەكتەبىنىڭ ساراپشى-مۇعالىمى ن.نۇرعاليەۆ جاڭارتىلعان باعدارلاما اياسىندا ء«فورماتيۆتى باعالاۋ» تاقىرىبىندا كۆەست-سەمينار وتكىزدى. كەشكە ءبىلىم سايىسىنىڭ قاتىسۋشىلارى مەن جەتەكشىلەرى م.اۋەزوۆ اتىنداعى دراما تەاترىنا «ولجا» پرەمەراسىن تاماشالاۋعا باردى. سونداي-اق مەكتەپ-ينتەرناتتىڭ ابايتانۋ بولمەسىندە «اباي مۇراسى» كورمەسى ۇيىمداستىرىلدى.
وسى ىسپەتتى مازمۇندى ءىس-شارالارىمەن ەرەكشەلەنگەن وليمپيادانىڭ قورىتىندىسى بويىنشا باعىن سىناعان 122 وقۋشىنىڭ ىشىنەن 63 قاتىسۋشى جۇلدەلى ورىن يەلەندى. ءى ورىن يەگەرلەرىنە سىيلىققا پلانشەت, ءىى ورىن يەگەرلەرىنە Smart ساعات جانە ءىىى ورىن يەگەرلەرىنە دىبىس ۇلعايتقىش بەرىلدى. ءىى رەسپۋبليكالىق ابايتانۋ وليمپياداسىندا ەرەكشە بەلسەندىلىك تانىتقان قاتىسۋشىلارعا العىس حات, گراموتا جانە كىتاپتار تابىستالدى. وليمپيادانىڭ وتكىزىلۋىنە دەمەۋشىلىك كورسەتكەن قانات بورانقۇلوۆ, امانجول رىسمەنديەۆ مەكتەپ تۇلەكتەرى ەكەنىن ايتا كەتكەن ءلازىم.
رەسپۋبليكا كولەمىندە وتكەن ءبىلىم جارىسىنىڭ قاتىسۋشىلارى وليمپيادا بارىسىندا ۇلى اقىننىڭ مول مۇراسىمەن سۋسىنداپ, اباي قارا سوزدەرىنىڭ تاربيەلىك-تاعىلىمدىق ماڭىزىن مەڭگەرىپ, اباي مۇراسىن ناسيحاتتاۋعا ءوز ۇلەستەرىن قوسقاندارىنا ريزاشىلىعىن ءبىلدىرىپ قايتتى.
