ب.بايبەك ءبىرىنشى كەزەكتە پارتيانىڭ اتىراۋ وبلىستىق اۋرۋحاناسىنداعى «ىنتىماق» باستاۋىش ۇيىمى مۇشەلەرىمەن كەزدەسۋدەن باستادى. پارتيا توراعاسىنىڭ ءبىرىنشى ورىنباسارى كەزدەسۋدە پارتيا مۇشەلەرىنىڭ ەلەۋلى بولىگىن الەۋمەتتىك سالا قىزمەتكەرلەرى قۇرايتىنىن اتاپ ءوتىپ, قاراپايىم دارىگەرلەر مەن مەديتسينا قىزمەتكەرلەرىنىڭ الەۋمەتتىك جاعدايىن جاقسارتۋ, دارىگەرلەردىڭ ەڭبەگىن ورىندى باعالاۋ جايىنا ەگجەي-تەگجەيلى توقتالدى. ء«بىز دارىگەرلەر ەڭبەگىن, وسى سالاداعى جاسالىپ جاتقان جۇمىستاردى حالىققا ءتۇسىندىرۋىمىز قاجەت», دەدى ب.بايبەك.
سونىمەن قاتار مەملەكەتىمىز تاراپىنان مەديتسينا سالاسىندا اتقارىلىپ جاتقان اۋقىمدى ىستەر مەن كورسەتىلىپ وتىرعان قوماقتى قولداۋ دا تىلگە تيەك ەتىلدى. ونىڭ ايتۋىنشا, ەلباسى, Nur Otan پارتياسىنىڭ توراعاسى نۇرسۇلتان نازارباەۆ پارتيانىڭ حVIII سەزىندە العاشقى مەديتسينالىق سانيتارلىق كومەكتى دامىتۋعا قوسىمشا 120 ملرد تەڭگە ءبولۋدى تاپسىرعان. وتكەن جىلى مەملەكەت باسشىسى قاسىم-جومارت توقاەۆ قازاقستان حالقىنا جولداۋىندا ءۇش جىلدىق بيۋدجەت اياسىندا دەنساۋلىق سالاسىنىڭ دامۋىنا قوسىمشا 2,3 ترلن تەڭگە قارجى بولىنەتىنىن ايتتى. سونىڭ ناتيجەسىندە 2019 جىلى دەنساۋلىق ساقتاۋ قىزمەتكەرلەرىنىڭ ەڭبەكاقىسى ءىشىنارا 30%-عا كوتەرىلدى. اتىراۋ وبلىسى بويىنشا 8 مىڭنان استام قىزمەتكەردىڭ جالاقىسى وسكەن. ال 2020 جىلدىڭ قاڭتارىنان باستاپ دارىگەرلەردىڭ جالاقىلارى ورتا ەسەپپەن 30%-عا ءوستى.
دارىگەرلەر قاۋىمىمەن كەزدەسۋدە وڭىردەگى وزەكتى ماسەلەلەر دە نازاردان تىس قالمادى. سولاردىڭ قاتارىندا نارەستەلەر ءولىم-ءجىتىمىنىڭ ارتۋى دا اتالدى.
كەزدەسۋدە دارىگەرلەر دە توسىلماي, ءوز ۇسىنىستارى مەن ويلارىن ورتاعا سالدى. سولاردىڭ قاتارىندا جاس دارىگەرلەردى تۇرعىن ۇيمەن قامتاماسىز ەتۋ, دارىگەرلەرگە پەداگوگتار سەكىلدى ەرەكشە مارتەبە بەرۋ جايىن قاراستىرۋ جايى ءسوز بولدى.
ساپارىن ءارى قاراي جالعاستىرعان باۋىرجان بايبەك ءوڭىردىڭ زيالىلارىنا ارنايى ات باسىن بۇردى. ەلدىڭ ءسوز ۇستار تۇلعالارىمەن بولعان بۇل كەزدەسۋدە ءوڭىر رۋحانياتىنا, مادەنيەتىنە, ءدىن مەن تىلگە قاتىستى وزەكتى ماسەلەلەر قوزعالىپ, جان-جاقتى تالقىلاندى. ءوز سوزىندە ب.بايبەك پارتيانىڭ ماقساتى مەن مىندەتتەرىنە, مادەنيەتتى, ۇلتتىق قۇندىلىقتاردى دارىپتەۋ باعىتىندا قولعا العان شارالارىنا كەڭىنەن توقتالدى.
ء«بىزدىڭ پارتيانىڭ ءبىرىنشى مىندەتى – حالىقتىڭ مۇڭىن مۇڭداپ, ءسوزىن ايتىپ, حالىقتىڭ پىكىرىن بيلىككە جەتكىزۋ. بيلىك تاراپىنان كوپ نارسە جاسالىپ جاتىر. بىراق كەيبىر كەزدە بۇل جاسالعان جۇمىستار حالىققا دۇرىس ناسيحاتتالا بەرمەيدى. سوندىقتان بارلىق مۇمكىندىكتەردى پايدالانا وتىرىپ, اتقارىپ جاتقان جۇمىستاردى حالىققا قاراپايىم تىلمەن جەتكىزۋ كەرەك. ول – پارتيانىڭ ەكىنشى مىندەتى. ءۇشىنشى مىندەتى, ارينە ءبىز ناقتى ىستەردىڭ پارتياسىمىز. سوندىقتان ءبىز نەگىزسىز نارسەلەردى ەشقاشان كوتەرمەيمىز. قازىرگى كەزدە اكىمدەرمەن بىرلەسىپ ءاربىر وڭىردە پارتيانىڭ باعدارلاماسىن تالقىلاپ جاتىرمىز», دەدى باۋىرجان بايبەك.
ءوز كەزەگىندە ءوڭىردىڭ زيالىلارى پارتيا توراعاسىنىڭ ءبىرىنشى ورىنباسارىنا تولعاندىرىپ جۇرگەن ساۋالدارىن قويىپ, ءوز ويلارىن بۇكپەسىز ورتاعا سالدى.
باسقوسۋدا مۇناي سالاسىنىڭ ارداگەرى ماقسىم ءىزباسوۆ جەرگىلىكتى مۇنايشىلاردىڭ جالاقىسىن شەتەلدىكتەرمەن تەڭەستىرۋ, وڭىردەگى ەكولوگيا ماسەلەسىن وڭالتۋ, جايىق وزەنى دەڭگەيىنىڭ جىلدان-جىلعا ازايۋ ماسەلەلەرىن ورتاعا سالدى. ال ح.دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىنىڭ عىلىمي كەڭەسىنىڭ حاتشىسى, پارتيا ارداگەرى ب.تىنىباەۆا اتىراۋ وبلىسىنداعى اپاتتى جانە ءۇش اۋىسىمدى مەكتەپتەر, بالاباقشانىڭ جەتىسپەۋشىلىگى ماسەلەلەرىن تىلگە تيەك ەتتى.
ءوڭىر زيالىلارىنىڭ پىكىرلەرىن دەن قويا تىڭداعان باۋىرجان بايبەك وتاندىق مۇنايشىلار جالاقىسىنداعى تەڭسىزدىكتەرگە بايلانىستى ەل پرەزيدەنتى قاسىم-جومارت توقاەۆتىڭ شەتەلدىك جۇمىس بەرۋشىلەر تاراپىنان ءبىزدىڭ ازاماتتارىمىزدى كەمسىتۋگە جول بەرمەۋ تۋرالى ماسەلە كوتەرگەنىن, سول سياقتى قورشاعان ورتانى ساقتاۋ ماسەلەسىندە دە مەملەكەت باسشىسىنىڭ شيكىزات ەنەرگيا سەكتورىنىڭ جۇمىسىندا ەكولوگياعا زياندى بولدىرماۋ كەرەكتىگىن تاپسىرعانىن ايتتى.
ءبىلىم, ۇرپاق تاربيەسى پارتيانىڭ ەرەكشە نازار اۋداراتىن سالالارى ەكەندىگىنە توقتالعان پارتيا توراعاسىنىڭ ءبىرىنشى ورىنباسارى وبلىستاعى ءۇش اۋىسىمدى جانە اپاتتىق مەكتەپتەردى جويۋ ءۇشىن بەس جىلعا ارنالعان ءىس-شارالار جوسپارى ازىرلەنگەنىن, ايتىلعان ەكى ۇسىنىس تا جاقىن اراداعى بەسجىلدىقتا ءوز شەشىمدەرىن تاباتىنىن جەتكىزدى.
ءوڭىردىڭ قوعامدىق پىكىر كوشباسشىلارىمەن, بلوگەرلەرمەن جانە باق وكىلدەرىمەن كەزدەسۋدە باۋىرجان بايبەك قازىرگى تاڭدا جاڭا سىن-قاتەرلەردى ەسكەرە وتىرىپ, كوممۋنيكاتسيالاردىڭ زاماناۋي تەحنولوگيالارىن پايدالانۋ ارقىلى حالىقپەن ديالوگ ورناتۋدىڭ ماڭىزدىلىعىنا, پارتيا تاراپىنان العاش قولعا الىنعالى وتىرعان پرايمەريز وتكىزۋ تارتىبىنە توقتالدى.
Nur Otan پارتياسى توراعاسىنىڭ ءبىرىنشى ورىنباسارى اتىراۋ جاستارىمەن دە كەزدەستى.
«قازىرگى كەزدە «جاستار – وتانعا» باعدارلاماسىن ازىرلەۋ قاراستىرىلۋدا. ءبىز مۇنى ءار اۋداندا تالقىلاپ, ۇسىنىستار جيناقتاپ جاتىرمىز», دەدى باۋىرجان بايبەك.
اتىراۋ وڭىرىنە جاسالعان ەكى كۇندىك ساپاردىڭ سوڭىنا قاراي Nur Otan پارتياسى توراعاسىنىڭ ءبىرىنشى ورىنباسارى ب.بايبەكتىڭ قاتىسۋىمەن اتىراۋ وبلىستىق فيليالىنىڭ كەزەكتەن تىس كونفەرەنتسياسى ءوتتى. كونفەرەنتسيادا پارتيا ليدەرى نۇرسۇلتان نازارباەۆتىڭ كەلىسىمىمەن Nur Otan پارتياسىنىڭ اتىراۋ وبلىستىق فيليالىنا وسى وبلىستىڭ جۋىردا تاعايىندالعان جاڭا اكىمى ماحامبەت دوسمۇحامبەتوۆ توراعا بولىپ سايلاندى.
