پرەزيدەنت جوسپارلانعان شارالاردىڭ بارلىعى «توي تويلاۋ ءۇشىن ەمەس, وي-ءورىسىمىزدى كەڭەيتىپ, رۋحاني تۇرعىدان دامۋىمىز ءۇشىن وتكىزىلمەك» ەكەنىن ەرەكشە اتاپ وتكەن. راسىندا دا, دارا, دانا ابايدىڭ تويى ويدىڭ تويى بولۋى قاجەت. ۇلى ابايدىڭ تويى تاعىلىمنىڭ تويى بولۋى ءتيىس.
مەنىڭ پايىمداۋىمشا, قاسىم-جومارت كەمەل ۇلىنىڭ ماقالاسى ەلباسى نۇرسۇلتان ءابىش ۇلى نازارباەۆتىڭ «بولاشاققا باعدار: رۋحاني جاڭعىرۋ» اتتى ماقالاسىنىڭ جالعاسى ىسپەتتەس. قازاقستاننىڭ تۇڭعىش پرەزيدەنتى باعدارلامالىق ماقالاسىندا قوعامدىق سانانى قايتا تۇلەتۋدىڭ ماڭىزدىلىعى تۋرالى ايتقان بولاتىن. بۇگىندە ۇلتتىق سانانى ساقتاۋ جانە ونى زامان تالابىنا بەيىمدەۋ مەملەكەتتىك ماڭىزى بار ماسەلەگە اينالدى. سانانى جاڭعىرتۋعا ابايدىڭ ومىرشەڭ شىعارمالارى زور ىقپال ەتەدى. بۇل تۋرالى ماقالادا ەگجەي-تەگجەيلى جازىلعان. « ۇلى اقىننىڭ شىعارمالارى بۇگىن دە وزەكتىلىگىن جوعالتقان جوق. ابايدىڭ وي-تۇجىرىمدارى بارشامىزعا قاشاندا رۋحاني ازىق بولا الادى. سوندىقتان ۇلتىمىزدى جاڭعىرتۋ ىسىندە ونىڭ ەڭبەكتەرىن باسشىلىققا الىپ, ۇتىمدى پايدالانۋ جايىن تاعى ءبىر مارتە وي ەلەگىنەن وتكىزگەن ءجون» دەپ اتاپ ءوتتى پرەزيدەنت. شىندىعىندا دا «ادامزاتتىڭ ابايى» اتانعان اقىننىڭ ادەبي مۇراسى بۇگىنگى كۇندە دە, بولاشاقتا دا ءوزىنىڭ ءمانى مەن ماڭىزىن جويمايدى. ول ۇلتىمىزدىڭ رۋحاني جاڭعىرۋ جولىنداعى تەمىرقازىعى ءھام شامشىراعى ىسپەتتى.
بىلتىرعى وقۋ جىلىنان باستاپ ۋنيۆەرسيتەتىمىزدە «ابايتانۋ» كۋرسى ەنگىزىلدى. بۇگىندە ستۋدەنتتەرگە ابايتانۋدىڭ باستاۋلارى, اقىننىڭ ءومىرى مەن شىعارماشىلىق جولى وقىتىلۋدا. بولاشاق پەداگوگتەر كۋرس بارىسىندا ابايتانۋ ماسەلەلەرىنىڭ دامۋ باعىتتارىمەن, ونىڭ اقىندىق مەكتەبىمەن جانە حاكىمنىڭ «تولىق ادام» فيلوسوفياسىمەن تانىسادى. وسى ورايدا قىزدار ۋنيۆەرسيتەتىنىڭ پروفەسسورى, فيلولوگيا عىلىمدارىنىڭ دوكتورى رۋدا زايكەنوۆانىڭ «ابايتانۋ» اتتى وقۋلىعى دا جارىق كوردى. ابايدى تانۋ – ءوزىمىزدى تانۋ.
گاۋحار الدامبەرگەنوۆا,
قازاق ۇلتتىق قىزدار پەداگوگيكالىق ۋنيۆەرسيتەتىنىڭ رەكتورى, پەداگوگيكا عىلىمدارىنىڭ دوكتورى, پروفەسسور
