ءمينيستردىڭ باسشىلىعىمەن بارلىق وڭىرلىك بولىنىستەردەگى وقب باستىقتارىنىڭ قاتىسۋىمەن كەڭەس ءوتتى. ۆەدومستۆو باسشىسى ءوز قاتارلارىندا قۇقىق بۇزۋشىلىقتىڭ الدىن الۋ جانە جولىن كەسۋ بويىنشا وتكەن جىلى ۇلكەن جۇمىستار اتقارىلعانىن اتاپ ءوتتى. ەل بويىنشا جەكە قۇرام اراسىنداعى, ونىڭ ىشىندە سىبايلاس جەمقورلىق سيپاتىنداعى قىلمىس دەڭگەيى ءىس جۇزىندە ۇشتەن بىرىنە قىسقاردى.
ۆەدومستۆو باسشىسى اعىمداعى جىلى قىزمەتكەرلەردىڭ جاۋاپكەرشىلىگىن ارتتىرۋ باعىتىنداعى جۇمىسقا ەرەكشە نازار اۋدارۋ قاجەتتىگىن اتاپ ءوتتى.
«قۇقىق قورعاۋ ورگاندارىنىڭ قىزمەتكەرلەرى حالقىمىزدىڭ تىنىشتىعى مەن قاۋىپسىزدىگىن كۇزەتۋ جولىندا قىزمەت اتقارادى. قازاقستاننىڭ ءاربىر ازاماتى پوليتسەيدىڭ قورعاۋىندا. بۇل ۇلكەن جاۋاپكەرشىلىك. بىراق بۇل ىشكى ىستەر ورگاندارىنىڭ قىزمەتكەرلەرىنە بەرىلەتىن ەرەكشە مارتەبە مەن وكىلەتتىكتەر. سوندىقتان مەن وزىندىك قاۋىپسىزدىك دەپارتامەنتىنە تەك پوليتسەيلەردىڭ زاڭدىلىقتى ساقتاۋىن قامتاماسىز ەتىپ قانا قويماي, سونداي-اق ولاردى قورعاۋدى تاپسىرامىن», دەدى مينيستر.
ە.تۇرعىمباەۆ وزىندىك قاۋىپسىزدىك دەپارتامەنتىنىڭ وسى جىلعى باسىم مىندەتتەرىن بەلگىلەدى: پوليتسيا تاراپىنان قۇقىق بۇزۋشىلىقتىڭ بارلىق تۇرلەرىنىڭ الدىن الۋ, ءوز قاتارىندا تۇرمىستىق سىبايلاس جەمقورلىقتى جويۋ. سونداي-اق وزىندىك قاۋىپسىزدىك بولىمشەلەرىنىڭ باسشىلارىنا پوليتسەيلەردىڭ زاڭسىز ءىس-ارەكەتتەرى فاكتىلەرى بويىنشا ازاماتتاردىڭ بارلىق وتىنىشتەرىنە جەدەل دەن قويۋدى تاپسىردى.
سىبايلاس جەمقورلىققا قارسى تۇراقتى يممۋنيتەتكە باسا نازار اۋدارا وتىرىپ, باسشىلىق لاۋازىمدارعا ۇمىتكەرلەرگە قويىلاتىن تالاپتار ارتتىرىلدى. ءىىم كادر كوميسسياسى ارقىلى وتكەن 600 ۇمىتكەردىڭ 80-ءى ماقۇلدانبادى. بارلىق دەڭگەيدەگى باسشىلاردىڭ جاعدايعا دا, جەكە قۇرامعا دا جاۋاپكەرشىلىگى كۇشەيتىلدى.
بۇدان باسقا, ازاماتتىق قوعاممەن ءوزارا ءىس-قيمىلدى كەڭەيتۋگە, جۇرتشىلىقپەن تىكەلەي ديالوگتى جانە كەرى بايلانىستى قامتاماسىز ەتۋگە شارالار قابىلدانۋدا.
«ەلىمىزدىڭ ازاماتتارى ىشكى ىستەر ورگاندارىنىڭ قىزمەتكەرلەرىنە جۇگىنگەندە, ولار تۇسىنىستىكتى, وزىنە دەگەن ادامگەرشىلىك قارىم-قاتىناستى, سونداي-اق ولاردىڭ قۇقىقتارى مەن بوستاندىقتارى لايىقتى قورعالاتىنىنا سەنىمدى بولۋى ءۇشىن ەڭ قاتاڭ ستاندارتتار مەن تالاپتاردى ۇستانۋ قاجەت», دەپ اتاپ ءوتتى ۆەدومستۆو باسشىسى.
