جۋرناليستەرمەن جۇزدەسكەن مينيستر الەمدە 7711 ناۋقاس كوروناۆيرۋسقا شالدىعىپ, ونىڭ 170-ءى كوز جۇمعانىن ايتتى. بۇدان بولەك قازىرگە دەيىن 17 مەملەكەتتە 90 ناۋقاس جاڭا ۆيرۋستى جۇقتىرعانى انىقتالعان. ەلىمىزدە ەرەكشە سانيتارلىق ءىس-شارالار 6 قاڭتاردان باستالدى. «پرەزيدەنت تاپسىرماسىمەن مەملەكەتتىك دەڭگەيدە ارنايى كوميسسيا قۇرىلدى, ەرەكشە ءىس-شارالار جوسپارى بەكىتىلدى. حالىقتى ينفەكتسيادان قورعاۋ ماسەلەسى بويىنشا قحر مەن قازاقستان اراسىنداعى شەكارانىڭ سانيتارلىق قورعاۋى كۇشەيتىلدى. بارلىق كەلىپ جاتقان ازاماتتار كۇشەيتىلگەن سانيتارلىق تەكسەرۋدەن وتۋدە. قازىرگى ۋاقىتتا مەملەكەتتىك شەكارادان 20 515 ازامات ءوتتى. ونىڭ 19 989-ى قازاقستان ازاماتى بولسا, 526-سى شەتەل ازاماتى. سونداي-اق بۇل كىسىلەردىڭ بارلىعىن ءبىز سانيتارلىق مونيتورينگكە الىپ جاتىرمىز. قازىرگە دەيىن 78 پايىزى, ياعني 15 738 ادام تىركەۋگە الىندى. ولارمەن جەرگىلىكتى ەمحانالار تىكەلەي بايلانىستى», دەدى دەنساۋلىق ساقتاۋ ءمينيسترى.
ە.ءبىرتانوۆتىڭ ايتۋىنشا, قىتايدان كەلگەن ازاماتتاردىڭ 54-ءى دەنە قىزۋىنىڭ كوتەرىلۋىنە بايلانىستى اۋرۋحانالارعا جەتكىزىلگەن. كوبىسىنە جەدەل رەسپيراتورلىق ۆيرۋستىق ينفەكتسيا (جرۆي/ورۆي) جانە تىماۋ دياگنوزى قويىلعان. 16 ناۋقاس ساۋىعىپ, ۇيلەرىنە قايتتى. قالعان 38 ناۋقاس ءالى دە ەم قابىلداپ جاتىر. مينيستر ولاردىڭ بارلىعىنان ەرەكشە لابوراتوريالىق ساراپتامالار الىنىپ, ايقىمباەۆ اتىنداعى ۇلتتىق ينفەكتسيالىق عىلىمي ورتالىعىنا جىبەرىلگەنىن اتاپ ءوتتى.
«بۇگىندە ەلىمىزدە قاجەتتى ينفەكتسيالىق ستاتسيونارلار ساقاداي-ساي. قوسىمشا 10 مىڭنان اسا توسەك-ورىن دايىن. ەمدەۋ ءۇشىن بارلىق ءدارى-دارمەكتەر بار. دياگنوستيكالىق الگوريتم رەتتەلدى. ەلىمىزدە وقشاۋلاۋ ءۇشىن ينفەكتسيالىق اۋرۋحانالار جەلىسى تولىق دايىندالدى. وندا بىلىكتى دارىگەرلەر مەن مەيىربيكەلەر جۇمىس ىستەيدى. ءبارى ءبىزدىڭ باقىلاۋىمىزدا.», دەدى ەلىمىزدىڭ باس دارىگەرى.
الەۋمەتتىك جەلىلەر ارقىلى تاراپ جاتقان جالعان اقپاراتتارعا سەنبەۋدى جانە ونى تاراتپاۋدى حالىقتان وتىنگەن دەنساۋلىق ساقتاۋ ءمينيسترى قازىرگە دەيىن ەلىمىزدە بىردە-ءبىر ادام كوروناۆيرۋستى جۇقتىرماعانىن باسا ايتتى.
كەي وڭىرلەردە كوروناۆيرۋسپەن ناۋقاستار تىركەلدى دەگەن جالعان اقپاراتتار تاراۋدا. قازىرگى ۋاقىتتا ەلىمىزدە بىردە-ءبىر ناۋقاس جاڭا ۆيرۋسپەن تىركەلمەگەنىن ايتقان مينيستر: «كەشە مەن دۇنيەجۇزىلىك دەنساۋلىق ساقتاۋ ۇيىمى باسشىسىنىڭ ورىنباسارىمەن تىكەلەي سويلەستىم. دۇنيەجۇزىلىك دەنساۋلىق ساقتاۋ ۇيىمىنىڭ باسشىسى د-ر تەدروس ادحانوم گەبرەيەسۋس كەشە بەيجىڭنەن جەنەۆاعا قايتىپ كەلدى. بۇگىن كوروناۆيرۋستىڭ ورشۋىنە بايلانىستى توتەنشە حالىقارالىق دەنساۋلىق ساقتاۋ ەرەجەلەرى كوميتەتىنىڭ وتىرىسى وتەدى. كوميتەت باس ديرەكتورعا ەپيدەميانىڭ عالامدىق الاڭداۋشىلىق تۋدىراتىن توتەنشە جاعداي بولىپ تابىلا ما جانە وعان قارسى قانداي ۇسىنىستار جاساۋ كەرەكتىگى تۋرالى كونسۋلتاتيۆتىك قورىتىندى بەرەدى», دەدى.
