باس باپكەر تۋرنيرگە جاقسى دايىندىقپەن بارا جاتقانىن جانە باستى ماقسات – ءبىرىنشى ورىن يەلەنۋ ەكەنىن ايتتى. سونداي-اق قارسىلاستاردى جەتكىلىكتى دەڭگەيدە زەرتتەگەنىن دە جەتكىزدى.
– وقۋ-جاتتىعۋ جيىنى جوسپارعا سايكەس ءوتتى. العاشقى كۇنى اۋا رايىنىڭ قولايسىزدىعىنا سايكەس ءسال وزگەرىستەر ەنگىزدىك. قازىرگى تاڭدا قازاقستان ەۋروپا ەلدەرى اراسىندا ءتورتىنشى ورىندا تۇر. الەم رەيتينگىندە جەتىنشىمىز. مۇنداي جارىستاردا ءبىرىنشى ورىننان باسقا ماقسات بولماۋى ءتيىس. قارسىلاستاردىڭ بارلىعىن قۇرمەتتەيمىز. الايدا باستى مىندەت – ءبىرىنشى ورىن الۋ. العاشقى قارسىلاس – رۋمىنيا. سوڭعى رەت وسى ەلدىڭ ويىنشىلارىمەن وينادىق. سول سەبەپتى ماعلۇمات جەتكىلىكتى. سلوۆەنيا ءىرى تۋرنيرلەرگە ءجيى قاتىساتىن شەبەر كوماندا. چەحيا ءوز الاڭىندا وتەتىن ويىنداردى جاقسى وتكىزەدى. ۇلتتىق قۇرامادا باستى رولگە شىعا قويماعان ويىنشىلار بار. ماسەلەن ورازوۆ پەن تۇرساعۇلوۆ. سونىمەن قاتار البەرت اقبالىقوۆ جانە ازات ۆاليۋللين سىندى جاڭا ويىنشىلاردىڭ ويىنى قارسىلاستار ءۇشىن ىڭعايسىزدىق تۋدىرۋى ىقتيمال, – دەيدى ريكاردو كاكا.
قازاقستاننىڭ فۋتزال قۇراماسىنىڭ كاپيتانى دىنمۇحامبەت سۇلەيمەنوۆ ىشكى چەمپيوناتتىڭ دەڭگەيى وسكەنىن ايتىپ, الەم بىرىنشىلىگىنەن كەيىن كارەراسىن اياقتايتىنىن مالىمدەدى.
– ىشكى چەمپيوناتتاعى كوماندالاردىڭ كوپ بولۋى جانە باسەكەلەستىكتىڭ ءوسۋى ءبىزدىڭ ۇلتتىق قۇراماعا وڭ اسەر ەتەدى. سەبەبى ەلىمىزدىڭ جاس تا, تالانتتى فۋتزالشىلارىنا جول اشىلىپ, باسقا فۋتبولشىلاردىڭ شەبەرلىگىن ارتتىرۋعا مۇمكىندىك بەرەدى, – دەدى قۇراما كاپيتانى.
ماۋسىم سوڭىندا جاراقات الىپ, ءبىراز ۋاقىت قاتاردان شىعىپ قالعان قاقپاشى يگيتا ءالى تولىق بابىنا ەنبەگەن. بىراق ەليتالىق كەزەڭدە جەڭىسكە جەتۋ ءۇشىن بارىمدى سالامىن دەيدى.
– ماۋسىم سوڭىندا بۇرىن-سوڭدى بولماعان جاراقات الىپ قالدىم. قازىرگى ۋاقىتتا ءجۇز پايىز دايىنمىن دەپ ايتا المايمىن. الايدا ىنتا-جىگەردىڭ ارقاسىندا جەتىستىككە جەتۋگە بولادى. قازاقستاندا الاڭداعى ويىنشىلار عانا ەمەس, قاقپاشىلاردىڭ دا دەڭگەيى ارتىپ كەلەدى. بۇرىن-سوڭدى دەڭگەيى جوعارى قاقپاشىلار بولماعان ەدى. باسەكە ارتىپ, قاقپاشىلار اياقپەن دە ويناي باستادى. نۇرالەم بايدوللانىڭ ويىن ساپاسى وتە جوعارى. باتىل قيمىلدايدى. اياقپەن دە جاقسى وينايدى. بولاشاعى زور قاقپاشى. ءدال وسىنداي سوزدەردى الەكساندر گۋروۆكە دە ايتا الامىن. قازاقستاندا جاس قاقپاشىلار كوپ. ولار ءۇشىن ەڭ باستىسى – تۇراقتىلىق. ءتورت-بەس جىلدان كەيىن مەنىڭ ويىن ۇلگىمدەگى قاقپاشىلار شىعىپ, ۇلتتىق قۇراماعا كومەكتەسەدى دەپ ويلايمىن, – دەيدى قاقپاشى.
ايتا كەتەيىك, فۋتزالدان قازاقستان قۇراماسى چەحيانىڭ برنو قالاسىندا 2020 جىلعى الەم چەمپيوناتىنىڭ فينالدىق كەزەڭىندە ويناۋ ءۇشىن ەليتالى كەزەڭدە رۋمىنيا, سلوۆەنيا جانە چەحيا قۇرامالارىمەن سىنعا تۇسەدى. ەلىمىزدىڭ فۋتبولشىلارى قاتىساتىن ءتۋرنيردى قازاقستان فۋتبول فەدەراتسياسىنىڭ YouTube ارناسىنان جانە «Qazsport» تەلەارناسىنان تاماشالاۋعا بولادى. جانكۇيەرلەر رۋمىنيا جانە سلوۆەنيا قۇراماسىنا قارسى وتەتىن ويىندى فەدەراتسياسىنىڭ YouTube ارناسىنان, ال چەحيامەن وتەتىن سوڭعى ويىندا «Qazsport» تەلەارناسىنان تاماشالاي الادى.
