بۇل دەرەكتەردى تۇركىستان وبلىسى وڭىرلىك كوممۋنيكاتسيالار قىزمەتىندە مەملەكەتتىك قىزمەت ىستەرى اگەنتتىگىنىڭ اۋماقتىق دەپارتامەنت باسشىسى, ادەپ جونىندەگى كەڭەس توراعاسى بولات يساقوۆ جاريا ەتتى. وڭىردەگى مەملەكەتتىك قىزمەتكەرلەر سانى 124 بىرلىككە ازايعان. دەپارتامەنت باسشىسىنىڭ ايتۋىنشا, ايماقتا 610 مەملەكەتتىك ورگاندا 7061 مەملەكەتتىك قىزمەتكەر جۇمىس ىستەيدى. بوس مەملەكەتتىك لاۋازىمعا جاريالانعان ىشكى كونكۋرسقا تومەنگى لاۋازىمنان جوعارى قىزمەتكە 525 مامان تاعايىندالىپ, مەريتوكراتيا دەڭگەيى 66,2% بولعان.
وتكەن جىلى وڭىردە بىرنەشە كەزەڭدى قامتىعان ىرىكتەۋ ناتيجەسىندە تۇركىستاندىق 19 جاس دارىن پرەزيدەنتتىك جاستار كادر رەزەرۆىنىڭ قۇرامىنا الىنعان. الداعى بەس جىل ىشىندە ولارعا كونكۋرستان تىس ۋاكىلەتتى كوميسسيانىڭ قورىتىندىسىمەن باسشى لاۋازىمدارعا تاعايىنداۋ مۇمكىندىگى بەرىلمەك.
ال قر پرەزيدەنتىنىڭ جانىنداعى مەملەكەتتىك باسقارۋ اكادەمياسى وبلىستىق فيليالىنىڭ ديرەكتورى جانات مومىنقۇلوۆتىڭ ايتۋىنشا, وتكەن جىلى وبلىس اكىمدىگى جانە مەملەكەتتىك قىزمەت ىستەرى اگەنتتىگى دەپارتامەنتىنىڭ قولداۋىمەن 1171 مەملەكەتتىك قىزمەتكەر بىلىكتىلىگىن ارتتىرۋ سەمينارلارى مەن قايتا دايارلاۋ كۋرستارىنان وتكەن.
