كەشە مەملەكەت باسشىسى نۇرسۇلتان نازارباەۆ مۇناي جانە گاز ءمينيسترى ۇزاقباي قاراباليندى قابىلدادى, دەپ حابارلادى پرەزيدەنتتىڭ ءباسپاسوز قىزمەتى.
كەزدەسۋ بارىسىندا ۇ.قارابالين مەملەكەت باسشىسىنا مينيسترلىكتىڭ مۇناي مەن گاز ءوندىرۋ, مۇناي-حيميا ونەركاسىبى جانە كومىرسۋتەك شيكىزاتىن تاسىمالداۋدى قامتاماسىز ەتۋ ءتارىزدى سالالارداعى قىزمەتى تۋرالى باياندادى.
سونىمەن قاتار, قاشاعان, تەڭىز جانە قاراشىعاناقتى قوسقاندا, ءىرى كەن ورىندارىن يگەرۋگە بايلانىستى ءماسەلەلەر تالقىلاندى. تەڭىز جوباسىندا, سونداي-اق, وزگە دە بولاشاق كەن ورىندارىن يگەرۋ بارىسىندا ەلىمىزدىڭ مۇددەسىن مەيلىنشە ەسكەرۋ قاجەتتىگىنە باستى نازار اۋدارىلدى.
مەملەكەت باسشىسى قازاقستان ءۇشىن ستراتەگيالىق سالانىڭ ءبىرى بولىپ سانالاتىن مۇناي-گاز سالاسىن ودان ءارى دامىتۋ قاجەتتىگىن اتاپ ءوتتى.
– بۇگىنگى كۇنى قاشاعان كەن ورنىنان مۇناي ءوندىرۋدى باستاۋعا دايىندىق پروتسەسى جوسپارعا سايكەس جۇرگىزىلۋدە. مۇناي جانە گاز مينيسترلىگىنە ۇلكەن جاۋاپكەرشىلىك جۇكتەلەدى. ونىڭ قىزمەتى جەتىلدىرىلىپ, تيىمدىلىگى ارتتىرىلاتىنىنا سەنەمىن. سونداي-اق, مينيسترلىك تاجىريبە جانە تەحنولوگيالار الماسۋ ءۇشىن كورشىلەس ەلدەردەگى سەرىكتەستەرىمەن تىعىز ىنتىماقتاستىقتا بولۋى قاجەت, – دەدى قازاقستان پرەزيدەنتى.
ءوز كەزەگىندە ۇ.قارابالين سالانى دامىتۋدىڭ وڭ قارقىنى تۋرالى حاباردار ەتتى.
– 2013 جىلدىڭ ءبىرىنشى جارتىجىلدىعىنىڭ قورىتىندىسى بويىنشا مۇناي جانە گاز كوندەنساتىن ءوندىرۋ 40 ميلليون توننادان استامدى قۇراپ, 2012 جىلدىڭ ءتيىستى كەزەڭىمەن سالىستىرعاندا 101,8 پايىز بولدى. سونىمەن بىرگە, تابيعي جانە ىلەسپە گاز ءوندىرۋ جوسپارلانعان كەستەگە ساي جۇرگىزىلۋدە. مۇناي-گاز ونىمدەرىن ەكسپورتتاۋ جونىندەگى جوسپارلار, جالپى العاندا, ورىندالۋدا, جەكەلەگەن كورسەتكىشتەر جىل اياعىنا دەيىن تەڭەستىرىلەتىن بولادى, – دەدى مۇناي جانە گاز ءمينيسترى.
ۇ.قارابالين كاسپيدىڭ قازاقستاندىق قايراڭىنىڭ جامبىل ۋچاسكەسىندەگى جۇمىستارى تۋرالى دا ءمالىم ەتتى.
– جامبىل قۇرىلىمىنداعى بارلاۋ ۇڭعىماسىن سىناقتان وتكىزۋ كەزىندە تاۋلىگىنە 60 توننا مۇناي اعىنى الىندى. ءبىز بۇل نىساندى زەرتتەۋدى ودان ءارى جۇرگىزە بەرەمىز, بىراق قازىردىڭ وزىندە جاڭا كەن ورنى تابىلعاندىعى تۋرالى ايتا بەرۋگە بولادى, سوعان وراي ءسىزدى قۇتتىقتاعىم كەلەدى. مۇنايشىلار جانە ءبىزدىڭ ءبارىمىز ءۇشىن بۇل وتە قۋانىشتى وقيعا, – دەدى مۇناي جانە گاز ءمينيسترى.
كەزدەسۋ قورىتىندىسىندا مەملەكەت باسشىسى بىرقاتار ناقتى تاپسىرمالار بەردى.
