ادەبيەت • 25 قاڭتار، 2020

مارحابات بايعۇتتىڭ 7 تومدىعىنىڭ تۇساۋكەسەرى ءوتتى

116 رەتكورسەتىلدى

تۇركىستان وبلىستىق پۋشكين اتىنداعى كىتاپحانادا ەلىمىزگە كەڭىنەن تانىمال جازۋشى-جۋرناليست مارحابات بايعۇتتىڭ 7 تومدىق شىعارمالار جيناعىنىڭ تۇساۋكەسەر ءراسىمى ءوتتى.

مادەنيەت جانە سپورت مينيسترلىگى ءتىل ساياساتى كوميتەتىنىڭ قولداۋىمەن وتكەن جىلدىڭ سوڭىندا جارىق كورگەن كىتاپتاردىڭ تۇساۋكەسەر راسىمىنە اقىن-جازۋشىلار جانە ونىڭ شىعارماشىلىعىن ءسۇيىپ وقيتىن وقىرماندار قاتىستى. جازۋشى ءتىل ساياساتى كوميتەتىنە 5 مىڭ تارالىممەن شىققان 7 تومدىق كىتابىن ەلىمىزدىڭ تۇكپىر-تۇكپىرىندەگى كىتاپحانالارعا تاراتۋ تۋرالى ءوتىنىشءىن ايتىپتى.

ادەبي كەشتە كىتاپحاناشىلار مارحابات بايعۇتتىڭ مەكتەپ وقۋشىلارى تۋرالى جازعان «توعىزىنشى سىنىپ» پەساسىن قويىپ، كەلگەن قوناقتاردى تەرەڭ ويعا باتىردى. بۇل قويىلىمدا تۋرا جولدان تايىپ، ناشاعا ەلىتىپ جاس ءومىرىن قور ەتكەن وقۋشىلاردىڭ ءومىرى باياندالادى. اسەرلى شىققان قويىلىمعا رازى بولعان كورەرمەندەر ريزاشىلىقتارىن ءبىلدىردى.  سونداي-اق كەش بارىسىندا تۇلكىباس اۋدانى اكىمىنىڭ ورىنباسارى ەرلان كۇزەمباەۆ باستاعان دەلەگاتسيا جازۋشىعا جۇرەكجاردى لەبىزدەرىن جەتكىزدى. ەرلان كۇزەمباەۆ كەش يەسىنىڭ ادەبيەتكە سىڭىرگەن ەڭبەگى مەن جاس دارىندارعا جول اشۋدا اتقارعان جۇمىستارى جونىندە تارقاتىپ ايتتى.  «مارحابات بايعۇت ارقاشان جاستاردى قولداپ جۇرەدى. وسى ورايدا، شىعارماشىل جاستارعا قول ۇشىن سوزۋ ماقساتىندا 2013 جىلى تۇلكىباستا مارحابات اعانىڭ مۇرىندىق بولۋىمەن «مارحابات-ميراس» قوعامدىق قورى قۇرىلعان بولاتىن. اتالعان قور وسى ۋاقىتقا دەيىن كوپتەگەن يگى ىستەردى جۇزەگە اسىردى. اۋداندىقتان باستاپ حالىقارالىق دەڭگەيگە دەيىن ادەبي بايقاۋلار وتكىزىلدى، جاس اقىن-جازۋشىلاردىڭ كىتاپتارى شىعارىلدى. جاستاردىڭ ەلگە تانىلىپ، شىڭدالۋىنا جول اشتى.  «مارحابات وقۋلارى»، «شىرايلىم-شۇبايقىزىلىم» بايقاۋلارى دا كوپتەگەن تالانتتاردىڭ تانىلۋىنا سەپتىگىن تيگىزدى. اۋداندا «اقسۋ-جاباعىلى الاۋى، شۇبايقىزىل جالاۋى» فەستيۆالى ءوتتى. مۇندا جاس سۋرەتشىلەر، قولونەر شەبەرلەرى ءوز تۋىندىلارىن كوپشىلىككە كورسەتتى. مارحابات اعانىڭ تۋعان جەرى – پىستەلى اۋىلىندا وتەتىن «تاۋپىستەلى تاعىلىمى» جوباسى قوس بۋىن اراسىندا ۇرپاقتار ساباقتاستىعىنىڭ ورناۋىندا ۇلكەن ءرول اتقارىپ كەلەدى. تۋعان جەردى تۇلەتۋدە مارحابات اعانىڭ سىڭىرگەن ەڭبەگى ۇشان-تەڭىز. قاي ىستە بولسىن، ءبىز ارقاشان جازۋشى اعامىزعا ارقا سۇيەپ جۇرەمىز»،  - دەگەن اۋدان اكىمىنىڭ ورىنباسارى جازۋشىعا ۇزاق عۇمىر تىلەپ، سىي-قۇرمەت كورسەتتى. سونىمەن قاتار، تۇلكىباستىق اقىن، مارحابات اعانىڭ ق ۇلىن-تايداي تەبىسىپ وسكەن سىنىپتاسى ابدىبەك ارالباي ۇلى قۇرداسىنا ارناۋ ولەڭ وقىپ بەردى. مارقاسقا اقىن نارماحان بەگالى مارحابات بايعۇتتىڭ شىعارماشىلىق ەرەكشەلىكتەرىنە توقتالدى. ال، ارداگەر جۋرناليست بايدۋللا قونىسبەك مارحابات بايعۇتپەن «وڭتۇستىك قازاقستان» گازەتىندە ەتەنە جاقىن ارالاسقانىن ەسىنە الدى. ءوز كەزەگىندە جازۋشى مارحابات بايعۇت قوناقتارعا ريزاشىلىعىن جەتكىزىپ، قازىرگى وقىرماندار تۋرالى وي قوزعادى. «قازىر ءبىزدىڭ جازعاندارىمىزدى ەشكىم وقىمايتىن شىعار دەپ ويلايتىنمىن. «وقىمايدى» دەپ تە رەنجىمەيمىن. بىراق، ولاي ەمەس ەكەن. ىزدەپ ءجۇرىپ وقيتىندار بار سەكىلدى. بىلتىر اقتوبەدەن ءاليحان دەگەن 23 جاستاعى جىگىت مەنى ىزدەپ شىمكەنتكە كەلدى. ول مەنىڭ ءبىر ماقالامدى وقىپ قالىپ سودان مەنى ىزدەپتى. كىتاپ سۇراپ كەلگەن وعان ۇيدەگى 3 تومدىق كىتابىمدى بەرىپ جىبەردىم. وسىنداي وقىرمانداردىڭ بارى قۋانتادى»، - دەءدى جازۋشى.

اسەرلى كەش سوڭىندا وقىرماندار جازۋشىمەنەستەلىك سۋرەتكە ءتۇسىپ، از-كەم تىلدەسىپ قالۋعا تىرىسىپ جاتتى.

سوڭعى جاڭالىقتار

قىلمىستىق ءىس قوزعالدى

ايماقتار • كەشە

باستى اقپارات (21.02.2020)

ۆيدەو • 21 اقپان، 2020

ۇقساس جاڭالىقتار