كەشە پرەمەر-مينيستر سەرىك احمەتوۆ «قازاقستان تەمىر جولى» ۇك» اق-تىڭ كولىك قىزمەتكەرلەرى كۇنىنە ارنالعان سالتاناتتى جيىنىنا قاتىستى. تەمىرجولشىلاردى كاسىبي مەرەكەسىمەن قۇتتىقتاعان ۇكىمەت باسشىسى ءبىر توپ سالا ماماندارىنا ناگرادالار تاپسىردى.
كەشە پرەمەر-مينيستر سەرىك احمەتوۆ «قازاقستان تەمىر جولى» ۇك» اق-تىڭ كولىك قىزمەتكەرلەرى كۇنىنە ارنالعان سالتاناتتى جيىنىنا قاتىستى. تەمىرجولشىلاردى كاسىبي مەرەكەسىمەن قۇتتىقتاعان ۇكىمەت باسشىسى ءبىر توپ سالا ماماندارىنا ناگرادالار تاپسىردى.
مەملەكەت باسشىسى قويعان تاپسىرمالارعا وراي تەمىرجول سالاسىندا جۇزەگە اسقان شارالار از ەمەس. جالپى, ءسىزدەردىڭ سالالارىڭىز ەل كەڭىستىگىندەگى ەكونوميكانىڭ تۇتاستىعىن قامتاماسىز ەتۋشى ينفراقۇرىلىمدىق نەگىز بولىپ تابىلادى, دەدى س.احمەتوۆ. سونداي-اق, پرەمەر-مينيستر ەلىمىزدە تاۋەلسىزدىك جىلدارى سالىنعان تەمىر جولدار تۋرالى ايتتى. راسىندا وسى جىلدار ارالىعىندا تمد ەلدەرىنىڭ ىشىندە ەڭ كوپ تەمىر جول توسەگەن قازاقستان ەكەنى ءمالىم. وسى كۇنگە دەيىن تاۋەلسىز ەلىمىز 2500 شاقىرىم جاڭا تەمىر جول جەلىسىن تارتتى.
مەملەكەت باسشىسىنىڭ تاپسىرماسىمەن تەمىرجول قىزمەتىن پايدالانۋشىلاردى زاماناۋي قوزعالىس قۇرامىمەن قامتاماسىز ەتۋ جۇكتەلگەن. بۇل تاپسىرما سىزدەردىڭ تاراپتارىڭىزدان تابىستى ورىندالىپ جاتىر, دەدى س.احمەتوۆ.
تەمىرجول كولىگى سالاسىندا جاڭعىرتۋ جانە يندۋستريالاندىرۋ كەزەڭى ءوتىپ جاتقانىمەن, كومپانيانىڭ كاپيتالى بولىپ بىلىكتى ماماندار سانالادى. سوندىقتان, مەرەكەلىك شارا بارىسىندا ءتۇرلى ەڭبەك وزاتتارى ماراپاتتالدى.
«قتج» ۇك» اق 2011-2012 جىلدارى ەلىمىزدىڭ يندۋستريالاندىرۋ كوشباسشىسى اتاندى. جەزقازعان-بەينەۋ, ارقالىق-شۇباركول تەمىرجول جەلىلەرىنىڭ قۇرىلىسى بەلگىلەنگەن كەستەگە ساي جۇرگىزىلۋدە. جىل اياعىنا دەيىن ەكى تەلىمدە دە باستى ماگيسترالدىق جەلىنى توسەۋ جۇمىسىن اياقتاۋ كوزدەلۋدە. 2014 جىلدىڭ شىلدەسىنە دەيىن كومپانيا اقتوبەدە رەلس شىعارا باستايدى. ال كەلەسى جىلدىڭ اياعىنا دەيىن استاناداعى «Gevo» كومپانياسىنىڭ العاشقى ديزەل قوزعالتقىشى شىعارىلادى. قازىرگى تاڭدا وسكەمەندە «شىعىسماش زاۋىتى» ءىرى ۆاگون قۇيماسى كاسىپورنىن مونتاجداۋ جانە ىشكى قۇرىلىسىن اياقتادى. ءبىر جىل كولەمىندە قتج ءوزىنىڭ ىشكى رەسۋرسى ەسەبىنەن وسى ءونىم تۇرىمەن تەمىرجول سالاسىن تولىعىمەن قامتيتىن بولادى.
سالا ماماندارىنىڭ جاۋاپكەرشىلىگى مەن بىلىكتىلىگى, ەل الدىنداعى قىزمەتى ۇكىمەت باسشىسىنىڭ نازارىنان تىس قالمادى. سىزدەردىڭ ەڭبەكتەرىڭىز قازاقستان رەسپۋبليكاسى ەكونوميكاسىنىڭ تۇراقتى دامۋىنىڭ نەگىزى بولعان, بۇدان بىلاي دا سولاي بولىپ قالا بەرەدى, دەپ ءسوزىن اياقتادى س.احمەتوۆ.
سالتاناتتى جيىننىڭ سوڭى مەرەكەلىك كونتسەرتكە ۇلاستى.
نۇرباي ەلمۇراتوۆ,
«ەگەمەن قازاقستان».
