جىل باسىنان بەرى بۇل ەلدە تىنىشتىق جوق. اقپان ايىنداعى ايقاستان كەيىن پرەمەر-مينيستر بويكو بوريسوۆتىڭ ۇكىمەتى وتستاۆكاعا كەتسە, ەندى ونىڭ ورنىنا كەلگەن پلامەن ورەشارسكيدىڭ ۇكىمەتىنە دە قاۋىپ ءتونىپ تۇر. راس, سوڭعىسىنىڭ كەتكىسى جوق.
بولگارلارعا نەگە ۇكىمەت جاقپاي قويدى؟
جىل باسىنان بەرى بۇل ەلدە تىنىشتىق جوق. اقپان ايىنداعى ايقاستان كەيىن پرەمەر-مينيستر بويكو بوريسوۆتىڭ ۇكىمەتى وتستاۆكاعا كەتسە, ەندى ونىڭ ورنىنا كەلگەن پلامەن ورەشارسكيدىڭ ۇكىمەتىنە دە قاۋىپ ءتونىپ تۇر. راس, سوڭعىسىنىڭ كەتكىسى جوق.
بويكو بوريسوۆتىڭ دا كەتۋى ويدا جوق ەدى. ونىڭ «بولگاريانىڭ ەۋروپالىق دامۋىن قولدايتىن ازاماتتار» پارتياسى سايلاۋدا ايقىن باسىمدىقپەن جەڭىسكە جەتىپ, اياعىنان نىق تۇرعان سوڭ, باسقالاردىڭ تالاپتارىنا قۇلاق اسىڭقىراماي, ءوزىنىڭ قاتال ەكونوميكالىق ساياساتىن جۇرگىزەتىنىن مالىمدەگەن. ءتىپتى, قىزمەتتەن كەتەمىن دەگەندى دە باسقالارعا قىر كورسەتۋ ءۇشىن, كەتپە دەپ جالىنار دەگەن ويمەن دە ايتقانداي ەدى. بىراق, ەلدىڭ ىشىندە كەتسەڭ, جولىڭ بولسىن دەگەن سىڭاي ءبىلدىرىلدى.
پارتياسىنىڭ اتى ايتىپ تۇرعانداي, ولار ەۋروپامەن كىرىگۋدى ماقسات تۇتادى. ەۋرووداققا مۇشە بولۋى سول ماقساتتى جۇزەگە اسىرۋدىڭ ءبىر كورىنىسىندەي دە ەدى. بىراق قالىڭ جۇرت ەلدىڭ بۇل وداققا, ونىڭ اسكەري قالقانى ناتو-عا مۇشە بولۋىنان بىردەن جارىلقاعان ناتيجە كورە قويعان جوق. ءتىپتى, ءبىراز باعىتتا كەرى كەتكەندىك اڭعارىلدى. ايتالىق, ەنەرگيا رەسۋرستارىنىڭ باعاسى ەسەلەپ كوتەرىلدى. ول حالىقتىڭ نارازىلىعىن تۋدىردى.
وسى جەردە ساياسي وپپونەنتتەردىڭ جاعدايدى ءتيىمدى پايدالانعانىن دا ايتقان ءجون. بىرەۋلەر ەۋروپامەن كىرىگۋدى جاقتاسا, وعان قارسىلار دا بار. ولار ماسكەۋگە باعىت ۇستايدى. ەنەرگيا رەسۋرستارىنىڭ قىمباتتاۋى ماسكەۋدەن تەرىس اينالۋدىڭ سالدارى دەپ كورسەتتى. بولگاريا باسشىلارى سوڭعى ۋاقىتتا رەسەيمەن بىرىگىپ جۇرگىزەتىن «بۋرگوس – الەكساندرۋپوليس» مۇناي قۇبىرى جانە «بەلەنە» اتوم ەلەكتر ستانساسى قۇرىلىستارىنان باس تارتقان بولاتىن. سول جوبالار جۇزەگە اسقاندا, ەنەرگيا رەسۋرستارى قىمباتتاماس ەدى دەگەن قيسىن العا توسىلدى.
ەلەكتر ەنەرگياسى باعاسىنىڭ قىمباتتاۋى بوريسوۆ ۇكىمەتىنىڭ تۇبىنە جەتسە, ونىڭ ورنىنا كەلگەن سوتسياليستەر مەن تۇرىك ازشىلىعى پارتياسىنىڭ كواليتسياسى اتىنان بيلىك تىزگىنىن ۇستاعان پلامەن ورەشارسكيگە تاعىلعان ايىپ كوپ. الدىمەن ۇلتتىق قاۋىپسىزدىك اگەنتتىگىنىڭ باسشىسى بولىپ مەدياماگنات دەليان پەەۆسكيدىڭ تاعايىندالۋىنا قارسىلىق بۇكىلەلدىك سيپات الدى. بىراق, بۇل قارسىلىق پەەۆسكيدى كەتىرگەن سوڭ دا توقتاعان جوق. ەندىگى ۇران – جەمقورلىققا قارسى كۇرەس. پرەمەر-مينيستر ورەشارسكي: «قايداعى جەمقورلىق, جاڭا ۇكىمەت ءبىر اي دا جۇمىس ىستەگەن جوق قوي؟!» – دەپ شىرىلدايدى.
بۇل ەلدەگى ساياسي كۇرەستىڭ سيپاتى دا باسقا جەردەگىدەن وزگەشەلەۋ. شەرۋگە شىققانداردىڭ سانىن, ايتالىق, باسقا ەلدەردەگى قارسىلىق كورسەتۋشى توپتارمەن سالىستىرۋعا كەلمەيدى. كوشەگە ءجۇز قارالى ادام شىقسا دا, ول جۇرت نازارىن اۋدارادى. ال سوفيا قالاسىندا وتكەن 2,5-4 مىڭ ادامدىق شەرۋلەر استانادا كولىك قوزعالىسىن توقتاتىپ, قۇقىق قورعاۋ كۇشتەرىن قاتتى ساستىردى. وتكەن اپتادا ەكى مىڭداي ادام پارلامەنت ءۇيىن قورشاپ الىپ, وعان ەشكىمدى كىرگىزبەي, ەشكىمدى شىعارماي, سەگىز ساعات بويى 100-دەي قىزمەتكەردى, رەسمي ادامداردى قاماقتا ۇستادى.
قوعامدا, ءسىرا, قالىپتاسقان ساياسي جاعدايعا دا بايلانىستى شىعار, ادامداردىڭ اراسىندا قارسىلىق پيعىل كۇشەيگەن. ورىن العان كەمشىلىك ءۇشىن باسقالاردى ايىپتى ساناپ, وعان قارسىلىق ءبىلدىرۋ پارىزداي كورىنەدى. ال بۇل ەلدە كەمشىلىك كوپ-اق. بولگاريا – ەۋرووداقتاعى ەڭ كەدەي ەلدىڭ ءبىرى. جۇمىسسىزدىق جوعارى. تابىس از. جالپى, بۇل ەل ەۋرووداققا كىرىگە الماي وتىر, باتىسقا جەتە الماعان, شىعىستان كەتە الماعان حالدە.
وسىنداي جاعدايدا ەلدى بولاشاقتا نە كۇتىپ تۇر دەگەن سۇراق تۋىندايدى. بولىپ جاتقان وقيعانىڭ سيپاتىنا قاراعاندا, حالىقتىڭ بيلىككە قارسى ارەكەتى تولاستاي قويماس. ول جاڭا سايلاۋعا اپارىپ سوقتىرادى. دەگەنمەن, سول سايلاۋدان كەيىن دە جاعدايدىڭ وڭعا قاراي وزگەرە قويۋى ءدۇدامال. ويتكەنى, جاڭا ۇكىمەت ەلدىڭ ەكونوميكالىق جاعدايىن كۇرت وزگەرتە قويمايدى. ال وعان حالىقتىڭ شىدامى جەتپەيدى. بولگارياعا ەشقانداي ۇكىمەت جاقپايتىن ادەت قالىپتاسا باستاعانداي. جاقسىلىققا اپارمايتىن ادەت.
دەموكرات پرەزيدەنتتىڭ باسبارلاۋشىسى – رەسپۋبليكاشىل< /p>
اقش پارلامەنتىنىڭ جوعارعى پالاتاسى ەلدىڭ فەدەرالدىق بارلاۋ بيۋروسىنىڭ ديرەكتورى ەتىپ دجەيمس كوميدى بەكىتتى. ونى 93 سەناتور جاقتاسا, قارسى بولعان – بىرەۋ-اق. مۇنداعى باستى ەرەكشەلىك: ۇسىنعان –دەموكرات پرەزيدەنت باراك وباما, ال كومي – ولارعا قارسى رەسپۋبليكاشىلار پارتياسىنىڭ وكىلى.
مۇنى باراك وبامانىڭ يكەمدى تاكتيكالىق قادامى, ءتىپتى, قۋلىعى دەۋگە بولار. كادرلىق ساياساتتا ايرىقشا ادالدىعى دەپ قابىلدايتىندار دا تابىلادى. اڭگىمە مىنادا: بۇل قىزمەتكە دەموكراتتار ىشىنەن دە تالاي تۇلعالاردى تابۋعا بولادى. قارسى پارتيانىڭ وكىلىن شەشۋشى قىزمەتكە تارتۋ ساياسي كۇشتەردىڭ كەلىسىمدى ارەكەتىنە, ىنتىماعىنا دا كەرەك. ءوز ساياساتىن بايىپتى جۇرگىزۋ ءۇشىن دە كەرەك.
بۇل پرەزيدەنت وباما مىسالىندا ءبىرىنشى قادام ەمەس. قورعانىس ءمينيسترى چاك حەيگەل دە – رەسپۋبليكاشىل. قازىرگى اق ءۇي اكىمشىلىگىندەگى تۇتقالى ەكى قىزمەتتى قارسى پارتيانىڭ وكىلىنە ۇسىنۋى پرەزيدەنت تۋرالى جاقسى پىكىر قالىپتاستىرادى. وعان بارىنەن دە بۇرىن ءىستىڭ مۇددەسى جوعارى ەكەنىن اڭعارتادى. ارينە, مۇنداي تاعايىنداۋلارعا ءوز پارتياسىنىڭ ىشىنەن قارسىلار دا تابىلار, ال بىراق بۇكىل ەلدىك قاۋىم تاراپىنان قولداۋشىلاردىڭ باسىم بولاتىنى انىق. وعان سەناتتاعى داۋىس بەرۋ دە ايقىن دالەل.
ەندى دجەيمس كوميدىڭ وزىنە كەلسەك, ول – رەسپۋبليكاشىلار پارتياسىنىڭ بەلدى تۇلعاسىنىڭ ءبىرى. پرەزيدەنت كىشى بۋشتىڭ زامانىندا باس پروكۋروردىڭ ورىنباسارى, ادىلەت ءمينيسترىنىڭ ورىنباسارى قىزمەتتەرىن دە اتقارعان. ودان كەيىن بيزنەس, قارجىلىق قۇرىلىمداردا جەتەكشى قىزمەتتەرگە قاتىستى. سوڭعى كەزدە كولۋمبيا ۋنيۆەرسيتەتىندە اعا زەرتتەۋشى, سونىمەن بىرگە, حالىقارالىق HSBC بانكى ديرەكتورلار كەڭەسىنىڭ مۇشەسى بولدى. ءسوزىن دە, ءىسىن دە جۇرت تىڭدايتىن, باعالايتىن تۇلعا.
ارينە, مۇنداي قىزمەتتى اتقارعاندار از ەمەس. ال كوميدى ەرەكشەلەيتىن ونىڭ پرينتسيپتىلىگى, ءوز ءسوزىندە تۇراتىندىعى, ەشقانداي مانساپتىق ەسەپكە قاراماي, ءوز پىكىرى ءۇشىن كۇرەسەتىندىگى. جۇرتتىڭ ەسىندە مىناداي وقيعا قالعان. 2004 جىلى اق ءۇيدىڭ تالابىنا قاراماي, سوتتىڭ شەشىمىنسىز ازاماتتاردىڭ ءسوزىن تىڭداۋ, ەلەكتروندى پوشتاسىن اشۋعا قارسىلىق بىلدىرگەن. ءتىپتى, پرەزيدەنت بۋشتىڭ ەكى كومەكشىسى اۋرۋحانادا جاتقان ادىلەت ءمينيسترى ەشكروفتان سوتتىڭ شەشىمىنسىز باسقالاردىڭ ءسوزىن تىڭداۋعا رۇقسات الماق بولعاندا, سول جەرگە كومي دە كەلىپ, بۇل قىزمەتتى ۋاقىتشا ءوزى اتقارىپ تۇرعاندا, وعان رۇقسات بەرىلمەيتىنىن مالىمدەگەن.
مۇنداي قادام, مۇنداي پرينتسيپشىلدىك ۇمىتىلمايدى. ارادا ون جىلداي ۋاقىت وتسە دە, جۇرت ونىڭ جاڭا قىزمەتكە تاعايىندالار كەزىندە سونى ەسكە الىپ وتىر. ادامداردىڭ ءسوزىن تىڭداۋ, پوشتاسىن اشۋ ىسىمەن ەندى ول باسقاراتىن قىزمەت اينالىسادى. بۇعان كومي قالاي قارايدى؟ ونىڭ ۇستىنە اقش-تىڭ بارلاۋ قىزمەتىنىڭ سىرتقا قاشىپ كەتكەن ادامى ەدۋارد سنوۋدەننىڭ بۇل ەلدە ازاماتتاردىڭ ءسوزىن تىڭداۋعا بايلانىستى ىستەردى اشكەرەلەپ جاتقانى بەلگىلى. كومي سونى ءبىلىپ تۇرىپ, بارا جاتىر. ال اق ءۇي اكىمشىلىگىنىڭ ازاماتتاردىڭ سىرتىنان تىڭشىلىق جاساۋدى قولدايتىنىن دا ءبىلىپ تۇرىپ, بارا جاتىر.
مۇنى دا تۇسىنۋگە بولار. تەرروريزمنىڭ, ەكسترەميزمنىڭ الدىن الۋ ءۇشىن دە ونداي تىڭشىلىق ارەكەتتەر قاجەت دەگەن دە پىكىر بارشىلىق. وسىنداي ادىستەرگە ء(سوز تىڭداۋ, پوشتانى اشۋ) كوپ ەلدەردە بار دا سياقتى-اۋ. رف ۆيتسە-پرەمەرى دميتري روگوزين ءبىر سوزىندە سنوۋدەننىڭ ايتاتىنىن بۇرىننان-اق بىلەتىنبىز دەگەن. وزدەرى سونداي ءادىستى پايدالانباسا, قايدان ءبىلسىن. ال اقش-تاعى جاڭا تاعايىنداۋدىڭ ءبىزدى قىزىقتىراتىنى – ونىڭ ساياسي جاعى.
ماماديار جاقىپ,
«ەگەمەن قازاقستان».
