ءبىرىنشى كەزدەسۋ قازاقستان رەسپۋبليكاسى پرەزيدەنتى جانىنداعى مەملەكەتتىك باسقارۋ اكادەمياسىنىڭ ايماقتىق فيليالىندا بولدى. شاراعا اكادەميانىڭ جانە ەلىمىزدىڭ مەملەكەتتىك قىزمەت ىستەرى اگەنتتىگى وبلىستىق دەپارتامەنت قىزمەتكەرلەرى, وبلىستىق جانە قالالىق ءماسليحاتتاردىڭ دەپۋتاتتارى قاتىستى.
سەنات دەپۋتاتى پارلامەنت قابىلدانعان زاڭدارمەن تانىستىردى. سەناتور حالىقتىڭ ءال-اۋقاتىن ارتتىرۋعا ارنالعان الەۋمەتتىك ماسەلەلەردى شەشۋ – زاڭنىڭ ماڭىزدى اسپەكتىلەرى دەپ سانايدى.
پارلامەنت جوعارعى پالاتاسىنىڭ دەپۋتاتىنا اكادەميا فيليالىنىڭ جاڭا عيماراتىنداعى وزىق تەحنولوگيالارمەن جابدىقتالعان وقۋ اۋديتوريالارى كورسەتىلدى.
سارسەنباي ەڭسەگەنوۆ جۇمىس ساپارى بارىسىندا يساتاي اۋدانىنداعى قامىسقالا اۋىلدىق وكرۋگى تۇرعىندارىمەن دە كەزدەستى. سەناتور قاتىسۋشىلارعا ءوزىنىڭ 2019 جىلعى زاڭ شىعارۋ جۇمىستارىن حاباردار ەتتى. س.ەڭسەگەنوۆ سەناتتىڭ 2018 جىلى 15 اقپاندا وتكەن جالپى وتىرىسىندا مال ۇرلىعىنا قاتىستى قىلمىستىق زاڭنامانى جەتىلدىرۋ تۋرالى ۇكىمەت باسشىسىنا دەپۋتاتتىق ساۋال جولداعان بولاتىن. سەناتوردىڭ ۇسىنىسى ەسكەرىلىپ, 2019 جىلى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قىلمىستىق, قىلمىستىق-پروتسەستىك زاڭنامانى جەتىلدىرۋ جانە جەكە ادام قۇقىقتارىنىڭ قورعالۋىن كۇشەيتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭىمەن مال ۇرلىعى بويىنشا ەلىمىزدىڭ قىلمىستىق كودەكسىنە 181-1 باپ بولىپ جەكە قۇرام ەنگىزىلگەنى بەلگىلى بولدى. قىلمىستىق كودەكسكە ەنگىزىلگەن وزگەرىستەرگە اۋىل تۇرعىندارى مەن شارۋا قوجالىقتارىنىڭ باسشىلارى قۋانىشتى ەكەندەرىن جەتكىزدى.
كەزدەسۋگە كەلگەن كاسىپكەرلەر دەپۋتاتقا 2019 جىلى شارۋا قوجالىقتارىن سۋمەن قامتاماسىز ەتۋ ءۇشىن بەرىلەتىن سۋبسيديا بەرىلمەگەنىن ايتتى. وسىعان بايلانىستى «قازسۋشار» مەكەمەسى شارۋا قوجالىقتارىنىڭ باسشىلارىن سوتقا بەرۋدى كوزدەپ وتىر. بۇل ماسەلەنىڭ وڭ شەشىلۋى ءۇشىن شارۋالار دەپۋتاتقا وتىنىشتەرىن ءبىلدىردى.
سەناتور كەزدەسۋدەن كەيىن 5 ادامدى جەكە قابىلداپ, پروبلەمالارىن تىڭدادى.
