دەپۋتات نەگىزگى ءوندىرىس كورپۋسىنداعى دانەكەرلەۋ جانە بوياۋ تسەحىنىڭ, سونداي-اق كىرمە تەمىرجول قۇرىلىسىنىڭ بارىسىمەن تانىستى.
كاسىپورىن باسشىلىعى كورپۋستار قۇرىلىسىن جالعاستىرۋ جانە تەحنولوگيالىق جابدىقتاردى ساتىپ الۋ ءۇشىن قارجى تارتۋ جونىندە قابىلدانىپ جاتقان شارالار تۋرالى دەپۋتاتتى حاباردار ەتتى. اۆتوموبيل نارىعىن دامىتۋ, ەل تۇرعىندارىنا جەڭىل اۆتوموبيلدەرگە قول جەتكىزۋ مۇمكىندىگىن ارتتىرۋ, اۆتوموبيل پاركىن جاڭارتۋدى ىنتالاندىرۋ, ەلدى مەكەندەردەگى ەكولوگيالىق جاعدايدى جاقسارتۋ ماسەلەلەرى تالقىلاندى. حالىق اراسىندا اۆتوكولىكتى جەڭىلدىكپەن نەسيەلەۋ جوعارى سۇرانىسقا يە ەكەنى جانە ونى جالعاستىرۋ مەن كەڭەيتۋ قاجەتتىگى اتاپ ءوتىلدى.
«دانەكەرلەۋ جانە بوياۋ تسەحىن ىسكە قوسۋ 2021 جىلى جوسپارلانىپ وتىر. بۇگىنگى كۇنى شامامەن 80 ملن. جەكە قاراجات ينۆەستيتسيالاندى» دەدى «ازيا اۆتو» اق پرەزيدەنتى ەرجان مانديەۆ. زاۋىتتىڭ ءبىرىنشى كەزەگىنىڭ قۋاتى جىلىنا 60 مىڭ ءاۆتوموبيلدى قۇرايدى. اۆتوموبيل ءوندىرىسىنىڭ دەڭگەيى 50 پايىزعا جەتەتىن بولادى.
وسكەمەن قالاسىنداعى «ازيا اۆتو-قازاقستان» كاسىپورنىندا تولىق تسيكلدى اۆتوموبيل ءوندىرىسىنىڭ قۇرىلىس جوباسى جۇزەگە اساتىن بولادى, ول «بيپەك اۆتو قازاقستان» سەرىكتەستىگى جانە «اۆتوۆاز» قوعامدىق اكتسيونەرلىك قوعامىنىڭ بىرلەسكەن كاسىپورنى بولىپ تابىلادى. زاۋىت 2013 جىلدىڭ قاراشا ايىنان باستاپ سالىنىپ كەلەدى. دانەكەرلەۋ, بوياۋ جانە اۆتوموبيلدەردى جيناۋ جونىندەگى ءوندىرىس قۋاتىن سالۋعا كەلگەن ينۆەستيتسيالاردىڭ جالپى كولەمى 380 ملن. دوللاردى قۇرايدى. ءوندىرىس كەشەنى ونىمدەرىن وتكىزۋدىڭ كەلەشەكتەگى نەگىزگى نارىقتارى قازاقستان, رەسەيدىڭ ءسىبىر جانە ورال وڭىرلەرى, ورتالىق ازيا ەلدەرى بولادى.
