«جاقىندا «قازاقستان» ۇلتتىق ارناسىندا جاڭا تەلەجوبا – «قازاقستان داۋىسى» ەفيرگە جول تارتادى», دەپ حابارلادى «قازاقستان اق» رەسپۋبليكالىق تەلە-راديو كەشەنىنىڭ ءباسپاسوز قىزمەتى. بۇل تەلەۆيزيالىق شوۋ العاش رەت نيدەرلاندتىڭ RTL4 تەلەارناسىندا «The Voice of Holland» دەگەن اتپەن جارىققا شىققان ەكەن. الەمنىڭ بىرنەشە ەلىنە تاراپ, كوپشىلىكتىڭ ىقىلاسىنا بولەنگەن تەلەجوبا بۇگىندە قازاق ءان الەمىنە كەلىپ جەتتى. تىڭ جوبانىڭ باستى ماقساتى – ەل اراسىندا ءجۇرگەن اسقاق داۋىستى, جەزتاڭداي ءانشىلەردىڭ اراسىنان ەڭ مىقتى دەگەن داۋىس يەسىن انىقتاۋ.
«قازاقستان داۋىسى» – بۇل كىسىنىڭ كەلبەتىنە, باسقا دا قاسيەتتەرىنە مۇلدە ءمان بەرمەيتىن, تەك قانا داۋىس ەرەكشەلىگى باعالاناتىن تىڭ تەلەدۋمان بولماق. ەلىمىزدىڭ تۇكپىر-تۇكپىرىنەن كەلەتىن جاس انشىلەردى قۇرامىندا م.ارىنباەۆ, ن.البان, ا.كىشكەنباەۆ, م.سادۋاقاسوۆا بار تالىمگەرلەر توبى ىرىكتەيدى. «كورمەي تىڭداۋ» كەزەڭىنەن ءسۇرىنبەي وتكەن قاتىسۋشىلار اتالعان ءتورت تانىمال ءانشىنىڭ ءبىرىنىڭ قامقورلىعىنا بولەنىپ, ولاردىڭ شەبەرلىك مەكتەپتەرىندە تاجىريبە الماسىپ, سولارمەن بىرگە تىكەلەي ەفيردە ونەر كورسەتۋ ءمۇمكىندىگىنە دە يە بولادى. بىراق, اتالمىش كەزەڭگە جەتۋ وڭاي ەمەس سياقتى. سەبەبى, بۇل كەزەڭنىڭ شارتتارى اتىنا ساي بولماق. «كورمەي تىڭداۋ» سىنىندا ۇمىتكەر ساحناعا بەتتەگەن بويدا ءتورت انشىگە ارنايى دايىندالعان ورىندىقتار بىردەن كەرى بۇرىلادى. ۇمىتكەر تالىمگەردى ءتانتى ەتكەن جاعدايدا عانا تانىمال انشىلەردىڭ ءجۇزىن كورە الادى. ياعني, قاتىسۋشىنىڭ داۋىسى تالىمگەرلەردىڭ بىرىنە ۇناسا, ولار «مەن سەنى تاڭدايمىن» دەگەن تەتىكتى باسادى جانە سول كەزدە ورىندىق ساحناعا قاراي بۇرىلادى ەكەن. تەتىكتى باسقاننان كەيىن كەرى شەگىنەر جول جوق! مىنە, بايقاۋ وسىلايشا وتە ءادىل تۇردە ءوتىپ, قازاقستاندىق ۇزدىك داۋىس يەسى انىقتالماق.
نۇرزادا كۇمىسبەك,
ل.ن. گۋميلەۆ اتىنداعى
ەۋرازيا ۇلتتىق ۋنيۆەرسيتەتىنىڭ ستۋدەنتى.
