فۋتبولدان قازاقستان پرەمەر-ليگاسىنىڭ ءبىرىنشى كەزەڭىنىڭ اياقتالۋىنا ءبىر تۋر قالعاندا جۇلدەگە تالاساتىن ۇزدىك التى كلۋب پەن اۋتسايدەر التى كوماندا انىقتالدى.
ول جەكسەنبى كۇنى وتكەن تۋردىڭ ناتيجەسىمەن بەلگىلى بولدى. ەندى پرەمەر-ليگانىڭ ەكىنشى كەزەڭىندە «اقتوبە», «استانا», «شاحتەر», «ەرتىس», «ورداباسى» جانە «قايرات» جۇلدەلى ورىندارعا تالاسسا, «توبىل», «اتىراۋ», «جەتىسۋ», «ۆوستوك», «تاراز» جانە «اقجايىق» كەلەسى ماۋسىمدا پرەمەر-ليگاداعى ءوز ورنىن ساقتاپ قالۋ ءۇشىن كۇش سىناساتىن بولادى.
سوڭعى تۋردا الماتىنىڭ «قايراتى» ءوز الاڭىندا پاۆلوداردىڭ «ەرتىس» كومانداسىن 3:2 ەسەبىمەن ۇتىپ, 30 ۇپايمەن ۇزدىك التىلىقتىڭ قاتارىنا قوسىلسا, ءوز الاڭىندا تالدىقورعاننىڭ «جەتىسۋ» كلۋبىن 3:1 ەسەبىمەن جەڭگەن قوستانايدىڭ «توبىلى» 27 ۇپايمەن جەتىنشى ورىندا قالىپ قويدى.
تۋردىڭ باسقا ويىندارى مىناداي ەسەپپەن اياقتالدى: «تاراز» – «استانا» 0:0, «اتىراۋ» – «اقجايىق» (ورال) 1:0, «ۆوستوك» (وسكەمەن) – «شاحتەر» (قاراعاندى) 0:0, «ورداباسى» (شىمكەنت) – «اقتوبە» 0:1.
وسى تۋردا «توبىلدىڭ» شابۋىلشىسى نۇربول جۇماسقاليەۆ (سۋرەتتە وڭ جاقتا) «جەتىسۋدىڭ» قاقپاسىنا ويىننىڭ 88-مينۋتىندا قازاقستان چەمپيوناتىنداعى 148 گولىن سوعىپ, ەل ءبىرىنشىلىگىنىڭ تاريحىنداعى ءۇزدىك سۇرمەرگەن اتاندى. ءسويتىپ, ولەگ ليتۆينەنكونىڭ رەكوردىن جاڭارتتى.
