ەكىباستۇزعا بارعان جولساپار بارىسىندا «ەركەم-اي» بالاباقشاسىندا بولدىق. بۇرىن جەكەنىڭ قولىندا بولعان نىسان مەملەكەت مەنشىگىنە قايتارىلعان ەكەن. نىسانعا جەرگىلىكتى «گيدروپروم» جشس بيۋدجەتتەن بولىنگەن 318 ميلليون تەڭگە قارجىعا كۇردەلى جوندەۋ جۇمىستارىن جۇرگىزىپتى. ماۋسىم ايىندا اشىلعان «ەركەم-ايدا» نۇر-سۇلتان قالاسىنان كوشىپ كەلگەن كوپ بالالى وتباسىلاردىڭ 22 بالاسى تاربيەلەنۋدە. كوپ بالالى جانە از قامتىلعان وتباسىنان شىققان بۇل بالالار ءۇشىن بالاباقشا تەگىن, اقىلى ۇيىرمەلەرگە دە تەگىن قاتىسادى.
بالاباقشا مەڭگەرۋشىسى ءىنجۋ بولاتحانقىزىنىڭ ايتۋىنشا, بالالاردىڭ بارلىعى بەيىمدەلۋدەن جاقسى ءوتتى, ءتۇرلى سايىستار مەن كورمەلەرگە بەلسەنە قاتىسادى. بالاباقشادا 6 توپقا بولىنگەن 150 بالا تاربيەلەنۋدە.
مىسالى, قونىس اۋدارۋشىلاردىڭ ءبىرى نەسىپبەكوۆتەردىڭ قىزدارى گۇلدانا, عايني «بولاشاق» ەرەسەكتەر توبىنا بارادى, وتە العىر, مانەرلەپ ولەڭ وقىعاندى ۇناتادى. انالارى گۇلنۇر اشىمبايقىزى ء«ومىر» وڭالتۋ ورتالىعىندا قىزمەتكە تۇرىپتى. ارايلىم, ايزەرە, ەركەنىڭ اكەلەرى – ەسبولات سامات ۇلى, ال ارۋنا 6 بالالى وتباسىنىڭ كەنجەسى. اناسى اقمارال دۇكەنگە ساتۋشى بولىپ ورنالاسىپتى.
قۋانىشتى ءساتتى اسىعا كۇتىپ جۇرگەن يبادىلدىنوۆتەر وتباسىنىڭ ايكەءرىم, نارمين, اياۋلىم ەسىمدى ۇشەمدەرى العاشقى كۇنى-اق بالاباقشاعا قابىلدانىپتى. ال «ايگولەك» توبىندا قازاق بالالارىمەن بىرگە ميرون, ميحايل, ادەلينا, نيكيتا, پەتر, انفيسا سياقتى بالالار كەلۋدە. كىشكەنتاي ميروننىڭ اناسى ولەسيا الەكساندروۆنا ءۇي شارۋاسىندا, اكەسى ۆيكتور موۆچان اۆتومەحانيك بولىپ جۇمىس ىستەيدى. اتا-اناسى ميروننىڭ قازاق ءتىلىن ۇيرەنۋىن قۇپتاپ, بالالارىنىڭ جاڭاشىل «مەگا ينتەللەكتۋم» جوباسىندا ۇيرەنگەندەرىن قالاعان ەكەن.
قالعان وتباسىلارى دا بالاباقشانىڭ ەرەكشەلىگىن ەستىپ, جاڭا جوبانىڭ قاجەتتىگىن ءتۇسىنىپ, قازاق ءتىلىن ۇيرەنۋدە.
بالاباقشانىڭ ەرەكشەلىگى, وبلىستىق «وينا» زياتكەرلىك ورتالىعىمەن بىرلەسىپ, كىشكەنتايلاردىڭ ينتەللەكتۋالدىق دامۋىن قامتاماسىز ەتەتىن باعدارلامامەن جۇمىس ىستەيدى. بولاشاقتا بالاباقشا وليمپيادا, ەلەكتروندى تەستىلەۋ وتكىزۋ ورنىنا اينالماق. «مەگا ينتەللەكتۋم» جوباسى بويىنشا بالدىرعاندار قۇرىلىس كونسترۋكتورلارى, ماگنيتتى لەگو ارقىلى كەڭىستىكتە ءتۇرلى ويىندار قۇراستىرا ءبىلۋدى, تۇستەردى اجىراتۋدى, ساناۋدى مەڭگەرەدى. مىسالى, 3-5 جاس ارالىعىنداعى بالالار الەمدىك جەتەكشى ويىنداردان جينالعان «ينتەللەكتۋم» كابينەتىندەگى زياتكەرلىك باعىتتاعى ويىندار, تەستىلەۋ تاپسىرمالارىن, وليمپيادالىق جاتتىعۋلاردى مەڭگەرەدى. ال 5-6 جاستاعى بالالار العان بىلىمدەرىن «روبوتتەحنيكا» جوباسىمەن قورىتىندىلايدى.
بالاباقشانىڭ قامقورشىلىق كەڭەسى بالالاردىڭ تاماقتانۋىن قاداعالايدى. بارلىق دارۋمەندەر قاجەتتى دەڭگەيدە بەرىلەدى. اتا-انالار تاراپىنان شاعىم بولعان جوق. اتا-انالارمەن بىرلەسە وتىرىپ, تاقىرىپتىق سۋرەتتەر كورمەسى ۇيىمداستىرىلدى, مەرەكەلىك ەرتەڭگىلىكتەر وتكىزىلدى. بالالار «ەركەم-اي» اۋەنىن وركەستردە ورىنداپ, ۇلتتىق ويىنداردى قىزىعا وينادى.
پاۆلودار وبلىسى,
ەكىباستۇز قالاسى
