ءبىز وسىدان بىرقاتار ۋاقىت بۇرىن قازىرگى كۇندەرى تىڭدارمان ءسۇيسىنىپ تىڭدايتىن جاڭا قازاق اندەرىن انىقتاۋ ماقساتىندا وقىرمان اراسىندا ساۋالناما جۇرگىزىپ كورگەن ەدىك. مۇنداعى ماقسات انسۇيەر قاۋىمنىڭ سۇيىسپەنشىلىگىنە بولەنىپ جۇرگەن وسىنداي حيت-اندەردىڭ ءوزىن دە, تۋىندىنىڭ اۆتورلارى مەن ورىنداۋشىلارىن دا جۇرتشىلىققا تانىستىرىپ, ولارعا قاتىستى كەيبىر دەرەكتەردى ۇسىنىپ وتىرۋ بولاتىن.
وسى سۇراۋ سالۋدىڭ قورىتىندىسىندا ءبىرىنشى ورىندى جاس ءانشى ءاليا ابىكەنوۆانىڭ ورىنداۋىنداعى كومپوزيتور بەكەت ەسەنتاەۆتىڭ «ومىرگە ساۋال» دەپ اتالاتىن تۋىندىسى تالاسسىز جەڭىپ الدى. وسىعان وراي ءبىز ءان اۆتورىنىڭ بۇگىندە ارامىزدا جوقتىعىنا بايلانىستى, ونىڭ ولمەس تۋىندىسىن وزەگى تالعانشا ونەرشىل جۇرتقا جەتكىزىپ جۇرگەن تالانتتى ءانشىنىڭ وزىمەن سۇحبات قۇردىق. بۇگىندە تالدىقورعان قالاسىندا تۇراتىن, وسىنداعى ءسۇيىنباي اتىنداعى فيلارمونيادا قىزمەت ەتەتىن اليامەن تەلەفون ارقىلى شۇعىل حابارلاسىپ, كوپشىلىكتى تولعاندىرىپ جۇرگەن 4 سۇراققا جاۋاپ الىپ ۇلگەردىك.
سونىمەن, سىزدەردىڭ نازارلارىڭىزعا ەندى وسى شاعىن سۇحباتپەن بىرگە, ونىڭ ورىنداۋىنداعى «ومىرگە ساۋال» ءانىن دە ۇسىنامىز. ال ەڭ سوڭىندا ءاننىڭ ءماتىنى بەرىلىپ وتىر.
-ءاليا, ءسىز قازىر ورىنداپ جۇرگەن «ومىرگە ساۋال» ءانى شىن مانىندە دە حالىقتىڭ قالىڭ كوپشىلىگى سۇيسىنە تىڭدايتىن حيت-اۋەندەردىڭ بىرىنە اينالىپ وتىر. جۇرتتى تىڭداتىپ قانا قويا سالماي, قاتتى ويلاندىرا الاتىن بۇل انمەن قالاي جانە قاشان تابىستىڭىز؟
-«جاقسى ءاندى تىڭداساڭ جانىڭ ەرىپ, جابىرقاعان كوڭىلىڭ كوتەرىلەر» دەپ اقىلدىڭ اقىنى - اباي اتامىز جىرلايدى. «ومىرگە ساۋال» ءانى قۇلاقتان كىرىپ, بويدى الار جاقسى اندەردىڭ ءبىرى ءارى بىرەگەيى دەسەم ارتىق ايتقانىم ەمەس. ءاندى مەن العاش رەت وسىدان ءۇش جىل بۇرىن ونەردەگى اعام بەكەت ەسەنتاەۆتىڭ ورىنداۋىندا تىڭداعان ساتتە جۇرەگىم قوبالجىپ, كوڭىلىم الابۇرتىپ, ەرەكشە تەبىرەنگەن ەدىم. بەكەت اعا ۇنەمى گيتارامەن ورىندايتىن, ءاندى جان دۇنيەسىمەن بەرىلە شىرقاعاندا, كوزىنە جاس تولىپ, ىشكى جان ايقايىن سىرتقا اۋەنمەن شىعارعانداي كۇي كەشەتىن. بىراق مەن سول ساتتەردە ءاننىڭ قۇدىرەتىنە ءمان بەرمەپپىن-اۋ. «اعا, قۇلازىماڭىزشى» دەپ جۇباتىپ قانا قوياتىنمىن. ول كىسى وتە تالانتتى, ۇياڭ, قاراپايىم, ساليقالى, سالماقتى جان بولاتىن. اندەرىن ەشكىمگە «ايتشى» دەپ ۇسىنبايتىن. وكىنىشكە قاراي, بەكەت اعامنان ايرىلىپ قالدىق. ارتىندا ماڭگى ولمەيتىن اندەرى قالدى. بىزدەن الىستادى, ساعىمعا اينالدى. ول كۇننەن-كۇنگە الىستاعان سايىن, ساعىنىشىمىز ونىڭ انىمەن قاۋىشتىرا باستادى. وزىمە دە وي سالعان وسى ءاندى ورىنداۋدى پارىزىم دەپ سانادىم. اعانىڭ ورىنداۋىنداعى اندەردى قايتا-قايتا تىڭداپ وتىرىپ, ءان وزىمە قاتتى ۇناپ, رەپەرتۋارىما ەنگىزدىم. كوزى تىرىسىندە «مەنىڭ اندەرىمنىڭ كەز-كەلگەنىن ورىنداي بەر» دەپ ايتۋشى ەدى, سول ۇسىنىسى مەن ءۇشىن اماناتتاي كورىندى. ونەرىن باعالاۋشى رەتىندە بەكەت ەسەنتاەۆتىڭ اندەرىن جيناقتاپ ءۇنتاسپا شىعاردىم. بەينەبايان ءتۇسىردىم. كوپتىڭ كوڭىلىنەن شىعىپ, ىقىلاستارىن بىلدىرۋدە.
بەكەت اعامىزدىڭ شاڭىراعىنىڭ وتىن وشىرمەي وتىرعان اپايىمىزدىڭ ايتۋى بويىنشا, بۇل ءان 1989 جىلى جارىققا شىعىپتى. 1988 جىلى جەزقازعان وبلىسى, جەزدى اۋدانىنىڭ ساتپاەۆ اۋىلىنا بەكەت اعا قىزمەت بابىمەن بارىپ, سول جاققا قونىس اۋدارادى. اعا ءوزى اڭشىلىقتى, مال شارۋاشىلىعىمەن اينالىسقاندى جاقسى كورەدى ەكەن. وسى ويىندا ىسكە اسىرسام دەگەن ماقسات بولادى. اكىمشىلىك تاراپىنان ايتقان ويىڭىزدىڭ بارلىعى ورىندالادى دەگەن ۋادەسىن دە الادى. بىراق ۇسىنىستىڭ ارتى سيىرقۇيىمشاقتانىپ, ۇزاققا سوزىلادى, ۋادە ەتىلگەن نە باسپانا جوق, نە جاي جوق, ابدەن ابىگەرگە تۇسەدى. كىرمەگەن ەسىگى قالمايدى. دوس ىزدەپ الاسۇرىپ, جانى قينالىپ جۇرگەندە, ءبىر جىل وتە شىعادى. ءسويتىپ, شامىرقانىپ, قاتتى اشىنعاننان ءاننىڭ ءسوزى مەن اۋەنى ءبىر ساتتە شىعىپ, ءان بولىپ توگىلەدى. بۇل 1989 جىلى جارىققا شىققان ءان ەكەن.
-ءبىر بايقالاتىنى, ءسىزدىڭ رەپەرتۋارىڭىز كىلەڭ وسىنداي ادەمى اۋەزبەن ورىلەتىن سۇلۋ اندەردەن قۇرالعان. بۇلاردىڭ
