جارىس ۇيىمداستىرۋشىلارى ۇرپاقتار ساباقتاستىعىن جالعاپ, عاسىرلار بويى قازاقتىڭ ءداستۇرلى عۇمىر سالتىندا قالىپتاسقان كونە مۇرانى جاڭعىرتۋدى كوزدەگەن. ۇلت مۇراسىنىڭ سپورتتىق سيپاتى كەڭ تارالۋى ءۇشىن قويدىڭ ت ۇلىبىن بىلعارىدان تىكتىرىپتى. بەلى بەكەم جىگىتتەر سپورتتىق سناريادتى ءجۇز رەت كوتەرىپ, جەڭىسكە جەتىپ جاتتى. قازاق ازاماتىنا ەپتى, ەتى ءتىرى, قايراتى بەكەم بولۋ جاراسىمدى. جارىس ۇيىمداستىرۋشىلارىنىڭ كوزدەگەنى دە وسى.
– كورەرمەندەر تاراپىنان قىزۋ قولداۋ بار. كەيبىر ازاماتتار قاتىسۋعا ىنتا ءبىلدىرىپ جاتىر. جاستار تاراپىنان قىزىعۋشىلىق جوعارى. مۇنداي ۇلتتىق ويىنداردىڭ بار ەكەنىن بىلمەگەن, ەندى تانىسىپ جاتقان جاندار دا بار. كوپشىلىكتىڭ ويى وسى مۇرالارىمىزدى ودان ءارى دامىتۋعا ۇلەس قوسۋعا سايادى, – دەيدى سايىس تورەشىسى الماسبەك بەكزان.
سايىسقا تۇسكەن توپ قۇرامىندا اكەلەرى مەن بالالارى تىزە قوسىپ باق سىنادى. مۇنداعى ماقسات اعا بۋىننىڭ كوز كورگەن ونەگەسىن جاستارعا ۇلگى ەتۋ. بۇلاندىلىق بەكزان قاريا وسى سايىسقا ارنايى كەلىپتى. اقساقال ءوز قولىمەن ورگەن قايىس ارقانىن جاستارعا كورسەتىپ, جىلقىعا شالما لاقتىرۋدىڭ ءادىسىن ۇيرەتتى.
– مىقتى جىلقىشىلار كەزىندە 10 قۇلاش ارقانمەن بەستى اساۋدى شالمالاپ ۇستاعان. ال, مىناۋ تاي-قۇنانعا ارنالعان جەڭىل ارقان. مۇنىڭ ورمەسىنىڭ ءوزى ءبىر جارىم مەترگە جۋىق. بۇل ارقاننىڭ شيراتىلىپ قالماۋى ءۇشىن كەرەك. جيعاندا ەكى شەڭبەر جاسايدى. قالعان بولىگىن بۇراۋىن جازىپ كىشىرەك ەتىپ جيناپ, جىلقىعا قۇلاشتاپ سەرمەيدى. بۇل سايىسقا ۇلىم شاقىرعان سوڭ, جاستار كورسىن دەپ ارنايى الىپ كەلدىم. مۇنداي شارالار ءجيى ۇيىمداستىرىلىپ تۇرۋى ءتيىس,–دەيدى زەينەتكەر بەكزان تولەگەن ۇلى.
سايىستى ۇيىمداستىرۋعا ءوڭىردىڭ «اكەلەر وداعى» ۇيىمى مەن ۇلت مۇراسىنا جاناشىر ازاماتتارى قولداۋ ءبىلدىرىپتى. اساۋدى اۋىزدىقتاپ, ات قۇلاعىندا ويناعان قازاق جىگىتتىڭ بەينەسىن, بولمىسىن ساقتاپ قالۋعا مۇنداي شارالاردىڭ بەرەرى مول دەيدى سايىس قاتىسۋشىلارى.
