زەينەتاقى جۇيەسىن جاڭعىرتۋ جانە ايەلدەردىڭ زەينەتكە شىعۋ جاسىن ۇلعايتۋ جونىندەگى زاڭنىڭ قابىلدانۋىن 35 جىلدان استام وتاندىق قۇلاق-مۇرىن-تاماق جانە جاق-بەت-الپەت اۋرۋلارىنا جوعارى مامانداندىرىلعان دياگنوستيكالىق-ەمدىك كومەك كورسەتىپ كەلە جاتقان ەمدەۋ ورنى – الماتى قالالىق №5 كلينيكالىق اۋرۋحاناسىنىڭ ۇجىمى دا تالقىلادى. وعان الماتى قالاسى بويىنشا باقىلاۋ جانە الەۋمەتتىك قورعاۋ دەپارتامەنتى ديرەكتورىنىڭ ورىنباسارى گۇلسارا التىنبەكوۆا قاتىسىپ, كوتەرىلگەن ماسەلەگە قاتىستى ساۋالدارعا جاۋاپ بەردى.
نەگىزى باياندامانى اۋرۋحانانىڭ ءبولىم مەڭگەرۋشىسى, مەديتسينا عىلىمدارىنىڭ كانديداتى امانگەلدى سەيىتقۇلوۆ جاساپ, بۇل ماسەلەنىڭ ەلىمىزدىڭ ءاربىر ازاماتىنا قاتىسى بار ەكەنىن ايتا كەلە, ايەلدەردىڭ زەينەت جاسىن ۇزارتۋ نورماسى مەن ەرلەر مەن ايەلدەردىڭ زەينەتكە شىعۋ جاسىن تەڭەستىرۋدىڭ وزەكتى تاقىرىپقا اينالىپ وتىرعانىن, سول سەبەپتى زەينەتاقى جۇيەسىن جاڭارتۋ بويىنشا حالىق اراسىندا ءتۇسىندىرۋ قاجەتتىگىن جەتكىزىپ, ءوز ويىن ءبىلدىردى.
بۇگىندە ەلىمىزدە ەڭبەك ەتىپ جۇرگەن ايەل ادامداردىڭ سانى جىل سايىن ارتىپ كەلەدى, دەدى جيىندا بالالار جاق-بەت ايماعى ءبولىمىنىڭ مەڭگەرۋشىسى, مەديتسينا عىلىمدارىنىڭ دوكتورى, پروفەسسور سەرىك نۇرماعانوۆ. دۇنيە جۇزىندە 58 جاستاعى ادامدار ورتا بۋىنعا جاتادى. بۇل كورسەتكىش دەنساۋلىق, الەۋمەتتىك, ەكونوميكالىق, تۇرمىستىق جاعىنان قاراعاندا, ادامنىڭ ەڭ جوعارى دامىعان كەزى دەپ ەسەپتەلەدى. سوندىقتان وسى جاستا ەڭبەك ەتۋ ەلىمىزدىڭ جانە وتباسىنىڭ تۇرمىس جاعدايىن جاقسارتۋعا اسەر ەتەدى دەپ ويلايمىن.
تالقىلاۋ بارىسىندا, اسىرەسە, وسى اۋرۋحانادا 21 جىل اعا مەدبيكە بولىپ جۇمىس جاساپ, وسىدان بەس جىل بۇرىن زەينەتكە شىققان ساۋلە اقجانوۆانىڭ ءسوزى كوكەيگە قونىمدى شىقتى. زەينەتاقى رەفورماسى بۇگىنگى تاڭدا كەرەك دەپ ەسەپتەيمىن, دەدى ساۋلە كارىمقىزى. ارينە, قاي رەفورمانىڭ دا ءوزىنىڭ ارتىقشىلىعى مەن كەمشىلىكتەرى بولادى. بىراق, مەملەكەتىمىزدىڭ ءوسۋى, دامۋى جاعىنان قاراعاندا, بۇل رەفورما ەلىمىزدىڭ ەكونوميكاسىنا وتە ماڭىزدى جانە قولايلى. 58-63 جاسقا دەيىنگى بەس جىلدىڭ ىشىندە جيناقتاعان اقشامىز كوبەيەدى. اسىرەسە, زاڭ زەينەتاقى جۇيەسىن جاڭعىرتۋعا ىڭعايلى. كوپتەگەن ايەلدەر زەينەتكەر بولعانمەن جۇمىس ىستەپ ءجۇر. مىسالى, ءبىزدىڭ اۋرۋحانادا وننان استام قىزمەتكەر ءالى كۇنگە دەيىن ۇجىمعا ءوز ۇلەستەرىن قوسىپ, جاس ماماندارعا تاجىريبەلەرىن ۇيرەتىپ, مەديتسينا قىزمەتكەرلەرىنىڭ ابىرويىن تۇسىرمەي كەلە جاتقان ابزال جاندار.
سونداي-اق, الماتى قالاسىنىڭ شتاتتان تىس وتورينولاريتولوگى گۇلنار ۋاليەۆا, ت.ب. شىعىپ, ءوز ويلارىن ورتاعا سالدى.
جيىندى قورىتقان گۇلسارا التىنبەكوۆا زاڭ قابىلدانعانمەن, ءالى دە حالىقتىڭ اراسىندا ناسيحات جۇمىستارىن جۇرگىزۋ كەرەكتىگىن العا تارتتى.
گۇلزەينەپ سادىرقىزى,
«ەگەمەن قازاقستان».
