تاۋەلسىزدىك مەرەكەسى قارساڭىندا وت جاعىپ, كۇل شىعارۋ بەينەتىنەن قۇتىلعان اۋىلدار – تالدىاپان اۋىلدىق وكرۋگىنە قاراستى تالدىاپان, قوسوبا, قايشاقۇدىق, سارىقۇدىق جانە قاراوزەن اۋىلدىق وكرۋگىنە قاراستى سەرىك اۋىلدارى. جىل سوڭىنا دەيىن كومەكشى, كوكتەرەك, ورازعالي, جۇلدىز اۋىلدارى دا كوگىلدىر وتىن جۇيەسىنە قوسىلماق. بۇعان قوسا, كىشكەنەشال, تالدىقۇدىق, كىشىتالدىقۇدىق, بەيىستەرەك اۋىلدارىنا دا گاز قۇبىرىن تارتۋ جۇمىستارى باستالعان. تاياۋ بولاشاقتا كوپكۇتىر, اققۋراي, حايرۋش, سارالجىن, قىزىلتۋ, قاراكول, سەكسەنباەۆ, مەرەكە, ساتىبالدى, اششىساي, جاس, تانات, ءابىش, ەلامان, سارالجىن سەكىلدى شاعىن ەلدىمەكەندەرگە كوگىلدىر وتىن جەتكىزۋ ءۇشىن جوبالىق-سمەتالىق قۇجاتتار دايىن تۇر ەكەن. بۇل جۇمىستار جۇزەگ اسقان جاعدايدا اۋدان حالقى تۇگەلگە جۋىق تابيعي وتىنمەن قامتىلادى.
- 28 جىل ىشىندە ەلىمىزدىڭ ەكونوميكاسى نىعايىپ, حالىقتىڭ ءال-اۋقاتى ارتتى. مۇنىڭ بارلىعى ءسىز بەن ءبىزدىڭ ورتاق ىستەرىمىزدىڭ ناتيجەسى, زور ەڭبەكتىڭ ارقاسى. قۇرمەتتى جەرلەستەر, سىزدەردى ۇلىق مەرەكە - قازاقستان رەسپۋبليكاسىنىڭ تاۋەلسىزدىگى كۇنىمەن شىن جۇرەكتەن قۇتتىقتايمىن! – دەدى تۇرعىنداردىڭ قۋانىشىنا ورتاقتاسقان قازتالوۆ اۋدانىنىڭ اكىمى البەرت ەساليەۆ.
اۋداندا «وڭىرلەردى دامىتۋ» باعدارلاماسى بويىنشا رەسپۋبليكالىق بيۋدجەتتەن بولىنگەن 489 ملن. 227 مىڭ تەڭگە قارجىعا 105,1 شاقىرىم جەلى ىسكە قوسىلعان. بۇل جۇمىستاردى «اليسەرۆيس», «گازگيد» مەكەمەلەرى ساپالى اتقارعان.
- ەل تاۋەلسىزدىگى مەرەكەسى قارساڭىندا ءبىزدىڭ الاقانداي اۋىلىمىزعا تابيعي گاز كەلىپ, مارە-سارە بولىپ قۋانىپ جاتىرمىز. مىنە, ازاتتىق تۋى جەلبىرەگەن بەيبىت ەلدىڭ ەرتەڭى ءدال وسىلاي ءسات سايىن گۇدەنە بەرۋى كەرەك. مەن بارلىق جەرلەستەرىمدى قازاقستان رەسپۋبليكاسىنىڭ تاۋەلسىزدىك كۇنى مەرەكەسىمەن قۇتتىقتاي وتىرىپ, تۇرمىستا تابيعي گاز وتىنىن پايدالانۋعا مۇمكىندىك جاساعان جەرگىلىكتى باسشىلارعا اۋىل تۇرعىندارى اتىنان ريزاشىلىعىمدى بىلدىرەمىن, - دەيدى سەرىك اۋىلىنىڭ تۇرعىنى قىمبات ابدراحمانوۆا.
باتىس قازاقستان
