ايماقتار • 13 جەلتوقسان، 2019

«ورال: قازاقستاننىڭ باتىس قاقپاسى» اتتى كورمە اشىلدى

42 رەت كورسەتىلدى

باتىس-قازاقستان وبلىستىق تاريحي-ولكەتانۋ مۋزەيىندە «ورال: قازاقستاننىڭ باتىس قاقپاسى» اتتى فوتوكورمە اشىلدى. كورمەگە باتىس قازاقستان وبلىسىنىڭ قاسيەتتى جانە تاريحي ورىندارى، تابيعي نىساندارى مەن ارحەولوگيالىق ەسكەرتكىشتەرى، سونىمەن قاتار، قازىرگى كەزدەگى كوپشىلىك جينالاتىن مادەني ورىنداردى كورسەتەتىن فوتولار قويىلعان.

بۇل فوتوسۋرەتتەر 2019 جىلدىڭ 15-21 قازانى ارالىعىندا باتىس قازاقستان وبلىسىنىڭ اۋماعىندا وتكەن «ارايلى اقجايىق» ەكسپەديتسياسى بارىسىندا تۇسىرىلگەن ەدى. ەكسپەديتسيا ايماقتاعى ءتۋريزمنىڭ دامۋ مۇمكىندىكتەرىن كورسەتۋدى كوزدەگەن بولاتىن. كاسىپقوي فوتوگرافتاردان قۇرىلعان توپ ءوڭىردىڭ تاريحي، كوركەم مۇيىستەرىن ارالاپ، ەرەكشە فوتوشولۋ جاساپ شىقتى. «ارايلى اقجايىق» ەكسپەديتسياسى ناتيجەسىندە پايدا بولعان فوتوسۋرەتتەر مەن ماقالالار «National Geographic Kazakhstan» جانە رەسەيدەگى «National geographic» جۋرنالدارىندا جاريالاندى. مىنە، وسى ساپاردا تۇسىرىلگەن 30 فوتوسۋرەت بۇگىنگى كورمەنىڭ تورىنەن ورىن تاپتى.

فوتوكورمەنىڭ اشىلۋ سالتاناتىنا باتىس قازاقستان وبلىسىنىڭ كاسىپكەرلىك جانە يندۋستريالدىق-يننوۆاتسيالىق دامۋ باسقارماسى تۋريزم ءبولىمىنىڭ باسشىسى عالىم بەكقاليەۆ ارنايى كەلىپ، ەكسپەديتسياسىنىڭ ماقساتى مەن مىندەتىن كورەرمەندەرگە بايانداپ بەردى. مۋزەي ەكسكۋرسوۆودى م.ساندىبەكوۆ فوتوكورمەدە بەينەلەنگەن ءار ءمۇيىستىڭ تاريحىنا، قويىلعان ءار سۋرەتتىڭ ماڭىزىنا توقتالىپ ءوتتى.

«ورال: قازاقستاننىڭ باتىس قاقپاسى» فوتوكورمەسى 2020 جىلدىڭ 10 قاڭتارىنا دەيىن جالعاسادى.

ايتا كەتەيىك، تاۋەلسىزدىك مەرەكەسى قارساڭىندا باتىس قازاقستان وبلىستىق تاريحي-ولكەتانۋ مۋزەيىنىڭ بارلىق فيليالىندا ءتۇرلى ماڭىزدى شارالار، جاڭا ەكسپوزيتسيالار، تاعىلىمدى كەزدەسۋلەر جاپپاي ءوتىپ جاتىر. جىل بويى ۇيىمداستىرىلعان «مۋزەيستار-2019» جوباسى قورىتىندىلانىپ، «اقجايىق وڭىرىندەگى ونەگەلى ىستەر» اتتى كورمە وبلىستىق مۋزەيدىڭ ۇلكەن زالىندا كورەرمەندەرگە ەسىك اشتى. ال ساكەن عۇماروۆ مۋزەي-ۇيىندە «ەلىمنىڭ ەركىندىگى – تاۋەلسىزدىك» مەرەكەلىك كەشى وتسە، مانشۇك مامەتوۆانىڭ مەموريالدىق مۋزەيىندە ۇلى جەڭىستىڭ 75 جىلدىعىنا ارنالعان « ۇلى جەڭىس شەجىرەسى» اتتى پاتريوتتىق اكتسيامەن جالعاستى.

 

باتىس قازاقستان

سوڭعى جاڭالىقتار

ۇقساس جاڭالىقتار