وسىدان 45 جىل بۇرىن سالىنعان عيمارات مۇلدە وزگەرگەن. مەردىگەر «ايت-گولد» جشس-ءى بەس اي ىشىندە بالاباقشا عيماراتىن تولىق جاڭالاپ, ەدەندەردى, ەسىك-تەرەزەلەردى جانە سانتەحنيكانى اۋىستىرعان. اۋلادا بالالاردىڭ ويناۋىنا بارلىق جاعداي جاسالىپ, ءتيىستى قۇرىلعىلار ورناتىلعان. ەڭ باستىسى, باقشا ەندى سۋىق ەمەس. كىشى توپتاردا - جىلى ەدەندەر سالىنىپ, ىستىق سۋمەن قامتاماسىز ەتىلگەن. كۇردەلى جوندەۋگە رەسپۋبليكالىق قازىنادان 238 ميلليون تەڭگە جۇمسالعان. تۇرعىنداردى مەرەكەمەن قۇتتىقتاعان اۋدان اكىمى الىپبەك وسەرباەۆ تاۋەلسىزدىك جىلدارى ورداباسى اۋدانىندا 31 مەكتەپ, ەكى مەملەكەتتىك جانە 40 جەكەمەنشىك بالاباقشا سالىنعانىن اتاپ ءوتتى. تاياۋ جىلدارى «اۋىل-التىن بەسىگىم» باعدارلاماسى اياسىندا باسقا دا مەملەكەتتىك مەكتەپكە دەيىنگى مەكەمەلەردە جوندەۋ جۇمىستارى جوسپارلانعان.
سونداي-اق مەرەكە قارساڭىندا تەمىرلانداعى شاعىناۋدان تۇرعىندارىنا سپورتپەن شۇعىلدانۋعا مۇمكىندىك جاسالعان اشىق سپورت الاڭى پايدالانۋعا بەرىلدى. اۋداندىق بيۋدجەتتەن 17 ميلليون تەڭگە بولىنگەن سپورت نىسانىندا جۇگىرۋ, فۋتزال, ۆولەيبول جانە باسكەتبولدان جارىستار وتكىزۋگە بولادى. بۇل كۇنى, سونىمەن قاتار, ءبورجار, قاجىمۇقان اۋىلدىق وكرۋگتەرىندە وبلىستىق جانە رەسپۋبليكالىق بيۋدجەت قاراجاتى ەسەبىنەن سالىنعان جاڭا مەكتەپتەر اشىلدى.
