وبلىستىق جاستار ساياساتى ماسەلەلەرى باسقارماسى باسشىسىنىڭ مىندەتىن اتقارۋشى نۇرحات وراشتىڭ ايتۋىنشا, بايقاۋعا قاتىسۋعا 150-دەن اسا ءوتىنىش تۇسكەن. ارنايى كوميسسيا مۇشەلەرىنە جۇزدەن جۇيرىك, مىڭنان تۇلپار جاستاردى انىقتاۋ وڭايعا تۇسپەگەن. باتىس قازاقستان وبلىسىنىڭ اكىمى عالي ناجىمەدەن ۇلى باستاعان بەلگىلى تۇلعالار تابىس ەتكەن سىيلىق يەلەرى قاتارىندا ح.بوكەەۆا اتىنداعى وبلىستىق قازاق دراما تەاترىنىڭ كوركەمدىك جەتەكشىسى, اكتيور جاسقايرات ءسابيت ۇلى («ۇزدىك جاس ونەرپاز»), «سىرىم ەلى» قوعامدىق-ساياسي گازەتىنىڭ رەداكتورى, اقىن باۋىرجان شيرمەدين ۇلى («ۇزدىك جاس جۋرناليست»), جۇبان مولداعاليەۆ اتىنداعى كىتاپحانا كىتاپحاناشىسى فاريزا ايتىموۆا («ۇزدىك جاس مامان») جانە باسقالارى بار.
ءدال وسى سالتاناتتى شارا الدىندا باتىس قازاقستان وبلىسى اكىمدىگى جانىنداعى جاستار ىستەرى جونىندەگى كەڭەس وتىرىسى وتكەن بولاتىن. وندا جاستار جىلى وڭىردەگى جاستاردى قولداۋ ماقساتىندا اتقارىلعان جانە الداعى «ەرىكتىلەر جىلى» اتقارىلار جۇمىستار جايى تالقىلاندى.
- وبلىستا 132 مىڭنان استام جاس بار. ولار وبلىس تۇرعىندارىنىڭ 20,3%-ىن قۇرايدى. ياعني وبلىستىڭ ءاربىر بەسىنشى تۇرعىنى جاستار وكىلى بولىپ كەلەدى. وڭىردە 89 جاستار قوعامدىق بىرلەستىگى جانە جاستارمەن جۇمىس ىستەيتىن 14 رەسۋرستىق ورتالىق بار. جالپى وبلىستا جاستار ساياساتىنا 3 ملرد. تەڭگەدەن استام قاراجات ءبولىنىپ, بىرقاتار كەشەندى جۇمىس اتقارىلدى. الدا اتقارىلار جۇمىستار از ەمەس, - دەيدى وبلىس اكىمى عالي ەسقاليەۆ.
باتىس قازاقستان وبلىستىق جاستار ساياساتى ماسەلەلەرى باسقارماسى باسشىسىنىڭ مىندەتىن اتقارۋشى نۇرحات وراشتىڭ بايانداۋىنشا, 2019 جىلى مەملەكەتتىك باعدارلامالار مەن جوبالاردىڭ كومەگىمەن 8 مىڭعا جۋىق جاس جۇمىسپەن قامتىلعان. «Zhas project» جوباسى بويىنشا 771 جوبا ۇسىنىلىپ, 217 جوبا ماقۇلدانىپ, 500 ملن. تەڭگە كولەمىندە گرانتتىق قارجى بەرىلگەن.
ورال ستۋدەنتتەرى اليانسىنىڭ كوشباسشىسى مۋسا كونەەۆتىڭ ايتۋىنشا, ءوڭىر ەرىكتىلەردىڭ بەلسەندىلىگى بويىنشا ەلىمىز بويىنشا ءۇشىنشىورىندا تۇر ەكەن. «Qazvolunteer.kz» ەرىكتىلەر پورتالىنا بقو-دان 23 مەكەمە, 432 ەرىكتى تىركەلگەن.
باتىسقازاقستاندىق جاستار الداعى جىلى تالاي جاسامپاز باستاماعا مۇرىندىق بولماق. «جاسىل ەل» باتىس قازاقستان وبلىستىق شتابىنىڭ جەتەكشىسى اسىلان تاپيشەۆ ستۋدەنتتىك قۇرىلىس جاساقتارى جۇمىس فورماتىن قايتا جاڭعىرتۋ ماسەلەسىن كوتەرسە, قاراتوبەلىك ەلدار امانتاەۆ ەرىكتىلەر جىلىندا كاسىپكەرلەر مەن جاستاردىڭ كۇش-جىگەرىن بىرىكتىرۋدى ۇسىندى. نۇرعالي جولداسقاليەۆ اۋىل جاستارىن قولداۋعا باعىتتالعان «جاستار كەرۋەنى» جوباسى جايىندا اڭگىمەلەپ, «ديپلوممەن اۋىلعا» باعدارلاماسى بويىنشا اۋىلدارعا كەلەتىن جاس ماماندارعا ارناپ جاڭا ءۇي سالۋدى سۇرادى.
وڭىردە «Zhas Project» جوباسىنا بيىل 697 جاس قاتىسىپ, 54 جوبا قالا اۋماعىندا, 163 جوبا اۋىلدىق جەردە ىسكە اسىرىلعان. ءسويتىپ, شالعاي اۋىلداردا ناۋبايحانا, كونديتەرلىك تسەح, شاشتاراز جانە باسقا دا نىساندار اشىلدى.
- جاستار جىلى كوپتەگەن جۇمىس اتقارىلدى. بۇل باعىتتاعى ىستەرىمىز الداعى جىلى دا جالعاسادى. ەرىكتىلەر جىلىنىڭ جۇمىسىن قازىردەن باستاپ قولعا الۋ قاجەت. بۇگىندە وبلىس اۋماعىندا 60-تان استام ەرىكتىلەر ۇيىمى مەن 10 مىڭعا جۋىق ەرىكتى بەلسەندى جۇمىس ىستەۋدە. بۇل وڭىرىمىزدە ەرىكتىلەر قوزعالىسىنىڭ جاقسى جولعا قويىلعانىن كورسەتەدى. ەندى ءار اۋدانداعى ەرىكتىلەر ۇيىمدارىن «اقجايىق ۆولونتەرلەرى» ەرىكتىلەر كورپۋسىنا بىرىكتىرىپ, بىرلەسىپ جۇمىس ىستەۋى قاجەت. سوندا جۇمىس ناتيجەلى بولماق, - دەيدى ءوڭىر باسشىسى عالي ەسقاليەۆ.
سۋرەتتى تۇسىرگەن مەيىربەك تاجقۇرانوۆ
باتىس قازاقستان
