پارلامەنت • 12 جەلتوقسان، 2019

ءبىلىم بەرۋ ساپاسىن قالاي ارتتىرۋعا بولادى؟

101 رەتكورسەتىلدى

ءبىلىم بەرۋ سالاسىنىڭ بارلىق دەڭگەيىندە ساپانى ارتتىرۋ – ءبىلىم بەرۋ جانە پەداگوگيكالىق عىلىم سالاسىنا قاتىستى بارلىق مەملەكەتتىك باسقارۋ ورگاندارىنىڭ باستى مىندەتى. پارلامەنت سەناتى الەۋمەتتىك-مادەني دامۋ جانە عىلىم كوميتەتى وتكىزگەن «سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» اتتى قازاقستان حالقىنا جولداۋىندا جاريالانعان تاپسىرمالار اياسىندا قازاقستان رەسپۋبليكاسىنىڭ ءبىلىم بەرۋ ساپاسىن ارتتىرۋ ماسەلەلەرى بويىنشا زاڭناماسىن ودان ءارى جەتىلدىرۋ» تاقىرىبىنا ارنالعان دوڭگەلەك ۇستەلگە قاتىسۋشىلار وسىلاي دەپ سانايدى. بۇل تۋرالى پارلامەنت سەناتىنىڭ ءباسپاسوز قىزمەتى حابارلادى.

بايانداما جاساعان ءبىلىم جانە عىلىم ءمينيسترى اسحات ايماعامبەتوۆ جوعارى وقۋ ورىندارىن وڭتايلاندىرۋ، جوعارى وقۋ ورىندارىنىڭ اكادەميالىق جانە باسقارۋ دەربەستىگىن كەڭەيتۋ جونىندەگى شارالار، دارىندى بالالاردىڭ قابىلەتتەرىن دامىتۋ جونىندەگى جۇمىستاردى كۇشەيتۋ، مەكتەپ ديرەكتورلارى مەن بالاباقشا مەڭگەرۋشىلەرىن تاعايىنداۋ جۇيەسىن قايتا قاراۋ جانە تاعى باسقا ماسەلەلەر تۋرالى جان-جاقتى حاباردار ەتتى.

«ماڭىزدى ماسەلەلەردىڭ ءبىرى – كادرلاردى قايتا دايارلاۋدى ساپالى جۇزەگە اسىرۋ بولىپ تابىلادى. بۇگىن 85 جوعارى وقۋ ورنى پەداگوگتاردى دايارلاۋدا، ءبىز ەندى وسى جوعارى وقۋ ورىندارىنا تالاپتاردى كۇشەيتۋ جونىندەگى شارالاردى قابىلدايمىز. تيىسىنشە، ليتسەنزيالاردى قايتارىپ الۋ بويىنشا جۇمىستاردى جۇزەگە اسىرامىز. ءبىلىم جانە عىلىم مينيسترلىگىنىڭ جوسپارى بويىنشا، پەداگوگتار دايىندايتىن 20-30-عا جۋىق جوعارى وقۋ ورنى قالۋى مۇمكىن. بىزگە ساننان گورى ساپا ماڭىزدى»، - دەدى ا.ايماعامبەتوۆ.  مينيستر سونداي-اق وقۋلىقتاردى ازىرلەۋ، ساپاسىن باعالاۋ، باسىپ شىعارۋ جانە مونيتورينگ جۇيەسى وزگەرەتىنىن حابارلادى. وقۋلىقتاردى ازىرلەۋگە قويىلاتىن تالاپتار كۇشەيتىلدى، ساراپتامانىڭ ناقتى شارتتارى انىقتالدى، ساراپشىلاردى وقىتۋ جانە سەرتيفيكاتتاۋ، اۆتورلاردى وقىتۋ، الەۋەتتى ساراپشىلاردىڭ بازاسىن قالىپتاستىرۋ، «بۇركەنشەك» ساراپتاما ەنگىزۋ كوزدەلىپ وتىر. 

سەناتور باقىتجان جۇماعۇلوۆ ءبىلىم بەرۋدىڭ ءاربىر دەڭگەيىنىڭ جاعدايى مەن پروبلەمالارىن جان-جاقتى تالدادى. سەناتور مەكتەپكە دەيىنگى ءبىلىم بەرۋ ماسەلەلەرىنە قاتىستى بىلىكتى كادرلاردىڭ جەتىسپەۋشىلىگىن، تاربيەشىلەردىڭ بالالارعا قاتىستى ءتارتىپ بۇزۋشىلىقتارىن (2017-2019 جىلدارى اتا-انالاردان 203 شاعىم تۇسكەن) اتاپ ءوتتى. «جاعدايدى ليتسەنزيالاۋدى ەنگىزۋ تۇزەتۋى مۇمكىن. بىراق ونى اسا تەز ەمەس، قولدا باردى بۇزىپ الماي، مۇقيات جانە دايەكتى تۇردە جۇزەگە اسىرۋ كەرەك»، دەدى ب.جۇماعۇلوۆ. سەناتور دۋالدى ءبىلىم بەرۋ تۋرالى ايتا كەلىپ، مەملەكەتتىك تاپسىرىستى قالىپتاستىرۋ جانە تۇلەكتەردى جۇمىسقا ورنالاستىرۋ كەزىندە ەڭبەك نارىعىنىڭ قاجەتتىلىگىن ەسكەرۋدى ۇسىندى.

جوعارى ءبىلىم بەرۋ سالاسىندا سەناتور وقۋ ورىندارىن تىركەۋدى زاڭنامالىق جانە وزگە دە قامتاماسىز ەتۋدى ودان ءارى جەتىلدىرۋ، سونداي-اق پاريج كومميۋنيكەسىنىڭ (2018 ج.) ۇسىنىمدارى بويىنشا «جوعارى ءبىلىمنىڭ ەۋروپالىق كەڭىستىگىندە ساپانى قامتاماسىز ەتۋ جونىندەگى ستاندارتتار مەن باسشىلىق پرينتسيپتەرىن» ۇيلەستىرۋدى پىسىقتاۋ قاجەتتىگىن اتاپ ءوتتى. ب.جۇماعۇلوۆ سونىمەن قاتار جوعارى وقۋ ورىندارىنىڭ دەربەستىگىن زاڭنامالىق كەڭەيتۋ زاڭنان كەيىنگى اكتىلەرمەن تولىق كولەمدە ءالى دە بەكىتىلمەگەن دەپ ەسەپتەيدى.

دوڭگەلەك ۇستەل بارىسىندا «نازارباەۆ زياتكەرلىك مەكتەپتەرى» پەداگوگيكالىق ولشەۋ ورتالىعى فيليالىنىڭ ديرەكتورى ا.شيلىباەۆا، ء«بىلىم-يننوۆاتسيا» حالىقارالىق قوعامدىق قورىنىڭ ۆيتسە-پرەزيدەنتى ە.اۋباكىروۆ، «اتامەكەن» ۇلتتىق كاسىپكەرلەر پالاتاسى توراعاسىنىڭ ورىنباسارى ر.الشانوۆ، نۇر-سۇلتان قالاسىنداعى №66 مەكتەپ-ليتسەي كوممۋنالدىق مەملەكەتتىك مەكەمەسىنىڭ ديرەكتورى ا.شاياحمەتوۆا جانە باسقالار ءسوز سويلەدى.

سەناتورلار س.ەرشوۆ، س.بەكتۇرعانوۆ، د.نوكەتاەۆا، ن.ءجۇسىپ، م.باقتيار ۇلى پەداگوگتارعا جالاقىنى جانە ستۋدەنتتەردىڭ ستيپەندياسىن ارتتىرۋ، مەكتەپتەردە سمارتفونداردى پايدالانۋعا تىيىم سالۋ، جوعارى وقۋ ورىندارىن بىرىكتىرۋ تاجىريبەسى، دۋالدى ءبىلىم بەرۋدى جەتىلدىرۋ ماسەلەلەرىن كوتەردى.

دوڭگەلەك ۇستەل قورىتىندىسى بويىنشا ۇكىمەتكە جىبەرىلەتىن ۇسىنىستار ازىرلەندى.

سوڭعى جاڭالىقتار

قىس قىسىمىن ادام كۇشى جەڭۋدە

ايماقتار • بۇگىن، 16:56

تارازدا «اntikor ortalygy» اشىلدى

ايماقتار • بۇگىن، 16:10

200 تەڭگەلىك مونەتا اينالىمعا شىقتى

قازاقستان • بۇگىن، 10:39

ۇقساس جاڭالىقتار