جاقىندا ۆتب بىرىككەن باسكەتبول ليگاسىنىڭ جەرەبە تارتۋ ءراسىمى ءوتىپ, ءبىزدىڭ ەلىمىزدەن وسى جارىسقا قاتىسىپ جاتقان جالعىز «استانا» كومانداسىنىڭ جاڭا ماۋسىمداعى قارسىلاستارى انىقتالدى.
وندا جەرەبە بويىنشا «استانا» كومانداسى ۆەف (لاتۆيا) «حيمكي» (ماسكەۋ وبلىسى, رەسەي) «نەپتۋناس» (ليتۆا), «تسموكي مينسك» (بەلارۋس), «ازوۆماش» (ۋكراينا), «كراسنىە كرىليا» (سامارا, رەسەي), تسسكا (ماسكەۋ, رەسەي), «تريۋمف» (ماسكەۋ وبلىسى, رەسەي) كلۋبتارىمەن «ۆ» توبىنا ءتۇستى. وسى توپتا «استانا» تاعى ءبىر كوماندامەن وينايدى. ازىرگە ول كوماندا بەلگىسىز بولىپ وتىر. ول ۇجىم ليتۆانىڭ «جالگيريس» كلۋبىنىڭ ليگاعا قاتىسۋدان باس تارتۋىنا بايلانىستى «ۆ» توبىندا وينايتىن بولادى.
جالپى, بيىلعى ۆتب ليگاسىنىڭ بەسىنشى ماۋسىمىندا 9 ەلدىڭ 20 كلۋبى قاتىسادى. ەكى توپقا ءبولىنەتىن كوماندالار ءبىر-بىرىمەن سىرت الاڭدا جانە ءوز الاڭىندا كەزدەسەدى. ليگانىڭ ويىندارى قازان ايىندا باستالىپ, كەلەسى جىلدىڭ ماۋسىمىندا اياقتالادى. ءوز توبىندا ۇزدىك ەكى ورىن العان كوماندالار پلەي-وفف كەزەڭىنىڭ بىردەن شيرەك فينالىنا جولداما السا, 3-ءشى جانە 6-ورىن العان ۇجىمدار پلەي-وفف كەزەڭىن 1/8 فينالدان باستايدى.
