ايماقتار • 11 جەلتوقسان، 2019

باتىس قازاقستان وبلىسىندا گاز كەشەنى ىسكە قوسىلدى

15 رەتكورسەتىلدى

باتىس قازاقستان وبلىسىنداعى چينارەۆ مۇنايگاز كوندەنسات كەن ورنىندا تابيعي گازدى اۋىر كومىرسۋتەگىنەن تازارتىپ، تەحنيكالىق پروپان، تاۋارلى قۇرعاق گاز، پروپان-بۋتان قوسپاسى جانە قالىپتى گاز كوندەنساتىن الۋعا بولاتىن جاڭا كەشەن جۇمىسىن باستادى. «جايىقمۇناي» كومپانياسىنىڭ سوڭعى ۇلگىدەگى №3 گازدى كەشەندى دايىنداۋ قوندىرعىسىن ىسكە قوسۋ راسىمىنە باتىس قازاقستان وبلىسىنىڭ اكىمى عالي ەسقاليەۆ ارنايى باردى.

سۋرەتتى تۇسىرگەن مەيىربەك تاجقۇرانوۆ

بۇل كەنىشتەگى №3 گازدى كەشەندى دايىنداۋ قوندىرعىسىن جەتىلدىرۋدىڭ ءۇشىنشى كەزەڭى. جاڭا، زاماناۋي وزىق تەحنولوگيانىڭ كۇشىمەن بۇل قوندىرعى جىلىنا 2،7 ملرد. تەكشەمەتر گاز وندىرە الادى. جەتىلدىرۋ جوباسىنا 218 ملرد. تەڭگەدەن ارتىق قاراجات جۇمسالعان.  

– قازاقستاندا بيزنەس جۇرگىزۋ ءۇشىن بارلىق جاعداي جاسالعان. سونىڭ ارقاسىندا ءبىزدىڭ «Nostrum» كومپانياسى ەل ەكونوميكاسىنا تۇراقتى تۇردە ينۆەستيتسيا سالىپ كەلەمىز. №3 گازدى كەشەندى دايىنداۋ قوندىرعىسىن جەتىلدىرۋدىڭ ءۇش كەزەڭنەن تۇراتىن جوباسى گاز شيكىزاتىن وڭدەۋ كولەمىن ەكى ەسەدەن ارتىق كوبەيتەدى. ياعني، ءونىم ءوندىرۋ جىلىنا 4،2 ملرد. تەكشەمەترگە دەيىن جەتپەك. ءسويتىپ، كومپانيا تولىق كۇشىندە جۇمىس ىستەگەن جاعدايدا تاۋلىگىنە مۇنايدىڭ 100 مىڭ باررەلدەن ارتىق ەكۆيۆالەنتىندەي ءونىم شىعارادى، - دەيدى كەنىشتەگى تەحنولوگيالىق جاڭعىرتۋ جۇمىستارىن جۇرگىزۋشى Nostrum Oil & Gas PLC كومپانياسىنىڭ باس اتقارۋشى ديرەكتورى كاي-ۋۆە كەسسەل.

شەتەلدىك ينۆەستيتسيانىڭ وتاندىق ەكونوميكا الەۋەتىن كوتەرۋگە قوسقان وڭ ۇلەسىن ءوڭىر باسشىسى عالي ەسقاليەۆ تە اتاپ ءوتتى.

№3 گازدى كەشەندى دايىنداۋ قوندىرعىسىنىڭ ءبىزدىڭ ايماق ءۇشىن مىڭىزى زور. ويتكەنى «جايىقمۇناي» كومپانياسى – وڭىردەگى ەڭ ءىرى سالىق تولەۋشىلەردىڭ ءبىرى. بۇل جوبا وندىرىستىك قۋاتىنا تولىق كوشكەن كەزدە سالىق ءتۇسىمى، مۇناي قورى، جەرگىلىكتى جانە مەملەكەتتىك بيۋدجەت ەكى ەسەگە ارتادى. بۇل دەگەنىڭىز ءوڭىر مەن مەملەكەت ءۇشىن ۇلكەن قولداۋ. قازىر كومپانيا مۇناي قورىنا، مەملەكەتتىك بيۋدجەتىنە جىلىنا 10-12 ملرد. تەڭگە قوسىپ وتىر. بۇل جەردە 200-گە جۋىق جۇمىس ورنى اشىلدى. كەشەن قۇرىلىسىندا جەرگىلىكتى كومپانيالاردىڭ جۇمىس ىستەۋى دە ماڭىزدى بولدى. جاڭا قوندىرعى ەلىمىزدىڭ ەڭ ۇلكەن مەيرامى – تاۋەلسىزدىك كۇنى قارساڭىندا اشىلۋى دا تەگىن ەمەس. قازاقستاننىڭ زاماناۋي دامۋى، الەمدىك باسەكەلەستىككە ۇمتىلۋى دا وسى تاۋەلسىزدىكتىڭ ناتيجەسى! – دەدى ءوز سوزىندە وبلىس اكىمى عالي ەسقاليەۆ.

1

«جايىقمۇناي» جشس – مۇناي جانە گاز كەن ورىندارىن بارلاپ، وندىرۋمەن جانە مۇناي-گاز كوندەنساتىن ساتۋمەن اينالىساتىن كومپانيا. «جايىقمۇناي» چينارەۆ كەن ورنىندا 1997 جىلدان بەرى تۇراقتى ءونىم ءوندىرىپ، جۇيەلى دامىپ كەلەدى. 22 جىل ىشىندە كەنىش اۋماعىندا بۇرعىلاۋ قوندىرعىلارى، جابىق قۇبىر جۇيەسى، شيكىزاتتى جيناۋ، مۇنايدى دايىنداۋ كەشەندەرى، №1/2 گازدى كەشەندى دايىنداۋ قوندىرعىلارى ىسكە قوسىلدى. سۇيىتىلعان كومىرسۋتەگى گازىنىڭ قويمالارى، قىسىمدى بىرقالىپتى ساقتاۋ جۇيەسى، بەلەس اۋىلىنداعى تەرمينالعا دەيىن ماگيسترالدى مۇناي قۇبىرى سالىندى. تاۋارلى گازدى ماگيسترالدى جۇيەگە دەيىن جەتكىزەتىن قۇبىر جۇمىس ىستەپ تۇر.

 

باتىس قازاقستان

سوڭعى جاڭالىقتار

قىس قىسىمىن ادام كۇشى جەڭۋدە

ايماقتار • بۇگىن، 16:56

تارازدا «اntikor ortalygy» اشىلدى

ايماقتار • بۇگىن، 16:10

200 تەڭگەلىك مونەتا اينالىمعا شىقتى

قازاقستان • بۇگىن، 10:39

ۇقساس جاڭالىقتار