قوعام • 11 جەلتوقسان، 2019

حالىقتى بىلىكتى زاڭ كومەگىمەن قامتاماسىز ەتۋ قاجەت

تۇركىستاندا ءماجىلىستىڭ زاڭناما جانە سوت-قۇقىقتىق رەفورما كوميتەتىنىڭ كوشپەلى وتىرىسى ءوتتى. حالىقتى بىلىكتى زاڭ كومەگىمەن قامتاماسىز ەتۋدى ماقسات ەتكەن وتىرىسقا وبلىستىڭ، شىمكەنت قالاسىنىڭ، سونداي-اق جامبىل، قىزىلوردا وبلىستارىنىڭ زاڭ جانە قۇقىق قورعاۋ سالاسى قىزمەتكەرلەرى قاتىستى.

عالىمجان ەلشىباي

جيىنعا باسشىلىق ەتكەن بەيىندى كوميتەت توراعاسى، Nur Otan پارتياسى جانىنداعى قۇقىقتىق كەڭەسىنىڭ توراعاسى، زاڭ عىلىمدارىنىڭ دوكتورى، پروفەسسور نۇرلان ءابدىروۆ وتىرىستىڭ ماقساتى مەن ماڭىزىنا توقتالدى. سونداي-اق دەپۋتات وتكەن جىلى مەملەكەت باسشىسى قول قويعان «ادۆوكاتتىق قىزمەت جانە زاڭ كومەگى تۋرالى» زاڭنىڭ جەرگىلىكتى جەرلەردە جۇزەگە اسىرىلۋىن نازارعا الا وتىرىپ، بىلىكتى زاڭ كومەگىن كورسەتۋ جۇيەسىن ودان ءارى دامىتۋ، جەتىلدىرۋ اياسىندا زاڭنامالىق جاڭالىقتاردىڭ پراكتيكالىق ماڭىزىن ءتۇسىندىرۋ، زاڭ كونسۋلتانتتارى ينستيتۋتىن ودان ءارى جەتىلدىرۋ، ادۆوكاتۋرا مەن قۇقىق قورعاۋ ورگاندارىنىڭ ءوزارا ءىس-قيمىلىن ۇيلەستىرۋ باستى مىندەت ەكەنىن اتاپ ءوتتى. ال تۇركىستان وبلىسى اكىمىنىڭ ورىنباسارى ۇلان تاجىباەۆ حالىقتىڭ زاڭ قۇقىقتارىن بىلۋدە وسىنداي باسقوسۋلاردىڭ ماڭىزى زور ەكەندىگىن ايتتى.

ەسكە سالا كەتسەك، اتالعان زاڭمەن قۇرامىندا 6 ادۆوكات، قوعامنىڭ 3 وكىلى جانە وتستاۆكاداعى 2 سۋديا بار تارتىپتىك كوميسسيالاردىڭ ەكى دەڭگەيلى جۇيەسى كوزدەلگەن، بۇل ازاماتتاردىڭ شاعىمدارىن وبەكتيۆتى جانە جان-جاقتى قاراستىرۋدى، اشىقتىق پەن ايقىندىقتى قامتاماسىز ەتەدى. 2020 جىلدان باستاپ ادۆوكاتتاردىڭ، زاڭ كونسۋلتانتتارىنىڭ كاسىبي جاۋاپكەرشىلىگىن مىندەتتى ساقتاندىرۋ ەنگىزىلەدى، بۇل سەنىم بىلدىرۋشىلەرگە بىلىكتى زاڭ كومەگىن الۋعا جانە ساپاسىز زاڭ كومەگى كورسەتىلگەن جاعدايدا كەلتىرىلگەن زياندى وتەۋگە كەپىلدىك بەرەدى. سونداي-اق الەۋمەتتىك جانە قارجىلىق قيىن جاعدايداعى ازاماتتار ءۇشىن ادۆوكاتتان نەمەسە زاڭ كونسۋلتانتتارىنان، ءوزىنىڭ قۇقىقتىق جاعدايىن تولىق سۇيەمەلدەۋمەن اقىسىز زاڭ كومەگىن الۋ كوزدەلگەن.

جىل بويى وسى جانە باسقا زاڭ تالاپتارىنىڭ ورىندالۋ دەڭگەيىنە قاتىستى ارنايى مونيتورينگ جۇرگىزىلگەن. وتىرىس بارىسىندا وسى مونيتورينگتىڭ قورىتىندىسى جاريالانىپ، اشىق پىكىرلەر مەن ۇسىنىستار ايتىلدى. ونىڭ بارلىعى الداعى ۋاقىتتا پارلامەنت ماجىلىسىندە وتەتىن ۇكىمەتتىك ساعاتتا جانە كەلەسى جىلعا جوسپارلانعان پارلامەنتتىك تىڭداۋدا تاقىرىپقا ارقاۋ بولماق.

تۇركىستان وبلىسى