پارلامەنت • 10 جەلتوقسان، 2019

«ءوڭىر» دەپۋتاتتىق توبىنىڭ قاراعاندى وبلىسىندا كوشپەلى وتىرىسى بولدى

23 رەتكورسەتىلدى

سەناتتىڭ ء«وڭىر» دەپۋتاتتىق توبى «قاراعاندى وبلىسىنداعى ونەركاسىپ كاسىپورىندارىنىڭ ءوندىرىس ۇدەرىستەرىن تسيفرلاندىرۋ ۇلگىسى» تاقىرىبى بويىنشا قاراعاندى وبلىسىندا كوشپەلى وتىرىس وتكىزدى. بۇل تۋرالى پارلامەنت سەناتىنىڭ ءباسپاسوز قىزمەتى حابارلادى.

شاراعا سەنات دەپۋتاتتارى – دەپۋتاتتىق توپتىڭ مۇشەلەرى ميحايل بورتنيك، مۇراتباي جولداسباەۆ، سەرگەي ەرشوۆ، راشيت اكىموۆ، ەربولات مۇقاەۆ، سەرگەي پلوتنيكوۆ، ەرىك سۇلتانوۆ، قاراعاندى وبلىسىنىڭ اكىمى جەڭىس قاسىمبەك، تسيفرلىق دامۋ، يننوۆاتسيا جانە اەروعارىش ونەركاسىبى ءمينيسترىنىڭ ورىنباسارى ابلايحان وسپانوۆ، يندۋستريا جانە ينفراقۇرىلىمدىق دامۋ ءمينيسترىنىڭ ورىنباسارى امانياز ەرجانوۆ، وبلىستىق ءماسليحات دەپۋتاتتارى جانە كاسىپكەرلەر قاتىستى.

شارانى اشقان ء«وڭىر» دەپۋتاتتىق توبىنىڭ جەتەكشىسى ميحايل بورتنيك مەملەكەت باسشىسىنىڭ ەكونوميكانى ودان ءارى تسيفرلاندىرۋ بويىنشا مىندەت قويعانىن ەسكە سالا وتىرىپ: «تسيفرلاندىرۋ - كاسىپورىندار مەن جالپى ەل ەكونوميكاسىنىڭ باسەكەگە قابىلەتتىلىگىن قامتاماسىز ەتۋدىڭ ماڭىزدى شارتى. ودان ءارى ءوسۋ تسيفرلاندىرۋ قارقىنىن جەدەلدەتۋگە، ەكونوميكانىڭ بارلىق سەكتورلارىندا تسيفرلىق قۇرالداردى بەلسەندى ەنگىزۋگە بايلانىستى»، دەدى.

سەناتور قاراعاندى وبلىسى ساندىق تەحنولوگيالاردى ەنگىزۋدە ايتارلىقتاي جەتىستىكتەرگە قول جەتكىزگەن جەتەكشى يندۋستريالىق ايماق ەكەنىن اتاپ ءوتتى.

قازاقستان رەسپۋبليكاسىنىڭ يندۋستريا جانە ينفراقۇرىلىمدىق دامۋ ءمينيسترىنىڭ ورىنباسارى ا.ەرجانوۆ تاۋ-كەن ونەركاسىبىنىڭ جۇيە قۇراۋشى كاسىپورىندارىن تسيفرلاندىرۋ اياسىندا 283،3 ملرد تەڭگە سوماسىنا 53 جوبانى جۇزەگە اسىرۋ جوسپارلانعانىن، ونىڭ ىشىندە 59،1 ملرد تەڭگەگە 22 جوبا ىسكە اسقانىن، 31 جوبانى اياقتاۋ كوزدەلىپ وتىرعانىنا توقتالدى.

«قازاقمىس كورپوراتسياسى»، «التىنالماس اك»، «Eurasian Foods Corporation» اكتسيونەرلىك قوعامدارىنىڭ باسشىلارى اتالعان كاسىپورىنداردا تسيفرلاندىرۋدىڭ جوعارى دەڭگەيىنە قول جەتكەنىن ايتتى، بۇل ءوندىرىس پروتسەستەرىن ايتارلىقتاي وڭتايلاندىرۋعا مۇمكىندىك بەردى.

سەناتورلار س.ەرشوۆ پەن ە.سۇلتانوۆ ەكونوميكانىڭ تيىمدىلىگى مەن ۇلتتىق ەكونوميكانىڭ باسەكەگە قابىلەتتىلىگىن ارتتىرۋ ماقساتىندا بارلىق سالالاردى ودان ءارى تسيفرلاندىرۋدىڭ ماڭىزدى ەكەنىنە نازار اۋداردى.

سەناتورلار كوشپەلى وتىرىس اياسىندا «بەمەر ارماتۋرا»، «Recycling Company»، «Eurasian foods»، «Maker» كاسىپورىندارىندا بولىپ، ءوندىرىس پروتسەستەرىنە ساندىق تەحنولوگيالاردى ەنگىزۋ بارىسىمەن تانىستى.

وتىرىس قورىتىندىسى بويىنشا ۇسىنىمدار قابىلدانىپ، ەلىمىزدىڭ ۇكىمەتىنە، ورتالىق جانە جەرگىلىكتى اتقارۋشى ورگاندارعا جىبەرىلەتىن بولدى.

سوڭعى جاڭالىقتار

قىلمىستىق ءىس قوزعالدى

ايماقتار • كەشە

باستى اقپارات (21.02.2020)

ۆيدەو • 21 اقپان، 2020