قىرعىزستانداعى ىستىقكول كولىنىڭ جاعاسىندا وتكەن «مەيكين ازيا» اتتى جاس ورىنداۋشىلاردىڭ حالىقارالىق فەستيۆالىنە قاتىسقان قازاقستاندىق ديماش قۇدايبەرگەن باس جۇلدە يەگەرى اتاندى.
وسىعان دەيىن «جاس قانات» بايقاۋى مەن «شىعىس بازارى» فەستيۆالىندە جەڭىسكە جەتكەن جاس ءانشى بۇل بايقاۋدىڭ العاشقى كۇنىندە ساق قازىلار القاسى مەن تىڭداۋشىلارىن ەرەكشە داۋىسىمەن تاڭعالدىردى. جەڭىمپازعا جۇلدەنى قىرعىزستان رەسپۋبليكاسىنىڭ پرەمەر-ءمينيسترى تاپسىردى.
«مەيكين ازيا» – قىرعىزستان مەملەكەتى تاراپىنان قارجىلاندىرىلاتىن جانە بيلىكتىڭ رەسمي قولداۋىمەن وتەتىن رەسپۋبليكاداعى العاشقى ءان بايقاۋى. فەستيۆالدە كۋبا, فيليپپين, تۇركيا, رەسەي, ارمەنيا, وڭتۇستىك كورەيا, قىتاي, ازەربايجان, تاجىكستان, قازاقستان, وزبەكستان, ءۇندىستان مەن قىرعىزستان ەلدەرىنەن كەلگەن 25 ونەرپاز ءان شىرقادى. تۇرىك تەلەكومپانياسى بىرنەشە ەلگە تىكەلەي حابار تاراتتى.
قازىلار القاسىنىڭ شەشىمى بويىنشا ءبىرىنشى ورىندى ۋكراينالىق ۆلاديسلاۆ لەۆيتسكي يەلەندى. ەكىنشى ورىندى قىرعىزستاندىق يسلام اكماتوۆ پەن كۋرال چوكوەۆ, تاجىكستاندىق سابينا شامسەد, ءۇشىنشى ورىندى رەسەيلىك حريستينا دوروشەنكو, قىرعىزستاندىق ءازىم ۋلۋ ادىلەت پەن ارمەنيالىق اني وگانەسيان ءبولىستى. بارلىق قاتىسۋشىلارعا اقشالاي سىيلىقتار مەن ديپلومدار تابىس ەتىلدى.
نۇرزادا كۇمىسبەك,
ل.ن.گۋميلەۆ اتىنداعى
ەۋرازيا ۇلتتىق ۋنيۆەرسيتەتىنىڭ ستۋدەنتى.
