ايماقتار • 10 جەلتوقسان، 2019

تۇركىستان: تاپسىرمانى ورىنداماعاندار قىزمەتىمەن قوشتاسادى

حالقىنىڭ سانى 2 ميلليوننان اساتىن تۇركىستان وبلىسىندا 86،6 مىڭ كوپ بالالى وتباسى بار. اتاۋلى الەۋمەتتىك كومەك كورسەتۋ بارىسىندا بەلگىلەنگەن نىسانالى ينديكاتورىنىڭ ءبىرى – كۇنكورىس دەڭگەيىنەن تومەن تۇراتىن حالىقتىڭ ۇلەسى 16،5% بولىپ بەلگىلەنگەن. بيىل وبلىس بويىنشا ااك كورسەتۋ ماقساتىندا جالپى 70،8 ملرد.تەڭگە بولىنگەن، ونىڭ ىشىندە رەسپۋبليكالىق بيۋدجەتتىڭ ۇلەسى - 65،7 ملرد تەڭگە. اتاۋلى الەۋمەتتىك كومەك 100 مىڭنان استام وتباسىنداعى 632،8 مىڭ ادامعا تاعايىندالعان. بۇل وتكەن جىلمەن سالىستىرعاندا ءۇش ەسە كوپ.

عالىمجان ەلشىباي

وبلىس اكىمى ومىرزاق شوكەەۆتىڭ توراعالىعىمەن وتكەن اپپارات ماجىلىسىندە وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى ءاسيا تەمىرباەۆا وسىنداي دەرەكتەردى كەلتىردى. اتاۋلى الەۋمەتتىك كومەك كورسەتۋدەگى سوڭعى مالىمەتتەر مەن ورىن العان كەمشىلىكتەر تالقىلانعان جيىندا قايتا ەسەپتەۋلەردىڭ ۋاقتىلى جۇرگىزىلمەۋى، قۇجاتتاردىڭ دەر كەزىندە وڭدەلمەۋى، بيۋدجەت قارجىلارىنىڭ دۇرىس جوسپارلانباۋى جانە الدىن-الا ءبىر جىلدىق ااك تولەنۋى ولقىلىقتارعا سەبەپ بولعانى ايتىلدى.

وسىعان بايلانىستى، اۋدان، قالا اكىمدەرى جىلدىڭ سوڭىنا دەيىن قارجىنىڭ ماقساتتى جانە زاڭ شەڭبەرىندە تولەنۋىن جەتە باقىلاۋعا الىپ، ااك الۋشىلاردى جۇمىسپەن قامتۋدىڭ بەلسەندى شارالارىنا تارتۋى قاجەت. اتاۋلى الەۋمەتتىك كومەكتى كورسەتۋ – حالىق اراسىندا ۇدايى تالقىلانىپ، سىنعا ىلىككەن ماسەلە بولعانىن ايتقان وبلىس اكىمى تاپسىرمانى وسى جولى ورىنداۋدان تايقىعاندار قىزمەتىمەن قوشتاساتىنىن قاتاڭ ەسكەرتتى. «بۇل وتە ماڭىزدى ماسەلە. جۇيەلىلىگى جوق جۇمىستىڭ شيكىلىگى شىعادى. وعان جول بەرگەن جاۋاپتىلاردىڭ كىناسىن ناقتى فاكتىمەن دالەلدەپ، جازالايتىن بولامىز. قازىر تىڭ يدەياسى مەن اقىلى بار مامانداردى اڭدىعان زامان. زاماناۋي تەحنولوگيانى يگەرگەن، يدەيالى تۇلعالاردى جۇمىسقا تارتىڭدار»، دەدى ايماق باسشىسى جينالىس بارىسىندا.

باسقارما باسشىلىعى الەۋمەتتىك شيەلەنىستەرگە جول بەرگەن، مىندەتتى شارالاردى جۇرگىزبەگەن جۇمىسپەن قامتۋ ورتالىقتارى باسشىلارىنىڭ قىزمەتتەن بوساتىلۋىن، ءتيىستى جاۋاپتى مامانداردىڭ ورىنداۋشىلىق ءتارتىبىن قاراۋدى ۇسىندى. اۋىل اكىمدەرىنىڭ، جۇمىسپەن قامتۋ ورتالىقتارى مەن بولىمدەرى ماماندارىنىڭ بىلىكتىلىگىن انىقتاۋ ماقساتىندا جەلتوقسان-قاڭتار ايلارىندا تەستىلەۋ جۇمىستارى جۇرگىزىلمەك.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز