قاسيەتتى رامازان ايىندا اۋىزاشار بەرىپ, ساۋاپ جيناۋدى مۇرات ەتكەن جانداردىڭ بۇگىندە قاراسى كوبەيىپ كەلە جاتقانى سوڭعى جىلدارى انىق بايقالۋدا. سونداي جانداردىڭ قولداۋىمەن حالىققا اۋىزاشار بەرۋدى داستۇرگە اينالدىرعان «ازىرەت سۇلتان» مەشىتى تاياۋدا استاناداعى بۇقارالىق اقپارات قۇرالدارى وكىلدەرىنىڭ باسىن قوسىپ, تاعى ءبىر ساۋاپتى شاراعا مۇرىندىق بولدى.
اۋىزاشارعا 400-گە تارتا بۇقارالىق اقپارات قۇرالدارى وكىلدەرىمەن بىرگە, ەلگە تانىمال ازاماتتار دا قاتىستى. قۇرانمەن باستالعان كەشتە «ازىرەت سۇلتان» مەشىتىنىڭ باس يمامى قايرات جولدىباي ۇلى ءسوز الىپ, اۋىزاشاردىڭ شىمىلدىعىن اشتى. «ءبىزدىڭ جاساپ جاتقان جۇمىستارىمىزدى, يمامدارىمىزدىڭ ۋاعىزدارىن ەلىمىزدىڭ تۇكپىر-تۇكپىرىنە جەتكىزەتىن سىزدەرسىزدەر», دەپ ءسوزىن باستاعان قايرات جولدىباي ۇلى بۇل داستارقان باق وكىلدەرىنىڭ ءدىن ناسيحاتى ءۇشىن اتقارعان جۇمىستارىنا العىس رەتىندە جاسالىپ وتىرعانىن ايتتى. «قاسيەتتى رامازان ايىن جان-جاقتى ناسيحاتتاپ, حالىققا كەرەكتى اقپارات بەرىپ وتىرسىزدار. بۇل دا ءدىنىمىزدىڭ وركەندەۋىنە ۇلكەن كومەك. اللا رازىلىعى ءۇشىن دەپ اق كوڭىلمەن جايىلعان اق داستارقانىمىزعا ادال نيەتپەن كەلىپ وتىرعاندارىڭىزعا مىڭ دا ءبىر العىس», – دەدى ق. جولدىباي ۇلى.
سونداي-اق, باس يمامنىڭ ايتۋىنشا, «اۋىزاشارعا ۇلەس قوس» اكتسياسىنىڭ ارقاسىندا «ازىرەت سۇلتان» مەشىتى كۇن سايىن 400 ادامعا اۋىزاشار بەرسە, الەۋمەتتىك جاعدايى تومەن وتباسىلاردىڭ بالالارىن مەكتەپكە دايىنداۋ اكتسياسىنا دا ۇلەس قوساتىن جانداردىڭ تابىلاتىنىن جەتكىزدى.
اۋىزاشاردا ەلىمىزگە بەلگىلى ءانشىلەر مەن تەرمەشىلەر حالىقتى ءدىني اندەرمەن سۋسىنداتتى. كەش سوڭىندا قوناقتارعا كادەسىي رەتىندە ءدىني كىتاپتار ۇلەستىرىلدى.
الماس ماناپ,
«ەگەمەن قازاقستان».
