الماتىداعى قىزمەتى ەرەكشە ەمدەۋ مەكەمەسىنىڭ ءبىرى – ۇلى وتان سوعىسى ارداگەرلەرىنىڭ ەمحاناسى «مەملەكەتتىك كوممۋنالدىق قازىنالىق كاسىپورنى». اتى ايتىپ تۇرعانداي, ەمحانا جاسى ۇلعايعان جاندارعا, ۇلى وتان سوعىسى ارداگەرلەرىنە جانە ولارعا تەڭەستىرىلگەن تۇلعالارعا, سونىمەن قاتار اۋماقتىق تىركەلگەن تۇرعىندارعا مەديتسينالىق كومەك كورسەتەتىن قالالىق كەڭەستىك-دياگنوستيكالىق ورتالىعى بولىپ ەسەپتەلەدى.
اق سامايلى ارداگەرلەردىڭ بۇگىندە ازايىپ بارا جاتقانى راس. سوندىقتان اۋقىمدى جانە كەشەندىك ءىس-شارالار جۇرگىزۋدى تالاپ ەتەتىن ەمدەۋ ورتالىعى دا زامانا كوشىنەن قالماۋ ءۇشىن كوپ تىرلىك اتقارۋدا. قازىرگى تاڭدا بۇل ەمحانانى مەديتسينا عىلىمدارىنىڭ دوكتورى قالدىباي ماديبرايموۆ باسقارادى. ول كىسىنىڭ گەرونتولوگيا سالاسىنداعى ناۋقاستاردىڭ دەنساۋلىعىن تەكسەرۋ مەن ەمدەۋدىڭ زاماناۋي تەحنولوگيالارىنىڭ باستاماشىسى ەكەنىن ايتا كەتسەك ارتىق بولماس.
مەديتسينا دامىپ جاتقان زاماندا ەمحانا قىزمەتى ساپالى دەڭگەيگە كوتەرىلىپ, زاماناۋي تەحنولوگيالار وسىناۋ مەكەمەدەن تابىلۋى ءتيىس قوي. وسى ماسەلەنى ءبىرىنشى كەزەككە قويىپ وتىرعان قالدىباي ماقاتاي ۇلى ارداگەرلەردىڭ كوپشىلىگى قازىر ءوز بەتىنشە ءجۇرىپ-تۇرا المايتىندىعىن, ولارعا ءۇلكەن كۇتىم كەرەك ەكەندىگىن ايتادى. سوندىقتان دارىگەرلەر ناۋقاستاردىڭ ۇيلەرىنە ءجيى بارىپ, دەنساۋلىعىن باقىلاپ, ەمدەپ وتىرادى.
قازىرگى كەزدە ەمحانا قىزمەتپەن قامتىپ وتىرعان تۇرعىندار سانى – 33173 بولسا, سوعىس ارداگەرلەرى مەن وعان تەڭەستىرىلگەن ارداگەرلەر سانى – 12457 ەكەن. وعان قوسا سوعىس ارداگەرلەرىنە جانە ولارعا تەڭەستىرىلگەن تۇلعالارعا مەديتسينالىق قىزمەت كورسەتۋ قالانىڭ جەتى اۋدانى بويىنشا ىسكە اسىرىلادى.
مۇندا جىل سايىن قان اينالىمى, ىشەك وبىرى, قانت ديابەتى, گلاۋكوما اۋرۋلارىنا قاتىستى الدىن الا پروفيلاكتيكالىق تەكسەرۋلەر, مامموگرافيالىك زەرتتەۋلەر جۇرگىزىلىپ جاتادى.
2000 جىلى 30 توسەكتى كۇندىزگى ستاتسيونار بولىمشەسى اشىلعان بولاتىن. وسى كۇندىزگى ستاتسيونار ىڭعايلى جيھازدارمەن, تۇرمىستىق تەحنيكامەن, ەمدەيتىن فيزيوتەراپەۆتيكالىق اپپاراتتارمەن جابدىقتالعان.
سول سياقتى, اتالمىش ەمحانادا جۇكتى ايەلدەردى ەسەپكە الۋ جولعا قويىلعان. الدىن-الۋ جۇمىستارىن بەلسەندى جۇرگىزۋ ارقىلى جاقسى كورسەتكىشتەرگە جەتتىك, ونىڭ ءىشىندە جۇكتى ايەلدەردى تەمىر جانە يودتاپشىلىعىنان ەمدەۋگە جانە ونىڭ الدىن الۋ تەگىن جۇرگىزىلەدى, – دەيدى باس دارىگەردىڭ ەمدەۋ ىسىنە جاۋاپتى ورىنباسارى گۇلنار شاحمانوۆا.
جىل سايىن ەمحانادا س.ج.اسفەندياروۆ اتىنداعى قاز ۇمۋ كافەدرالارىن تارتۋمەن «اشىق ەسىك كۇنى», «قارت تۇلعالار كۇنى» دەگەن ءىس-شارالار وتەدى. سونىمەن قاتار, ارداگەرلەر قوعامىنىڭ وكىلدەرىمەن دوڭگەلەك ۇستەل وتكىزىلەدى.
– اۋرۋلاردى ەمدەيتىن كۇندىزگى ستاتسيوناردىڭ, ءۇي جاعدايىندا كومەك كورسەتەتىن ستاتسيوناردىڭ, كۇندىز كەلىپ ەمدەلەتىن جارتىلاي ستاتسيوناردىڭ كومەگىن ءمۇمكىندىگىنشە كەڭەيتۋ كەرەكتىگى سەزىلۋدە. جاسى ۇلعايعان ناۋقاستاردى كونسەرۆاتيۆتى تەراپيامەن ەمدەۋ كەرەك. وسىعان بايلانىستى ۇلى وتان سوعىسى ارداگەرلەرى ەمحاناسىنىڭ اۋماعىندا سوعىس ارداگەرلەرى مەن ەڭبەك جانە وعان تەڭەستىرىلگەن تۇلعالار ءۇشىن ستاتسيوناردى الماستىراتىن كۇندىزگى ستاتسيونار اشىلسا دەيمىز, كۇنىنە ءبىر رەت تۇسكى اس بەرەتىن, جاقسى فيزيوتەراپەۆتىك بولىمشەسىمەن, سۋمەن ەمدەۋگە, مەديتسينالىق جانە ساۋىقتىرۋ شارالارىن وتكىزۋگە ارنالعان ساناتوريلىك ستاتسيونار بولسا نەمەسە «ارداگەر» كەشەندىك ءساناتوريى سياقتى ستاتسيونار بولىنسە دەيمىز, – دەيدى ەمحانا جەتەكشىلەرى.
مىنە, وسىلاي الماتىداعى ۇلى وتان سوعىسى ارداگەرلەرىنىڭ ەمحاناسى ءوز ەمدەلۋشىلەرىنىڭ دەنساۋلىعىن قورعاۋدا قولدان كەلگەن كومەكتى جاساپ, مەديتسينالىق جانە الەۋمەتتىك كومەك كورسەتۋدە. ويتكەنى, قارت ادامداردى كەشەندىك قورعاۋ مەملەكەت ساياساتىنىڭ باسىمدىلىعىنا يە بولىپ كەلەدى.
ايناش ەسالي,
«ەگەمەن قازاقستان».
الماتى.
