قازاقستان پرەزيدەنتى نۇرسۇلتان نازارباەۆ ۇلىبريتانيانىڭ كورول وتباسىنا مۇراگەر حانزادانىڭ ومىرگە كەلۋىنە بايلانىستى قۇتتىقتاۋ جەدەلحاتىن جولدادى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى.
جەدەلحاتتا قازاقستان پرەزيدەنتى جەكە ءوزىنىڭ جانە قازاقستان حالقىنىڭ اتىنان ۇلىبريتانيا جانە سولتۇستىك يرلانديا پاتشايىمى ەليزاۆەتا II-ءنى شوبەرەسىنىڭ – كەمبريدج گەرتسوگى مەن كەمبريدج گەرتسوگينياسىنىڭ تۇڭعىش نارەستەسىنىڭ دۇنيەگە كەلۋىمەن قۇتتىقتاعان.
«كورول وتباسىنداعى كوپتەن كۇتكەن قۋانىش ۇلىبريتانيا جانە سولتۇستىك يرلانديا پاتشايىمى ەليزاۆەتا II-ءنىڭ تاققا وتىرعانىنا 60 جىل تولۋىمەن تۇسپا-تۇس كەلۋىندە ەرەكشە ءمان بار», – دەلىنگەن جەدەلحاتتا.
مەملەكەت باسشىسى پاتشايىمعا جانە بارشا كورول وتباسىنا زور دەنساۋلىق, ۇزاق ءومىر, ال دوستاس ۇلىبريتانيا حالقىنا بەيبىتشىلىك پەن باق-بەرەكە تىلەگەن.
