جوبا داريعا نازارباەۆانىڭ باستاماسىمەن قۇرىلىپ, «دەگدار» گۋمانيتارلىق قورىنىڭ ۇيىمداستىرۋىمەن بيىل ەكىنشى رەت وتۋدە. فەستيۆال اياسىندا اۋىلدىق ەلدى مەكەندەردە ورنالاسقان ءتورت بالالار ۇيىنە قارجى جيناپ, قايىرىمدىلىق كومەك كورسەتىلەدى. كەشە «قازاقستان» ورتالىق كونتسەرت زالىندا اقمولا وبلىسىنداعى اقكول اۋدانىنىڭ ۋريۋپين اۋىلى بالالار ءۇيىنىڭ تاربيەلەنۋشىلەرىنە ارناپ «Open space» ءىس-شاراسىن وتكىزدى.
ۇيىمداستىرۋشىلار بالالاردىڭ ءوز سۇراۋىنا قاراي جاڭاجىلدىق سىيلىقتار دا ازىرلەگەن. سىيلىقتى بالالارعا ءوز قولىمەن تابىستاعان سەنات توراعاسى داريعا نازارباەۆا: «بۇگىن سىزدەرمەن كەزدەسىپ, باقىتتى جۇزدەرىڭىزدى كورگەنىمە قۋانىشتىمىن. ۇيىرمەلەرگە قاتىسقان بالالاردىڭ قانشالىقتى تالانتتى, بىلىمگە جانە زاماناۋي عىلىمدارعا قانشالىقتى قۇشتار ەكەندىگىن كوردىك. سىزدەرگە بولاشاعى جارقىن, ماقساتى ايقىن تۇلعا رەتىندە ءوسىپ, بارلىق اسقاق ارماندارىڭىزدىڭ ورىندالۋىن تىلەيمىن. اينالاڭىزدا ءومىرىن بالالاردىڭ قامقورلىعىنا ارناپ, كۇندەلىكتى باقىت شۋاعىن سىيلاپ جۇرگەن كوپتەگەن جاقسى, مەيىرىمدى ادامدار بار. بالالاردىڭ قاسىنان تابىلاتىن تاربيەشىلەر مەن پەداگوگتارعا زور العىس بىلدىرەمىن», دەدى.
سونداي-اق بالالار «ەرەكشە اكتەرلەر تەاترىنىڭ» قويىلىمىن, كەسكىندەمە ونەرى, قىش ونەرى جانە زاماناۋي بيلەر بويىنشا شەبەرلىك سىنىپتارىن تاماشالاپ, روبوتتەحنيكا ۇيىرمەلەرىن, ۆيرتۋالدى جانە حيميا لابوراتوريالارىن كوردى, انيماتورلارمەن بىرگە قىزىقتى ويىندارعا قاتىستى.
«مەلودي ۆولشەبستۆا» قايىرىمدىلىق فەستيۆالىنىڭ اياسىندا ءبىز بۇگىن ەكىنشى رەت بالالار ءۇيىنىڭ تاربيەلەنۋشىلەرىمەن كەزدەسىپ وتىرمىز. بۇل اتا-اناسىنىڭ قامقورلىعىنسىز قالعان بالالاردىڭ اراسىندا مۇمكىندىگى شەكتەۋلى وسپىرىمدەر دە بار. بىلتىر فەستيۆال اياسىندا 52 942 250 تەڭگە قاراجات جينالىپ, 209 بالا قامتىلعان بولاتىن. جينالعان قاراجات ەسەبىنەن اۋىلدى جەردە ورنالاسقان 4 بالالار ۇيىنە كومەك كورسەتىلدى. ال بيىل 315 بۇلدىرشىنگە كومەك كورسەتىلمەك. بۇعان قوسا, تاعى 4 بالالار ءۇيىن ساپالى ءارى قاجەتتى قۇرال-جابدىقتارمەن قامتۋ جوسپارلانعان», دەيدى «دەگدار» گۋمانيتارلىق قورىنىڭ ديرەكتورى لاۋرا احمەتوۆا.
اتاپ ايتقاندا, بيىل ۋريۋپينكا اۋىلىنداعى «بالاباقشا – مەكتەپ – ينتەرنات» ارنايى كەشەنى, شىعىس قازاقستان وبلىسىنىڭ ءبىلىم باسقارماسىنا قاراستى «№8 بالالار ءۇيى» كمم, قاراعاندى وبلىسى وساكاروۆكا اۋدانىنداعى «جەتىم بالالار مەن اتا-انا قامقورلىعىنسىز قالعان بالالارعا ارنالعان مەكتەپ-ينتەرنات» كمم جانە قوستاناي وبلىستىق دەنساۋلىق ساقتاۋ باسقارماسىنىڭ «ورتالىق نەرۆ جۇيەسى ورگانيكالىق زاقىمدانعان جانە پسيحيكاسى بۇزىلعان بالالارعا ارنالعان رۋدنىي مامانداندىرىلعان سابيلەر ءۇيى» كمم-گە كومەك كورسەتىلمەك.
قايىرىمدىلىق فەستيۆالى 7 جەلتوقساندا «قازاقستان» وكز-دا داريعا نازارباەۆا, مەدەت چوتاباەۆ, مەيىر باينەش, الفيا كاريموۆا, ازات مالىك, ازامات جىلتىركوزوۆ, «FORTE TRIO» مەملەكەتتىك تريوسى, «استانا وپەرا» تەاترىنىڭ حورى مەن سيمفونيالىق وركەسترى, ديريجەر ابزال مۇحيتدينوۆ سياقتى تانىمال ونەر يەلەرىنىڭ قاتىسۋىمەن وپەرەتتالار مەن ميۋزيكلدەردىڭ اريالارى ورىندالاتىن كونتسەرتپەن اياقتالادى. سونداي-اق «استانا وپەرا» تەاترى سپەكتاكلدەرىنىڭ كوستيۋمدەرىنەن قۇرىلعان كورمە ۇيىمداستىرىلادى.
