تاۋەلسىزدىك سارايىندا وتكەن شاراعا پرەمەر-ءمينيستردىڭ ورىنباسارى بەردىبەك ساپارباەۆ, ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ, قر پارلامەنتىنىڭ دەپۋتاتتارى, «اتامەكەن» ۇكپ-نىڭ, جۇمىسكەرلەر مەن جۇمىس بەرۋشىلەر رەسپۋبليكالىق بىرلەستىكتەرىنىڭ, جەرگىلىكتى اتقارۋشى ورگانداردىڭ وكىلدەرىمەن قوسا ەڭبەك ارداگەرلەرى جانە كونكۋرستىڭ وڭىرلىك كەزەڭىنىڭ لاۋرەاتتارى قاتىستى.
سالتاناتتى شارا باسىندا بەردىبەك ساپارباەۆ مەتسەناتتار مەن كاسىپكەرلەرگە «شاپاعات» مەدالىن, قر پرەزيدەنتى مەن پرەمەر-ءمينيسترىنىڭ اتىنان العىس حاتتاردى تابىس ەتسە, قر پارلامەنتى ءماجىلىسى الەۋمەتتىك-مادەني دامۋ كوميتەتىنىڭ ءتورايىمى گۇلشارا ابدىحالىقوۆا ارداگەرلەرگە «ەڭبەك ارداگەرى» مەدالىن تابىس ەتتى.
ەڭبەك جانە حالىقتى الەۋمەتتىك قورعاۋ مينيسترلىگى اتالمىش شارانى جۇمىسشىلاردى كەڭىنەن تانىمال ەتۋ ماقساتىندا وتكىزەدى. كونكۋرس «ۇزدىك ەڭبەك اۋلەتى», «جۇمىس ىستەيتىن جاستاردىڭ ۇزدىك تالىمگەرى» جانە ء«وندىرىستىڭ ۇزدىك جاس جۇمىسكەرى» اتتى ءۇش نوميناتسيادان تۇرادى.
ۇمىتكەرلەردەن ءوتىنىم قابىلداۋ وسى جىلى 1 ماۋسىمدا باستالدى. كونكۋرستىڭ وڭىرلىك كەزەڭىندە ءبىرىنشى نوميناتسيا بويىنشا – 90, ەكىنشى نوميناتسيا بويىنشا 144 جانە ءۇشىنشى نوميناتسيا بويىنشا – 154, بارلىعى 388 ادام باقتارىن سىنادى.
كونكۋرستىڭ رەسپۋبليكالىق كەزەڭىندە ەڭبەكمينىنىڭ سايتىندا وتكىزىلگەن ونلاين داۋىس بەرۋ بارىسىندا «ۇزدىك ەڭبەك اۋلەتى» نوميناتسياسى بويىنشا 23 351, «جۇمىس ىستەيتىن جاستاردىڭ ۇزدىك تالىمگەرى» نوميناتسياسى بويىنشا 90 156 جانە ء«وندىرىستىڭ ۇزدىك جاس جۇمىسكەرى» نوميناتسياسى بويىنشا 65 822, بارلىعى 179 329 داۋىس ءتۇستى.
بايقاۋ جەڭىمپازدارىن ونلاين داۋىس بەرۋدى ەسكەرە وتىرىپ, ەڭبەك جانە حالىقتى الەۋمەتتىك قورعاۋ ۆيتسە-ءمينيسترى اقمادي سارباسوۆتىڭ توراعالىعىمەن ارنايى رەسپۋبليكالىق كوميسسيا انىقتادى. كوميسسيا قۇرامىنا قر ەڭبەكمينىنىڭ, قر ۇلتتىق ەكونوميكا مينيسترلىگىنىڭ, قر پرەزيدەنتى جانىنداعى «قوعامدىق كەلىسىم» رەسپۋبليكالىق مەملەكەتتىك مەكەمەسىنىڭ, «اتامەكەن» ۇكپ-نىڭ, قر كاسىپوداقتار فەدەراتسياسىنىڭ, قازاقستان ەڭبەكشىلەر كونفەدەراتسياسى جانە «امانات» قازاقستان كاسىپوداقتارى ۇيلەستىرۋ كەڭەسىنىڭ وكىلدەرى كىردى.
وتانداستارىمىزدى كاسىبي جەتىستىكتەرگە ىنتالاندىرۋ جانە جاڭا ەڭبەك ديناستيالارىن قالىپتاستىرۋ ماقساتىندا, اعىمداعى جىلى قر ەڭبەكمينى سىيلىقتاردىڭ سانىن كوبەيتۋ تۋرالى شەشىم قابىلدادى. ەگەر وتكەن جىلدارى سىيلىقتار تەك نوميناتسيالار بويىنشا بەرىلگەن بولسا, اعىمداعى جىلدان باستاپ جەڭىمپازدار – 1, 2 جانە 3 ورىن ءۇشىن ماراپاتتالاتىن بولدى.
«ۇزدىك ەڭبەك اۋلەتى» نوميناتسياسىندا ەلوردالىق ەڭسەباەۆتار اۋلەتى ءبىرىنشى ورىنعا, شىعىس قازاقستان وبلىسىنان كەلگەن ساعاديەۆتەر اۋلەتى ەكىنشى ورىنعا, ال اتىراۋلىق جۇماعاليەۆتەردىڭ ۇستازدار اۋلەتى ءۇشىنشى ورىنعا يە بولدى.
«جۇمىس ىستەيتىن جاستاردىڭ ۇزدىك تالىمگەرى» نوميناتسياسى بويىنشا اقمولا وبلىسىنىڭ تبب (تەحنيكالىق باقىلاۋ ءبولىمىنىڭ) باقىلاۋشىسى مايرا يساەۆا جەڭىسكە جەتتى, شىمكەنت قالاسىنىڭ تسەمەنت ءوندىرۋ جونىندەگى ينجەنەر-تەحنولوگى ەسكەندىر رۇستەموۆ ەكىنشى ورىنعا تۇراقتاسا, قاراعاندى وبلىسىنىڭ اۋا ءبولۋ قوندىرعىلارىنىڭ اپپاراتشىسى داۋلەت ەجيباەۆ ءۇشىنشى ورىندى قاناعات تۇتتى.
«ۇزدىك جاس ءوندىرىس جۇمىسكەرى» نوميناتسياسىندا سولتۇستىك قازاقستان وبلىسىنان كەلگەن جالپى پراكتيكا دارىگەرى يۋليا شەۆچەنكو توپ جاردى, قوستاناي وبلىسىنىڭ لوگيستيكا جانە قويما ساقتاۋ شەبەرى ۆلاديمير سامودۋروۆ ەكىنشى ورىنعا تۇراقتادى. ال پاۆلودار وبلىسىنان كەلگەن تەحنولوگيالىق ناسوس ءماشينيسى اسقار نۇرعاليەۆقا ءۇشىنشى ورىن بۇيىردى.
بايقاۋ جەڭىمپازدارى 1 ورىن ءۇشىن – 1 ملن تەڭگە, 2 ورىن ءۇشىن – 500 مىڭ تەڭگە جانە 3 ورىن ءۇشىن – 200 مىڭ تەڭگە كولەمىندە اقشالاي سەرتيفيكاتتارمەن ماراپاتتالدى.
«ەڭبەك جولى» بايقاۋىنىڭ جەڭىمپازدارىن قۇتتىقتاي وتىرىپ, ءبىرجان نۇرىمبەتوۆ مەملەكەتتىڭ جاڭعىرۋى مەن قوعامنىڭ دامۋىنداعى ەڭبەك ادامدارىنىڭ ماڭىزدى ءرولىن اتاپ ءوتتى.
ەستەرىڭىزگە سالا كەتەيىك, ەڭبەك اۋلەتتەرى مەن ءوندىرىس جۇمىسكەرلەرى اراسىنداعى رەسپۋبليكالىق «ەڭبەك جولى» بايقاۋىن ەڭبەكمين ەلباسى نۇرسۇلتان نازارباەۆتىڭ جالپى ەڭبەك قوعامىن قۇرۋ يدەياسىن جۇزەگە اسىرۋ ماقساتىندا 2016 جىلدان باستاپ وتكىزىپ كەلەدى. بۇل شارانىڭ نەگىزگى مىندەتى – ەڭبەك ادامدارى تۋرالى قوعامدا جاعىمدى پىكىر قالىپتاستىرىپ, كاسىپورىندار مەن ۇيىمداردا جاڭا ەڭبەك اۋلەتتەرىنىڭ قالىپتاسۋىنا جاعداي جاساۋ.
