كەزدەسۋلەرگە مەملەكەتتىك قىزمەتكەرلەر جانە ونىڭ ىشىندە جەرگىلىكتى باسقارمالار مەن دەپارتامەنتتەر باسشىلارى قاتىستى. وندا ءاليحان بايمەنوۆ دايەكتى رەفورمالار ناتيجەسىندە قازاقستاندا قۇرىلعان تيىمدىلىك, مەريتوكراتيا جانە قوعامعا ەسەپ بەرۋ قاعيداتتارىنا نەگىزدەلگەن مەملەكەتتىك قىزمەتتىڭ بىرەگەي مودەلى, ەلىمىزدەگى مەملەكەتتىك قىزمەتتىڭ دامۋى, جاستار ساياساتى جانە مەملەكەتتىك قىزمەتكەرلەر مادەنيەتى تۋرالى ايتتى. كەزدەسۋلەردە وعان تىڭداۋشىلار تاراپىنان «تاۋەلسىز قازاقستاننىڭ مەملەكەتتىك قىزمەتى قالاي بولدى؟», «بۇگىندە مەملەكەتتىك قىزمەتتىڭ قالاي دامىپ كەلە جاتىر جانە ونى جەتىلدىرۋ بويىنشا قانداي قادامدار جاسالۋدا؟» دەگەن مازمۇندا سۇراقتار قويىلدى.
مەملەكەتتىك قىزمەت سالاسىنداعى وڭىرلىك حاب باسقارۋشى كوميتەتىنىڭ توراعاسى ءاليحان بايمەنوۆ تاۋەلسىز قازاقستانداعى مەملەكەتتىك قىزمەت جۇيەسىندە "ا" جانە "ب" كورپۋستارىن الىپ كەلگەن رەفورمانى ومىرگە ەنگىزگەن ساياسي قايراتكەر بولاتىن. بۇل رەفورما جالپى مەملەكەتتىك قىزمەتتى ودان ءارى دامىتۋعا, جەتىلدىرە تۇسۋگە ىقپال ەتتى. وبلىس مەملەكەتتىك ورگاندارىنىڭ ءبىرىنشى باسشىلارىمەن كەزدەسۋ بارىسىندا سپيكەر مەملەكەتتىك قىزمەتتىڭ قالىپتاسۋ كەزەڭدەرىنە جانە ونىڭ دامۋ كەزەڭدەرىنە ەگجەي-تەگجەيلى توقتالىپ, ءوز تاجىريبەسىمەن جانە جەتىستىكتىڭ تاريحىمەن ءبولىستى.
سونىمەن قاتار, قوناق مەملەكەتتىك قىزمەت ارداگەرلەرى مەن دەپارتامەنتتىڭ جانە مەملەكەتتىك باسقارۋ اكادەمياسى فيليالىنىڭ ۇجىمدارىمەن كەزدەسۋ وتكىزدى.
ءاليحان بايمەنوۆ وسى ساپارىندا قوستانايداعى شاحمات كلۋبىندا وتكەن اتاقتى توعىزقۇمالاقشى, سپورتتىڭ وسى تۇرىنەن ەلىمىزدەگى العاشقى سپورت شەبەرى دميتري پولياكوۆتىڭ 90 جىلدىق مەرەيتويىنا وراي وتكەن وبلىستىق ءتۋرنيردىڭ اشىلۋ سالتاناتىنا قاتىستى. دۇنيەجۇزىلىك توعىزقۇمالاق فەدەراتسياسىنىڭ پرەزيدەنتى ءاليحان بايمەنوۆ قارت سپورتشىنى مەرەيجاسىمەن قۇتتىقتاپ, وعان دەنساۋلىق, تابىستار تىلەدى.
قوستاناي
