پيتتسبۋرگ ۋنيۆەرسيتەتىنىڭ مەديتسينا مەكتەبى نازارباەۆ ۋنيۆەرسيتەتىندە ەلىمىزدىڭ دەنساۋلىق ساقتاۋ, مەديتسينالىق ءبىلىم مەن بيومەديتسينالىق زەرتتەۋلەر سالاسىنداعى جاڭا كوشباسشىلار بولىپ تانىلعان عالىم دارىگەرلەردى دايارلايتىن مەديتسينا مەكتەبىن اشپاق.
«بۇل ءبىزدىڭ مەديتسينا مەكتەبىمىز ءۇشىن ءبىلىم بەرۋ سالاسىنداعى ارىپتەستىكتىڭ ەلەۋلى ۇلگىلەرىنىڭ ءبىرى بولىپ تابىلادى», – دەپ اتاپ ءوتتى پيتتسبۋرگ ۋنيۆەرسيتەتىنىڭ مەديتسينا دوكتورى, مەديتسينا عىلىمدارىنىڭ باس ۆيتسە-كانتسلەرى جانە مەديتسينا مەكتەبىنىڭ دەكانى ارتۋر س.لەۆين.
«نازارباەۆ ۋنيۆەرسيتەتى قازاقستاننىڭ ەلورداسىندا – استانا قالاسىندا مەديتسينا مەكتەبىن قۇرۋ كەزىندە كونسۋلتاتسيالار مەن تەحنيكالىق قولداۋ الۋ ءۇشىن ستراتەگيالىق ارىپتەستى ىزدەگەن بولاتىن, – دەدى دوكتور لەۆين. – نازارباەۆ ۋنيۆەرسيتەتىنىڭ مەديتسينا مەكتەبى ۇلتتىق مەديتسينالىق حولدينگتىڭ كلينيكالارىنا جاقىن جەردەگى, ستۋدەنتتەرگە تاجىريبەلىك بازا بولىپ تابىلاتىن كامپۋستا ورنالاساتىن بولادى. ءبىز بيومەديتسينا سالاسىنداعى دوكتورلار مەن زەرتتەۋشىلەردىڭ جاڭا بۋىنىن دايارلاۋعا ارنالعان امەريكاندىق ستيلدەگى وقۋ باعدارلاماسىن قۇرۋ ءۇشىن بار ءبىلىم مەن تاجىريبەمىزدى سالامىز».
پيتتسبۋرگ ۋنيۆەرسيتەتىنىڭ مەديتسينا مەكتەبىنىڭ ساراپشىلارى نازارباەۆ ۋنيۆەرسيتەتىنە مەديتسينالىق وقۋ باعدارلاماسىنىڭ بازاسىن قۇرۋ مەن دامىتۋ, اكادەميالىق باسشىلىق قۇرام مەن وقىتۋشى-پروفەسسورلار قۇرامىن جالداۋ جانە دايارلاۋ, ۇيىمدىق جانە اكىمشىلىك قۇرىلىمدى, ەرەجەلەر مەن راسىمدەردى جوسپارلاۋ, وقۋ باعدارلاماسىن, ساباق جوسپارلارىن قۇراستىرۋ مەن ۇلتتىق مەديتسينالىق حولدينگتىڭ كلينيكالارىنان مامانداردى تارتا وتىرىپ كلينيكالىق پراكتيكانى جۇرگىزۋ ماسەلەلەرى بويىنشا كونسۋلتاتسيا بەرەتىن بولادى.
«پيتتسبۋرگ ۋنيۆەرسيتەتىنىڭ مەديتسينا مەكتەبىمەن ىنتىماقتاستىقتا ۇزدىك دارىگەرلەردى دايارلاۋ ماقساتىندا ءبىز مەديتسينالىق ءبىلىمنىڭ جاڭا مودەلىن قۇرۋدى جوسپارلاپ وتىرمىز», – دەدى نازارباەۆ ۋنيۆەرسيتەتىنىڭ پرەزيدەنتى شيگەو كاتسۋ. ء–بىزدىڭ ماقساتىمىز قازاقستاندا ينتەگراتسيالانعان اكادەميالىق دەنساۋلىق ساقتاۋ جۇيەسىن قۇرۋ جانە سوڭىندا ەلىمىزدىڭ باسقا ايماقتارىندا قازاقستاننىڭ دەنساۋلىق ساقتاۋ جۇيەسىن جاقسارتۋ ءۇشىن وسى مودەلدى تاراتۋ بولىپ تابىلادى».
وقىتۋ اعىلشىن تىلىندە ءجۇرگىزىلەتىن مەديتسينا مەكتەبى 2015 جىلدىڭ كۇزىندە اشىلادى دەپ كۇتىلىپ وتىر. تالاپكەرلەر امەريكاندىق مەديتسينا مەكتەبىنىڭ, ونىڭ ىشىندە پرەمەديتسينا دايىندىق باعدارلاماسى مەن Medical College Admissions Test مامانداندىرىلعان ەمتيحاننىڭ تالاپتارىنا ۇقساس تالاپتارعا ءسايكەس بولۋلارى ءتيىس.
قازاقستان نازارباەۆ ۋنيۆەرسيتەتىندە ءومىر تۋرالى عىلىمدار ورتالىعى مەن ەنەرگەتيكالىق زەرتتەۋلەر ورتالىعىنىڭ عالىمدارى مەن زەرتتەۋشىلەرىنە قىسقا مەرزىمدى ترەنينگتەردى جۇرگىزۋ ارقىلى پيتتسبۋرگ ۋنيۆەرسيتەتىن بيومەديتسينا سالاسىنا 2011 جىلعى ماۋسىمنان باستاپ تارتا باستاعان بولاتىن.
بىرلەسكەن ىنتىماقتاستىق 2012 جىلعى شىلدەدە كەڭەيتىلدى, پيتتسبۋرگ ۋنيۆەرسيتەتىنىڭ مەديتسينالىق ورتالىعى (UPMC) نازارباەۆ ۋنيۆەرسيتەتىن وتاندىق ونكولوگيا مەن 300 ورىندى, امبۋلاتوريالىق كومەكتى, عىلىمي زەرتتەۋلەرگە ارنالعان بازا مەن قوناق ءۇي كەشەنىن قامتيتىن گوسپيتالى بار زەرتتەۋ ورتالىعىنىڭ قۇرىلىسىن دامىتۋعا قولداۋ كورسەتۋ رەتىندە تاڭداپ العان بولاتىن.
«ەگەمەن-اقپارات».
