قوعام • 04 جەلتوقسان، 2019

بالالار اراسىنداعى بۇزاقىلىق كوبەيىپ بارادى

41 رەتكورسەتىلدى

الماتى وبلىسىندا مەكتەپ ينسپەكتورلارىنىڭ جەتىسپەۋشىلىگى جاسوسپىرىمدەر اراسىنداعى قۇقىق بۇزۋشىلىقتىڭ كوبەيۋىنە سەبەپ بولىپ وتىر. قازىر ايماقتاعى 760 ءبىلىم بەرۋ مەكەمەسىندە بار بولعانى 182 پوليتسيا ۋاكىلى جۇمىس ىستەيدى ەكەن.

بۇل جايىندا تالدىقورعان قالاسىندا وتكەن جاسوسپىرىمدەر اراسىنداعى قىلمىستىڭ الدىن الۋ جانە ولاردى قۇقىقبۇزۋشىلىقتان قورعاۋ ماسەلەسى تالقىلانعان وتىرىستا وبلىستىق پوليتسيا دەپارتامەنتىنىڭ باسشىسى، گەنەرال-مايور مۇرات ۇرۇمحانوۆ ءمالىم ەتتى.

- وتكەن 10 ايدىڭ قورىتىندىسى بويىنشا وبلىستا جاسوسپىرىمدەر اراسىنداعى قىلمىس 4،3 پروتسەنتكە كوبەيگەنى بايقالدى. ياعني، قۇقىقبۇزۋشىلىقتىڭ الدىن الۋ ماقساتىندا جۇرگىزىلگەن جەدەل ءىس-شارالارعا قاراماستان جاعداي كۇردەلى كۇيىندە قالىپ وتىر. پوليتسيا وسى مەرزىم ىشىندە 4 رەت ء«جاسوسپىرىم» شاراسىن، 3 مارتە «تۇنگى قالاداعى بالالار» اكتسياسىن وتكىزدى. ول بويىنشا كامەلەتكە تولماعان بالاسىن قاراۋسىز جىبەرگەن 4 مىڭعا جۋىق اتا-اناعا اكىمشىلىك ايىپپۇل سالىنىپ، 66 ويىن-ساۋىق ورتالىعىنىڭ يەسى جاۋاپكەرشىلىككە تارتىلدى، - دەيدى وبلىستىڭ باس پوليتسەيى.

جيىندا مەكتەپتەردەگى بەينەباقىلاۋ كامەرالارىنىڭ جۇمىسىنا قاتىستى دا سىن ايتىلدى. قازىر ءبىلىم بەرۋ نىساندارىندا 15 860 بەينەباقىلاۋ قۇرىلعىسى ىسكە قوسىلعان. الايدا، كامەرالاردىڭ دەنى ەسكىرگەن. كوپتەگەن قۇرىلعى ءبىر باعىتتى عانا بەينەگە تۇسىرەدى. ولاردىڭ جازبالارىن قاراپ، سۇرىپتاپ وتىراتىن ارنايى مامان تاعى جوق. سول سەبەپتەن دە مەكتەپ ىشىندەگى بالا قۇقىنىڭ بۇزىلۋى نازاردان تىس قالىپ جاتادى.

ايتپاقشى، وبلىستاعى ءۇش جۇزدەن استام مەكتەپتىڭ دارەتحاناسى عيمارات ىشىنەن تىسقارىدا ورنالاسقان ەكەن. وقۋشىلاردىڭ جىلى ءارى قاۋىپسىز دارەتحانالارعا جاقىن مەرزىمدە قول جەتكىزۋى تاعى نەعايبىل.

 

 

الماتى وبلىسى

سوڭعى جاڭالىقتار

الماتىدا زەرتحانالار سانى ارتادى

وڭتۇستىك قازاقستان • كەشە

ۇقساس جاڭالىقتار